Read Kambera 1 HANGANJI 14 Bible Online

1 HANGANJI 14 - Kambera bible

1 HANGANJI 14

¹La rehi nu hidu-nanyaka na anana mini i Yerumbiamu na ma-tamungu Ambia.

²Panii-nanyaka na papaha-na i Yerumbiamu, “Kamomatu-wa palua la Hilu. La umana i Wunangu Ahia na mapanii àmangu ba hanganji Ihirailu-ka napa. Na nyuna upanjàda wikimu ka àmbu natanda-kau tau jàka nggamukau.

³Ungàndinya hakambulu roti, kanguta hakudu dàngu hau boti manggaluangu. Paàra-nya jàka nggi - nggikina i Ambia, na ananda, napa napanii-manggau duna,” wànanya.

⁴Ka lua-nanyaka la umana i Wunangu Ahia la Hilu na papaha-na i Yerumbiamu. Nda naita-apa i Ahia ba kaweda jàra-mana-nyaka.

⁵Na nyuna napanii-nya paraïna i MIRI ba nàmunya na papaha-na i Yerumbiamu pa-paàra-nya rukuna na anana na mahidu. Dàngu napeka-nya paraïna i MIRI jàka nggikina wàna bàdi i Ahia. Ba natàka-ka lai nu na papaha-na i Yerumbiamu, na-panjàda wikina beri hama tuna tau hawiangu-ya.

⁶Na nyuna ba narongu-yakaka na panggana la pindu paraïna i Ahia, napanii, “Tama na, kupii-manggau ba papaha-na i Yerumbiamu-kau. Àmbu njàda-dunya. Ningu lii langu handuka ndumamu nyumu.

⁷Beliwa papanii-nya i Yerumbiamu ba tuna yia na paniina i MIRI, na Ala Ihirailu, lai nyuna, ‘Mbàda leha-nggunggauka nyumu welingu la honga rayatu hi kutuu-kau ma-kawaha-ya na banjaru-nggu na Ihirailu.

⁸Mbàda wuanggu-nggaunyaka na pa-hanganji na pa-wànjiru-nggu welingu la ana umbuku-na i Ndautu. Tàka nyumu ndau hama-anya na atanggu i Ndautu. Nyuna duna na-tuturu langatàka-ma lai Nyungga dàngu na karadaku la hupu liinggu. Mbulungu da-patunju-nggu Nyungga-a duna da pa-wundana.

⁹Tàka nyumu dumu uwundaha da njala marihi bokulu welingu la pawunda-da nyuda da ma-pareta ba ndedipa nyumu. Udunjaku-ngga Nyungga hiu wudaya na ma-karaü bau pandoi marapu dàngu kahala hada welingu la àmahu la pa-marubuku-nja.

¹⁰Rukuna nuna napa ku-patàka-nja hanggàmaru da kuru umamu. Mbuu ndàba da mini la wàla wuamu jiapa ka nggàra-maya na wai ngabada papameti-ha. Napa ku-pamolu-nja da ihi umamu, hama tuna ba na-kangiri paili kangudu na tau.

¹¹Napa na ihi umamu na mameti la paraingu nangaanya ahu, tàka na mameti la hambeli paraingu napa nangaanya ma-hawurungu. Namuya, ba Nyungga yia MIRI mapanii!’ ” wàna.

¹²Na pangalangu-na napanii i Wunangu Ahia la papaha-na i Yerumbiamu, “Màla, beliwa nàhu! Napa bau tama-kinyaka na paraingu, meti-nanyaka nuna na anamu.

¹³Nggubulu-na na rayatu daringu langunya dàngu hi datani-nya. Didi meha-ma-aya nyuna na patani pa-hàmungu welingu la ihi umana i Yerumbiamu, ba didi-ma-aya nyuna na manggàna la etina i MIRI, na Ala Ihirailu.

¹⁴Napa i MIRI nawua-nya haàtu hanganji na Ihirailu na ma-kanjupu-ya na mandapu hanganji la ana umbuku-na i Yerumbiamu. Toma-mana-nyaka na loduna! Piti welingu nàhu

¹⁵napa i MIRI nahuku-nya na Ihirailu hi lupa nanggiulu-nggaulu hama tuna tibu hala la wai luku. Napa i MIRI na-butuhu-ya na banjaru Ihirailu welingu la tana hàmu yiana na pawua-nanja da boku la mangilu-da. Napa Nyuna napai - ihanja nyuda la hapapa Luku Epuràtu, nadu ba mbàda wuda-danyaka na ma-karaü lai Nyuna wàngu pandoi-daha da kahala hada marapu kawini Ahera.

¹⁶Napa na-dunjaku-nya na Ihirailu i MIRI rukuna ba mbàda njala-naka i Yerumbiamu dàngu ba na-pawiti-nya hi kiri njala-mbuna na Ihirailu,” wàna.

¹⁷Tunaka nu laku-nanyaka i Tiràhu na papaha-na i Yerumbiamu. Ba natama-kinyaka na umana, meti-nanyaka na anana.

¹⁸Naringu langunya rayatu Ihirailu hi taninya hama tuna na pambàda paniina i MIRI la ngaruna i Wunangu Ahia, na atana.

¹⁹Hawiangu na rukuna i Yerumbiamu, nu na pareta-na dàngu na pabera pairu ngàndina, mbàda tulihu-haka la mbuku Lii Ndai Hanganji Ihirailu.

²⁰Dua kambulu dàmbu ndauna mandaina ba na-pareta i Yerumbiamu ba hanganji-ya, tunaka nu meti-nanyaka hi taninya. Na anana na ma-tamungu Nandàpu nahilu-ya nyuna pa-hanganji.

²¹Ba nanjadi hanganji na anana i Halomu na ma-tamungu Rehambiamu, patu kambulu hau ndau-naka na ndaungu lurina. Hakambulu pihu mbua ndauna mandaina ba na-pareta la Yeruhali. Welingu la nggubulu Ihirailu na paraingu yiana mbàda leha-nanyaka i MIRI ba ngia pa-lumungu lai Nyunaya. Na inana i Rehambiamu jiaya i Naama welingu la banjaru Amungu.

²²Na banjaru Yahunda nanjala lai MIRI. Na pawunda-da narihi wudaya na ma-karaü lai MIRI welingu la mbuu ndàba pawunda-da da boku la mangilu-da.

²³La pi - pinu tandula la lu - lumbu ai bokulu, da-pahadangu ngia palumu - ngia pa-lumungu marapu, dàngu da-pamula andungu dàngu kahala hada - kahala hadana na marapu kawini Ahera ka marubuku-nya.

²⁴La pangia - pangia nuda nawunda lii pahunda ba pa-lumungu wàngu la marapu-ya. Jiapa da minimbu dapawai ngaba pa-pahunda. Da tau Yahunda dawunda ndàbaha da pawunda kajari da pawunda-da da banjaru pambàda wànggana i MIRI ba natama-nya tau Ihirailu nuna na tana.

²⁵La palima wàna na ndaungu pareta-na i Rehambiamu, na-kaluluku-nya na Yeruhali paraïna i Hihàku na hanganji Mehiru.

²⁶Naramba ndàbanja da banda pa-wilingu da maninja la Umana i MIRI dàngu la uma hanganji, dàngumbu da temingu àmahu rara pa-pandoi-na i Halomu.

²⁷Ka tunja hiluda na-pandoi temingu parunggu i Rehambiamu, hi na-pakata-nja la parawira ba hapajia-ha da mapawai ngaba padaiya na pindu bokulu la uma hanganji.

²⁸Handàka lua - handàka luana la Umana i MIRI na hanganji, dangàndi-ha nuda da temingu paraï da ba hapajia-ha da madai, hàlaka nu hi da-pabeli-nja la rowa ngia padaida.

²⁹Hawiangu da rukuna i Hanganji Rehambiamu pambàda tulihu-haka la mbuku Lii Ndai Hanganji Yahunda.

³⁰La rehi pareta-na i Rehambiamu, naingu pabera-mada i Rehambiamu dàngu i Yerumbiamu.

³¹Tunaka nu meti-nanyaka i Rehambiamu hi taninya la retida da hanganji la paraingu-na i Ndautu. I Ambiamu, na anana, nahilu-ya nyuna pa-hanganji.