Read Kambera 1 HANGANJI 12 Bible Online

1 HANGANJI 12 - Kambera bible

1 HANGANJI 12

¹Lua-nanyaka la Hikimu i Rehambiamu, nadu nggubulu-na na banjaru Ihirailu mbara dia mbàda pauhi-daka lai nu ka wotuya nyuna panjadi hanganji.

²La rehi nu la Mehiru-yapa i Yerumbiamu anana i Nembàtu, ba mbàda palai-dunaka welingu lai Hanganji Halomu. Ba narongu-yaka na rukuna i Rehambiamu beli-nanyaka la Ihirailu.

³Da-paràhangu pangàdalu-ya i Yerumbiamu paraïda rayatu mbara dia, hi da-pakariangu ndàba palua la hanggana i Rehambiamu. Dapanii,

⁴“Tamu umbu ma-mangarangu! I Halomu na amamu mbàda pabuku-na-nggamaka wai ngera mambotu. Nàhu, jàkau wua-nggama ma-halimu Tamu Umbu, dàngu upa-kawawaku-ya na mayila-ma, napa ma-rajaku-ma duma lai nyumu Tamu Umbu,” wàdanya.

⁵Nahema i Rehambiamu, “Màta ku-kanandi pakunya bàdi napa ihili mai bia la hambeli tailu mbua lodu, ka kuwua-nggainya na hemana,” wànanja. Ba tunaka nu beli-danyaka.

⁶Ka karai-nanyaka lii padaü la ama boku - ama bokulu da mambàda njadi ma-madaü lai Halomu na amana i Rehambiamu. “Nggikina wàngguka bàdi ba kuhema-ha da tau? Nggikina wàmika nyimi bai daüya?” wànanja.

⁷Dahema nyuda, “Jàka rinjungu langatàka-dumunya palumu-nya na rayatu, Tamu Umbu, wua-njawa hema maliiya na etida. Napa da-rajaku mànuma lai nyumu, Tamu Umbu,” wàdanya.

⁸Na nyuna i Rehambiamu nda na-wàrihu-aya na lii padaü-da da ama boku - ama bokulu. Na pa-njàngangu-na lua-nanyaka la bidi tau - bidi tau rànja lunggina dàngu da mambàda pambapa danya nyuna.

⁹Paàra-nanjaka nyuda, “Nggikina wàmika nyimi na padaü-minya ka kuhema-ya na rayatu da makarai ka ku-pahalela-ya na wai ngerada?” wànanja.

¹⁰Dahema nyuda, “Màla ka tuna yia làti nahema-munja tamu umbu, ‘Jiapa ka nggiki maluputu-nggu, kurihi kapàru-mapa welingu la amanggu!’[14]

¹¹Mbàda wua-nanggaika wai ngera mambotu na amanggu, tàka nyungga duku kuwua-nggai marihi mbotupa napa. Nyuna duna na-ràmbahu wànggai iwi, tàka nyungga duku napa ku-ràmbahu wànggai ràmbahu maningu bàhi dàkana!” wàmu, wàdanya.

¹²Tailu mbua lodu ma-palàngangu hili mai beli-danyaka i Yerumbiamu dàngu mbuu ndàbada nuda da tau, la hanggana i Hanganji Rehambiamu, hama tuna na hupu liina na hanganji.

¹³Tàka na hanganji nda na-ihili-anya na lii padaü-da da ama boku - ama bokulu. Nawàngu pa-hanggàritu ba napulu dànya na rayatu na mamai lai nyuna.

¹⁴Kikunya na lii padaü pawua-danya paraï da bidi tau napanii, “Mbàda wua-nanggaika wai ngera mambotu na amanggu, tàka nyungga duku kurihi pambotu-yapa napa na wai ngerami. Nyuna duna na-ràmbahu wanggai iwi, tàka nyungga duku napa ku-ràmbahu wànggai ràmbahu maningu bàhi dàkana!” wananja.

¹⁵Nu ba tuna, nda na-wàrihu-aya na pa-karaina na rayatu paraïna hanganji. Tàka nuna nu pawuku-na i MIRI-maya. Nu na-panyura-na i Wunangu Ahia welingu la Hilu rukuna i Yerumbiamu anana i Nembàtu lupangu-ma nanjadi.

¹⁶Ba naita-yaka rayatu ba nda na-mbuhangu-a na hanganji parongu-ha nyuda, kabàtingu-danyaka, “Nggàra ihi wànya i Ndautu dàngu ana umbuku-na! Ndedi nggàrama pawunda-da ndumanda nyuta. Màla dimi, ha banjaru Ihirailu, mainguwa tabeli! Màta bianja ka na-lumungu wikina i Rehambiamu!” wàda. Ka beli-nanyaka na rayatu Ihirailu,

¹⁷tàka i Rehambiamu hanganji la ngaba tana Yahunda-ayaka.

¹⁸Jiapa-kai ba tuna paràha-mana-nyaipa i Anduniràmu, na haàtu ma-hamata ràma lerangu paraïna i Hanganji Rehambiamu ka na pa-kawànaru-ya na rayatu. Tàka danggepi tuku pameti-ma-aya. Ba naita-yaka nuna i Rehambiamu ri - ringanaka pahei la kareta-na hi napalai la Yeruhali.

¹⁹Piti welingu la rehi nu naingu-manaka na-patula ngganggangu-na na rayatu mbara dia hanggangu la hanganji - hanganji ana umbuku-na i Ndautu.

²⁰Ba narongu ndàbaka na rayatu Ihirailu nggubulu-na ba mbàda beli-naka welingu la Mehiru i Yerumbiamu dunda-danyaka la pulu pamba hi dawotu-ya panjadi hanganji Ihirailu. Didiya na rayatu kabihu Yahunda-ma-a na ma-padaingu pa-tuturu la ana umbuku-na i Ndautu.

²¹Ba natàka ka la Yeruhali i Rehambiamu, pauhi-nanjaka da 180.000 panjuri-na da mahàmu halawàla welingu la kabihu Yahunda dàngu Mbanyamingu ka beraya na tau Ihirailu dàngu ka pahàmu beliya na kawaha-na la kabihu - kabihu mbara dia la Ihirailu.

²²Na nyuna i Ala na-palewa-ya i Wunangu Hamaya

²³pa-patàka-nya yiana na lii langu lai Rehambiamu dàngu nggubulu-na na kabihu Yahunda dàngu Mbanyamingu,

²⁴“Àmbu kaluluku-dunja da angu dedimi da tau Ihirailu. Beliwa! Nggàraya na mambàda njadi pawuku-nggu Nyungga-maya,” wàna. Ka pa-kikungu ndàba-danyaka la hupu liina i MIRI hi da-maràngga beli la umada.

²⁵Ba hanganji Ihirailu-yaka, pa-kapingatu-nanyaka na paraingu Hikimu la mapa-lindingu la Epuraïmu i Yerumbiamu, hi naluu ndàdiku lai nu. Tunaka nu hi nahili lelingu welingu lai nu hi na-pa-kapingatu-ya na paraingu Panuilu.

²⁶Tuna yia na pa-pangàda-na la etina, “Jàka pa-daingu luana la Yeruhali pawotu maraku la Umana i MIRI na rayatu hama tuna na pawunda-da lundu nàhu, napa dambuha belinya i Rehambiamu, na hanganji Yahunda, hi da-pameti-ka nyungga,” wàna.

²⁸Ba na-pangàda-nyaka nuna, pandoi-nanyaka dàmbu kahala hada hapi àmahu rara hi napanii la rayatu, “Oi banjaru Ihirailu! Toma-naka na mandaina bai lua pa-lumungu la Yeruhali. Nàhu, yiada-haka da paàlami da mambàda luhu karia-nggai welingu la Mehiru!” wànanja.

²⁹Hàla welingu la ma-dàmbuda da hapi àmahu rara nuda natuya na hau la Mbetilu paraïna i Yerumbiamu tàka na haui la Ndàngu.

³⁰Ka wunda-nanyaka njala na rayatu, ba nalua-du pa-lumungu la Mbetilu dàngu la Ndàngu.

³¹Na-pahadangu-mbu ngia pa-lumungu la pi - pinu palindi i Yerumbiamu, hi nawotu ratu - ratu welingu la kuru uma - kuru uma manda kabihu Lewi.

³²Tunaka nu hi na-bànjalu-ha da ratu la Mbetilu i Yerumbiamu ka dapawai ngaba lai nu, tàka nyuna wiki nawotu maraku la ha - hapi àmahu rara da pa-pandoi-na. Hàla hi na-kawuku-ya na tànggalu hakambulu lima wulangu walu ba lodu bokulu huri lumungu-ya la Ihirailu, hama tuna na lodu bokulu huri lumungu la Yahunda. La lodu nuna lua-nanyaka la Mbetilu i Yerumbiamu hi nawotu kameti maraku pambabu-nya na lodu bokulu huri lumungu pambàda kawuku-na.