Read Kambera 1 HANGANJI 15 Bible Online

1 HANGANJI 15 - Kambera bible

1 HANGANJI 15

¹La pa-hakambulu walu wàna na ndaungu pareta-nanya na Ihirailu i Yerumbiamu, nanjadi hanganji la Yahunda i Ambiamu

²dàngu tailu mbua ndaungu mandaina ba na-pareta la Yeruhali. Na inana jiaya i Maaka, anana i Ambihalomu.

³Nawunda manjala i Ambiamu hama tuna da pawunda-na na amana; nda weli eti-ana pa-tuturu lai MIRI Alana, hauya welingu lai Ndautu na pandua bokuna.

⁴Na nyuna, lumuna i Hanganji Ndautu, i MIRI, na Ala na palumu-na i Ndautu mbàda wua-nanyaka i Ambiamu ana mahilu-ya nyuna la pa-pareta la Yeruhali dàngu ka patoru-nya nuna na paraingu.

⁵Hi nawunda-ya nuna i MIRI, rukuna ba mbàda li-nanyaka i Ndautu na etina i MIRI, ndedima duna nalànja-nja da hupu liina i MIRI, hinggilu-na na ngerana Uria na tau Heti.

⁶Na pabera-da i Rehambiamu dàngu i Yerumbiamu na pa-pakiringu la rehina i Rehambiamu pangalangu-mana-nyapa la ngala pareta-na i Ambiamu.

⁷Hawiangu da rukuna i Ambiamu pambàda tulihu-haka la mbuku Lii Ndai Hanganji Yahunda.

⁸Ka meti-mbuna-nyaka i Ambiamu hi taninya la paraingu-na i Ndautu. I Aha na anana nanjadi hanganji hiluya nyuna.

⁹La padua kambulu wàna na ndaungu pareta-nanya na Ihirailu i Yerumbiamu, nanjadi hanganji la Yahunda i Aha.

¹⁰Patu kambulu hau ndauna mandaina ba na-pareta nyuna la Yeruhali. Na àpuna jiaya i Maaka anana i Ambihalomu.

¹¹Hama tuna i Ndautu na boku la mangilu-na, nyuna i Aha naliya na etina i MIRI.

¹²Na-payila ndàbanja da kawini pahunda da mapawai ngaba la ngia palumu - ngia palumungu-da marapu, dàngu na-podahu ndàbaha welingu la nggubulu tanana da marapu pa-pahada-da da hanganji ma-pareta wungangu.

¹³Na-pukalu-ya na àpuna, i Maaka welingu la mandapu-na ba tamu ràmbu inaya, ba mbàda pandoi-naka kahala hada marapu ma-kajari palumu wànya na Ahera, na marapu kawini kamboka. Napàpa-ya nuna na marapu paraïna i Aha hi natunu-ya la Lolangu Kindurungu.

¹⁴Jiapa-kai ka nda na-nyungguru ndàbaha da ngia palumu - ngia palumungu marapu paraïna i Aha, naingu tuturu-mana lai MIRI la ngala lurina.

¹⁵Nangàndi ndàbaha la Umana i MIRI da pambàda pa-hinggilu-na na amana pawotu lai MIRI, hamangui da maraku wikina nyuna da àmahu rara dàngu àmahu bara.

¹⁶La rehi pareta-na i Hanganji Aha welingu la Yahunda dàngu i Hanganji Mbaeha welingu la Ihirailu naingu pabera-mada pa-kadua-da nuda da hanganji.

¹⁷Naka-luluku-nya na Yahunda i Mbaeha dàngu na-pa-kapingatu-ya na paraingu Rama ka dimbaku-ya na ànda longga mai ba tama luhu la Yahunda.

¹⁸Tuna nuduka hi napiti ndàbaha i Hanganji Aha da àmahu bara dàngu da àmahu rara da mani-i-njapa la Uma Ala dàngu la uma hanganji hi na-pangàndi-nja la Ndamàhiku ndumana i Mbenihandàtu na hanganji Hiria, anana i Tàpurimungu, nu na umbuku-na i Hehiungu. Nuda da banda na-pangàndi-nja la limada da manda pirada da mapawai ngaba la uma hanganji, pa-kariangu paboru-nanya yiana na lii langu,

¹⁹“Màlawa ka ta-pa-kanduangu hama tuna na pambàda wundada da amanda nyuta. Karia-na yiana ku-pangàndi-nggau àmahu rara dàngu àmahu bara pawua jua-nggunggau, dàngu ku-kamahi-nggau kau botaya làti na palongga maingumi dàngu i Mbaeha na hanganji Ihirailu ka na-payila belinja da pamba panjurina welingu la ngaba tananggu nyungga,” wànanya.

²⁰Na-patunju-ya nuna i Mbenihandàtu, hi na-paràha-nja da parawira-na pa-kariangu pambada pa-kaluluku-nja da paraingu Ihirailu. Dabera-ya na Iyungu, na Ndàngu, na Ambilu-Mbetu-Maaka dàngu la Kinirutu la lihi Tàma Nggalilia dàngu nggubulu-na la ngaba tana Nàputali.

²¹Ba narongu-yaka nuna i Mbaeha, pànjangu-nanyaka pa-kapingatu-ya la Rama hi nalakuya la Tiràhu dàngu ka ana pànjangu kàdi pa-pabera.

²²Tunaka nu la hupu liina i Hanganji Aha, mbutana na tau nggubulu Yahunda nda ningu pa-hekangu, da-palaü-nja da watu dàngu da ai la Rama da pa-kapingatu wànanja nuna na paraingu i Mbaeha. Wànja nuda na-pakapi-ngatuya paraïna i Aha na paraingu Mihipa dàngu na Nggemba, na hau paraingu la ngaba tana Mbanyamingu.

²³Hawiangu da rukuna i Hanganji Aha, nu na kaborangu-na dàngu da paraingu pa-kapingatu-na, pambàda tulihu-haka la mbuku Lii Ndai Hanganji Yahunda. Na nyuna la rehi kaweda-na najàra i Aha ba dahidu da wihina.

²⁴Nameti hi taninya la reti hanganji la paraingu-na i Ndautu. I Yuhapàtu, na anana nanjadi hanganji hiluya nyuna.

²⁵La padàmbu wàna na ndaungu pareta-nanya na Yahunda i Hanganji Aha, nanjadi hanganji la Ihirailu i Nandàpu anana i Yerumbiamu dàngu dàmbu ndaungu mandaina ba na pareta.

²⁶Hama tuna na amana na ma-pareta wungangu, tuna numbu nyuna ba nawunda ma-akatu la hanggana i MIRI hi na-pawiti-nya hi kiri wunda-mbuna manjala na tau Ihirailu.

²⁷I Mbaeha anana i Ahia welingu la kabihu Ihakàru na-pahama kangunduhungu pandubaku-ya i Nandàpu, hi na-pameti-ya. La rehi nu i Nandàpu dàngu pamba tanatara-na talànga nggupulu-danya na paraingu Nggimbitungu la tana ngaba Pilitingu.

²⁸Nuna nu na-hàrangu la patailu wàna na ndaungu pareta-nanya na Yahunda i Hanganji Aha. Tuna nuduka hi hanganji Ihirailu-ya i Mbaeha hiluya i Nandàpu.

²⁹Nu ba hanganji-kiyaka i Mbaeha, pameti ndàba-nanjaka da ihi umana i Yerumbiamu. Nunjuya na pambàda paniina i MIRI la ngaru atana, i Wunangu Ahia welingu la Hilu, pa-pameti-ha mbutada da ihi umana i Yerumbiamu, nda ningua mapeka.

³⁰Nanjala i Yerumbiamu dàngu na-pawiti-nya hi kiri njala-mbuda da tau Ihirailu. Ba tuna nu nyuna i Yerumbiamu wuda-nanya na ma-karaü lai MIRI, na Ala palumu-na na tau Ihirailu.

³¹Hawiangu da rukuna i Nandàpu pambàda tulihu-haka la mbuku Lii Ndai Hanganji Ihirailu.

³²La rehi pareta-na i Hanganji Mbaeha welingu la Ihirailu, naingu-mana na pabera-da i Mbaeha dàngu i Hanganji Aha welingu la Yahunda.

³³La patailu wàna na ndaungu pareta-nanya na Yahunda i Hanganji Aha, nanjadi hanganji la nggubulu Ihirailu i Mbaeha anana Ahia. Dua kambulu patu mbua ndaungu mandaina ba na-pareta la Tiràhu.

³⁴Hama tuna i Hanganji Yerumbiamu na ma-pareta wungangu, tuna numbu i Mbaeha ba nanjala lai MIRI, hi na-pawiti-nya hi kiri wunda-mbuna manjala na tau Ihirailu.