Read Kambera 1 HANGANJI 16 Bible Online

1 HANGANJI 16 - Kambera bible

1 HANGANJI 16

¹Ka panii-nanyaka i MIRI lai Wunangu Yehu anana i Hanani, “Patàkanya i Mbaeha yiana na lii langunggu,

²‘Amangu nda nggàra-akau nyumu làti, tàka mbàda wotu-nggunggauka panjadi liku uru la banjaru-nggu na Ihirailu. Nàhu unjala hama tuna i Yerumbiamu dàngu hiu pawiti-nya panjala na banjaru-nggu, hiu wudaya na makaraü lai Nyungga.

³Rukuna nuna napa ku-pamolu-nggau dàngu ihi umamu hama tuna na pambàda wundanggu lai Yerumbiamu.

⁴Na ihi umamu na mameti la paraingu napa nangaanya ahu, tàka da mameti la hambeli paraingu napa nangaanja ma-hawurungu,’ wàmunya,” wàna.

⁵Na-patàka-nya nuna na lii languna i MIRI lai Mbaeha dàngu ihi umana paraïna i Wunangu Yehu rukuna ba nanjala i Mbaeha lai MIRI, nawuda-ya na ma-karaü lai MIRI i Mbaeha, nda mbulungu biana rukuna ba mbàda pameti ndàba-nahaka da ihi umana i Yerumbiamu. Hawiangu da rukuna i Mbaeha, dàngu na kaborangu-na pambàda tulihu-haka la mbuku Lii Ndai Hanganji Ihirailu. Nameti i Mbaeha hi taninya la Tiràhu. I Ela, na anana, nahilu-ya nyuna panjadi hanganji.

⁸La padua kambulu nomu wàna na ndaungu pareta-nanya na Yahunda i Hanganji Aha, nanjadi hanganji Ihirailu i Ela anana i Mbaeha. Dàmbu ndaungu mandaina ba na-pareta la Tiràhu.

⁹I Himuri, na haàtu parawira maliku urungu beri mandua pamba tanatara kareta, na-pahama kangunduhungu pa-ndubaku-ya i Ela. La hau na lodu la Tiràhu, nau - unu lundu maüku-na i Ela la umana i Àraha, na ngora kuru uma hanganji.

¹⁰Ka tama-nanyaka i Himuri hi na-pameti-ya i Ela, ba tunaka nu njadi-nanyaka hanganji hiluya i Ela. Nuna nu na-hàrangu la padua kambulu pihu wàna na ndaungu pareta-nanya na Yahunda i Hanganji Aha.

¹¹Ba hanganji-kiyaka i Himuri, pameti ndàba-nahaka da ihi umana i Mbaeha, hamangui da kalembi-na dàngu da angu palongga-mainguda da ihi umana i Mbaeha nda ningumbu mamara.

¹²Nunjuya na papanii-na i MIRI lai Mbaeha la ngaruna i Wunangu Yehu, pa-pameti mbuta-maha da ihi umana i Mbaeha.

¹³I Mbaeha dàngu i Ela, na anana, da-hamayangu marapu dàngu da-pawitinya hi kiri wundana manjala na tau Ihirailu. Rukuna nuna, wuda-danya na ma-karaü lai MIRI, na Ala palumu-na na tau Ihirailu.

¹⁴Hawiangu da rukuna i Ela pambàda tulihu-haka la mbuku Lii Ndai Hanganji Ihirailu.

¹⁵La padua kambulu pihu wàna na ndaungu pareta-nanya na Yahunda i Hanganji Aha, nanjadi hanganji la Ihirailu i Himuri dàngu pihu mbua lodu mandaina ba na-pareta la Tiràhu. Da tanatara Ihirailu la rehi nu nggupulu-danya la Nggimbitungu na paraingu tau Pilitingu.

¹⁶Ba darongu-yaka ba mbàda pahama kangunduhungu-naka i Himuri pa-ndubaku-ya na hanganji dàngu ba mbàda pameti-nanyaka, la lodu nunama la kotaku maü terada, nyuda mbuu ndàbada ba dawotu-ya pa-hanganji Ihirailu i Omuri, na liku uru pabera-da.

¹⁷Tunaka nu yilangu-danyaka welingu la Nggimbitungu i Omuri dàngu pamba tanatara-na hi dalaku panggupulu-ya la Tiràhu.

¹⁸Ba naita-yaka i Himuri ba pawàhi-yaka na paraingu, tama-nanyaka la uma hanganji hi nahulu-ya pa-karia-nya na wiki-mbuna, ka metina-nyaka.

¹⁹Nuna nu hi nanjadi, rukuna ba nanjala-mbuka i Himuri lai MIRI hama tuna i Yerumbiamu, dàngu na-pawiti-nya hi kiri njala-mbuna na banjaru Ihirailu.

²⁰Hawiangu da rukuna i Himuri, dàngu na-pahama kangunduhungu-na la pa-kaleka hama tuna na pambàda wukuna, pambàda tulihu-haka la mbuku Lii Ndai Hanganji Ihirailu.

²¹Ka kawita-nanyaka na banjaru Ihirailu rukuna ba ningu ma-rinjungu ka hanganji-ya i Tipuni anana i Ngginàtu, tàka ningumai ma-rinjungu ka hanganji-ya i Omuri.

²²La hupu njàpuna datalu da mambuha-nya i Omuri; nameti i Tipuni hi hanganji-ya i Omuri.

²³Nuna nu nanjadi la patailu kambulu hau wàna na ndaungu pareta-nanya na Yahunda i Hanganji Aha. Hakambulu dàmbu ndauna mandaina na pareta-nanya na Ihirailu ba hanganji-ya i Omuri. La nomu mbua ndaungu ma-mangilu, na-pareta la Tiràhu.

²⁴Tàka la malamiri-na nakeiya na hau palindi 6000 àmahu bara wilina welingu la haàtu ma-tamungu Hemiru. Tura-nanyaka hau paraingu la palindi nuna i Omuri hi na-patamu-nya Hamaria, kikunya na tamuna i Hemiru na mamangu-nya la mangilu nuna na palindi.

²⁵I Omuri nawunda-ha da njala marihi bokulu welingu la pawunda-da da hanganji ma-mangilu-nya.

²⁶Nanjala i Omuri hama tuna i Yerumbiamu dàngu na pawiti-nya hi kiri njala-mbuna na tau Ihirailu dàngu hi dalumungu marapu. Rukuna nuna wuda-danya na ma-karaü lai MIRI, na Ala na palumu-mana bàdi na tau Ihirailu.

²⁷Hawiangu da rukuna i Omuri, dàngu mbuu ndàba da pambàda wundana pambàda tulihu-haka la mbuku Lii Ndai Hanganji Ihirailu.

²⁸Ba nameti-ka dàngu ba tani-nyaka i Omuri la Hamaria, nanjadi hanganji i Ahàpu, na anana, hiluya nyuna.

²⁹La patailu kambulu walu wàna na ndaungu pareta-nanya na Yahunda i Hanganji Aha, nanjadi hanganji la Ihirailu i Ahàpu anana i Omuri dàngu dua kambulu dàmbu ndaungu mandaina ba na-pareta la Hamaria.

³⁰Darihi bokulu-pa da njala pawunda-na nyuna hanggangu lai MIRI welingu la hanganji - hanganji ma-mangilu-nya.

³¹Ndedi dira-manapa nyuna ba naluri la manjala hama tuna i Yerumbiamu, na-kanoma-mbu-yaipa i Ihembilu anana i Hanganji Etumbaàlu welingu la Hindungu, hàla hi na-lumungu la Mbaàlu.

³²Na-pahadangu uma lumungu la Hamaria ndumana na Mbaàlu, dàngu daa la uma lumungu na-pandoi hau ngia pawotu maraku la marapu nuna.

³³Na-pandoi-mbu hau kahala hadana na marapu kawini Ahera. Darihi bokulu-pa da njala pawunda-na nyuna welingu la pawunda-da mbuu ndàbada da hanganji Ihirailu da ma-pareta mangilu-nya nyuna. Rukuna nuna wuda-nanya na ma-karaü lai MIRI, na Ala palumu-mana bàdi na tau Ihirailu.

³⁴La rehi pareta-na i Ahàpu, pa-pahada belingu-ya na paraingu Yeriku paraïna i Hiyàlu tau Mbetilu. Na nyuna hama tuna na pambàda nyurana i MIRI la ngaruna i Yuhua anana i Nungu, na-yàmihu-ha da tau madua da anana i Hiyàlu: Nameti i Ambiràmu na ma-maaya dehi la rehi tunanya latana na paraingu i Hiyàlu, tàka i Henggupu na mamaeri hupu nameti ba natuha da pindu bokulu-na na paraingu i Hiyàlu.