Read Kambera 1 HANGANJI 13 Bible Online

1 HANGANJI 13 - Kambera bible

1 HANGANJI 13

¹La rehi nu ninya na haàtu wunangu la Yeruhali. Na-palewa-ya paraïna i MIRI palua la Mbetilu. Ba natàka-ka lai nu na wunangu talànga ndolaku-na la hangga ngia pawotu maraku ba nawotu maraku i Yerumbiamu.

²La hupu liina i MIRI, wara-nanyaka nuna na ngia pawotu maraku na wunangu, “Ha dumu ngia pawotu maraku, ha dumu ngia pawotu maraku! Tuna yia na panii-na i MIRI, ‘Napa nadedi-ya na haàtu anakeda pa-patamungu Yuhia la kuru umana i Ndautu. Napa la pinumu nyumu ha ngia pawotu maraku na-pameti-ha da ratu da ma-paloku-ha da ngia pa-lumungu kamàla - kamàla ala dàngu da mawotu kameti maraku la pinumu nyumu. Dàngu la pinumu nyumumbu napa natunu rii kawudu tau,’ ” wàna.

³Nahili panii pangalangu nuna na wunangu, “Napa na-tanyungguru yiana na ngia pawotu maraku, hi nambungu na aü la pinuna. Nuna-duyaka na tandana ba i MIRI ma-palewa-ka nyungga,” wàna.

⁴Ba narongu-yaka nuna na kareuku i Yerumbiamu, patuji-nanyaka nuna na wunangu hi na-kabàtingu, “Yàpaya na tau nina!” wàna. Tàka ailulu tuji-ma-ananya na limana i Yerumbiamu nda peku paütu beli-ananya.

⁵Hi jia tanyungguru biana nuna na ngia pawotu maraku hi nambungu la tana na aü la pinuna, hama tuna na pambàda nyurana nuna na wunangu la hupu liina i MIRI.

⁶Hi napanii-nya na wunangu i Yerumbiamu, “Pandulangu àru pa-hamayangga ndumanggu la MIRI Alamu. Karaiya na pa-aïngu-na ka na-pahàmu-ya na limanggu!” wànanya. Hamayangu-nanyaka na wunangu, hi nahàmu na limana na hanganji.

⁷Hàla panii-nanyaka na wunangu paraïna hanganji, “Mai talua pangangu la umanggu. Napa kuwua-nggau pawua juangu,” wànanya.

⁸Nahema na wunangu, “Jiapa-kai ka paradua welingu la pawulu-mu pawua-mungga, nda jia ngangu nda jia ngunungu-anggu dàngu nyumu umbu.

⁹Mbàda ngalangu-ngguka hupu liina i MIRI la panda ngangu panda ngunungu dàngu la panda lii beliya na ànda ba ku-pamaingu,” wànanya.

¹⁰Tuna nuduka ba nabeli na wunangu la hili hau àndaya.

¹¹La rehi nu ninya na haàtu wunangu kaweda na ma-ndàdiku la Mbetilu. Dapanii-nya paraï da anana rukuna na wunangu welingu la Yahunda. Dapanii-nya jàka nggàraya na pawunda-na la lodu nuna la Mbetilu, dàngu jàka nggàraya na paniina lai Hanganji Yerumbiamu.

¹²Hi na-paàrangu na wunangu kaweda, “Nggiya nalii ningu ba nabeli na wunangu welingu la Yahunda?” wàna. Ka peka-danyaka nu na ànda.

¹³Hàla hi naparà-hanja nyuda pawotu-nya hela na kalandai-na. Hàlaka nu na-kaliti-ya na kalandai-na hi nalaku

¹⁴payaulu-ya nuna na wunangu welingu la Yahunda, hi natoma-nya ba talànga mandapu-na la lumbu hareti pingi ai bokulu, “Jia-kauka nyumu wunangu welingu la Yahunda?” wàna ba na-paàra-nya. “Deningu-na,” wàna ba nahema nuna na tau.

¹⁵“Màla talua pangangu la umanggu,” wàna na wunangu kaweda.

¹⁶Tàka nahema na wunangu welingu la Yahunda, “Ndia-a! Nda peku kiku-anggunya na wànda-mungga ama palua la umamu. Nda jia ngangu nda jia ngunungu-mbunggu yiahu dàngu nyumu ama.

¹⁷Nadu ba mbàda ngalangu-ngguka hupu liina i MIRI la panda ngangu la panda ngunungu dàngu la panda lii beliya na ànda ba ku-pamaingu,” wànanya.

¹⁸Ka panii-naka na wunangu kaweda welingu la Mbetilu ba na-kambàliku-nya, “Wunangu-makai duku nyungga hama tuna nyumu. La hupu liina i MIRI-mbu mbàda paràha-nanggaka paraïna haàtu papalewa, pa-ngàdalu-kau nyumu dàngu pa-paloku-nggau pangangu la umanggu,” wànanya.

¹⁹Ka kikungu-nanyaka na wunangu welingu la Yahunda la umana na wunangu kaweda hi dangangu.

²⁰Ba talànga mandapu-da pangangu, napanii i MIRI la wunangu kaweda,

²¹hi na-kanyàngi-nya na wunangu welingu la Yahunda, “Napanii i MIRI ba ndau karadaku-nya Nyuna; ndau nunju-aya na papanii-nanggau nyumu.

²²Tàka hi beli bia-munyai dàngu hi ngangu ngunungu bia-munyai, tàka pa-namatu-nya na hupu liina nda peku ngangu-amu làti. Jia ba tuna, pa-pameti-kauka napa, dàngu nda patani-anggau la reti wikimu,” wànanya.

²³Ba dahàla-ka pangangu wotu-nanyaka hela na kalandai-na na wunangu welingu la Yahunda paraïna wunangu kaweda,

²⁴hi nalaku nuna na wunangu. La padua ngara-ngia na-karoruku-nya heu hinga, hi nameti ba na-njàkilu-ya. Ka tawàlahu-nanyaka la ànda na metina, tàka na kalandai na-ndolaku la lihina. Na hinga ndolaku-mbunanya lai nu.

²⁵Da tau da malii ningu lai nu daita-ya na metina dàngu na hinga lai nu. Hi dalua la Mbetilu hi dapanii-ya nu na paita-da.

²⁶Ba narongu-yaka nuna na wunangu kaweda, “Nda hili nggamu-aya nu, jia-mayaka na wunangu na manda karadaku la hupu liina i MIRI! Tuna nuduka hi na-paràha-nya na hinga i MIRI la panjàkilu-ya nyuna, hama tuna na pambàda panii hahana i MIRI,” wàna.

²⁷Tunaka nu panii-nanjaka da anana na wunangu kaweda, “Wotunya hela na kalandai-nggu,” wàna. Hàlaka nu kaliti-nanyaka na kalandai-na, hi nalaku.

²⁸Natàka-nya na metina nu na wunangu welingu la Yahunda ba jiapa bia-yapa la ànda, tàka na kalandai dàngu na hinga ninya la lihina. Nda nggi - nggiki-ananya na mameti dàngu na kalandai paraïna hinga.

²⁹Danda-nanyaka na mameti hi nawotu-ya la kalandai-na, hi nangàndi beliya la Mbetilu ka wundanya lii meti dàngu ka taninya.

³⁰Nuna na mameti pa-taningu-ya la reti mangu wikina nuna na wunangu kaweda, hi dahiinya dàngu da anana, “Ai na ana tau kika duna na angu dedinggu, ai na ana tau kika duna!” wàda.

³¹Tunaka nu panii-nanjaka da anana na wunangu kaweda, “Jàka kumeti nyungga taningga la reti yiana la lihina na wunangu.

³²Na papanii-naka la hupu liina i MIRI hanggangu la ngia pawotu maraku la Mbetilu dàngu hanggangu la mbuu ndàba da ngia pa-lumungu la parai - parainguna na Hamaria jiangu-ma ba danjadi,” wànanja.

³³Pa-daingu nda bihu-mana i Yerumbiamu pawàru-nya na huri luri akatu-na. Pa-nutakungu bia-nanya papindi ratu welingu la a - àtalu kuru uma, la pa-paloku-ha da ngia pawotu maraku pambàda pahada-na. Nggamu bia ma-mbuhangu, wotu-mananya panjadi ratu.

³⁴Na pawunda-na na ma-akatu na-patàkangu hanggàmaru nduma ana umbuku-na hi lupa dahunggu-ya na hadànjalu halawàla.