Read Kambera 1 HANGANJI 17 Bible Online

1 HANGANJI 17 - Kambera bible

1 HANGANJI 17

¹La hau na lodu namai lai Hanganji Ahàpu na haàtu wunangu welingu la Timbihu la Nggiliatu na ma-tamungu Elia hi napanii, “Parongu-na i MIRI Ala maluri, na palumu tau Ihirailu dàngu na palumu-nggu nyungga, kupanii-nggau umbu ba nda jia ningua ana wai hamburungu jàka ndia ana urangu la dàmbu jàka ndia tailu mbua ndaungu na manàmu-nya, hinggilu-na la hupu liinggu,” wànanya.

²Tunaka nu napanii-nya i Elia i MIRI,

³“Yilangu-wa welingu la pangia yiana, lakuwa la pahunga lodu la hapapa Luku Yorundangu dàngu kawiningu-wa lai nu la lihi ana Luku Kiritu.

⁴Peku unungu-mu welingu la ana luku nuna, dàngu peku ngangumu pangangu pangàndi-da da ngga-ngga la hupu liinggu Nyungga,” wànanya.

⁵Nanunju-ya na hupu liina i MIRI i Elia, hi nalaku pa-ndàdiku la ana Luku Kiritu.

⁶Na-unungu wai welingu la ana luku nuna, nangangu roti dàngu tolungu pangàndi ngga-ngga hau mbaru hau malingu.

⁷Ndedi nggi tuna mandaina, mihi-mbuna-nyaka nuna na ana luku ba nda ningu urangu.

⁸Tunaka nu napanii-nya i Elia i MIRI,

⁹“Ulaku-maka bàdi nàhu la paraingu Hàrapàtu la lihina la Hindungu kau ndàdiku lai nu. Mbàda paràha-nggunyaka na haàtu kawini meti lei lai nu ka nawua-nggau pangangu,” wànanya.

¹⁰Ka laku-nanyaka la Hàrapàtu i Elia. Ba natàka-ka nu la pindu paraingu, naita-ya na haàtu kawini meti lei ba talànga ohuna ai pa-mutungu. Hi napanii-nya nuna na kawini i Elia, “Màla àru làti ina kau lua papiti-nda wai ana hakudu,” wànanya.

¹¹Ba talànga hanàhu-naka palua papiti wai nuna na kawini, “Dàngu màla àru làti ina kau ngàndi-mbunda ana roti hakudu,” wànanya.

¹²Nahema na kawini, “Parongu-na i MIRI maluri, nu na Ala palumu-mu ama, kuharangu ba nda ningu rotinggu. Ana haupu-ana na kanguta taringgu na maninya la maku, dàngu ana hakiri-ana na mina haitungu la boti. Hi kuohu ni ai pa-mutungu, ka manahu-ha nuda da ma-ana hakudu-da, ka ma-ana nganguki dàngu na ananggu wànggu làti. Njàpu wàngu-mada-nyaka nuda da pangaama; hàlaka nu patiangu-manya meti-ma-aka,” wàna.

¹³“Ndii, wàmuka, ina!” wànanya paraïna i Elia, “Pandoi bia duna pangangu ndumamu nyumu dàngu na anamu. Na nyuna ba ndedipa pandoi mangilu kàdingga nyungga ana hau roti kudu welingu la kanguta dàngu na lonahu nuna, kau ngàndi-ngganya nàmu.

¹⁴Nadu, napanii i MIRI, na Ala palumu tau Ihirailu, ba ningu mànuma napa kanguta ihina nuna na maku, dàngu ningu mànuma napa lonahu ihina nuna na boti lundu la rehi papuru-nanya urangu na tana i MIRI,” wànanya.

¹⁵Tunaka nu laku-nanyaka na kawini meti lei la panunju-ya na papanii-nanya paraïna i Elia. Ka ningu-duka pangangu pa-pahàmu ndumada nyuda pa-katailu-da tuda nda pira mbua lodu bia mandaina.

¹⁶Dàngu hama tuna na pambàda paniina i MIRI la ngaruna i Elia, ningu mànu bia kanguta ihina nuna na maku, dàngu ningu mànu bia lonahu ihina nuna na boti.

¹⁷Ndedi nggi tuna mandaina hidu-nanyaka na anana nuna na kawini meti lei. Parukangu pamandai parukangu-mananya pambotu na hiduna hi lundu nameti.

¹⁸Ka panii-nanyaka na kawini meti lei lai Elia, “Ou atana i Ala, ka nggikina hi jia mai biamu yiahu ni ama, hi kiri pangàda-nanja da njalanggu i Ala hi lupa nameti na ananggu?” wàna.

¹⁹Nahema i Elia, “Kamangu pawua-ngganya nàmu na anamu,” wànanya. Ba panii tunaka nu kei-nanyaka nuna na anakeda mini i Elia welingu la inana, hi nangàndi-ya hu dita la kurungu pangia-na i Elia. Na-pakatuda-ya na anakeda i Elia la ngia pakatuda,

²⁰hi na-hamaya pa-wàndikungu, “Ou MIRI, Alanggu, ka nggikina MIRI hiu patàka-nya yiana na hanggàmaru la kawini meti lei yiana? Mbàda wua-nanggaka ngia patodu, tàka nàhu MIRI upameti-ya na anana!” wàna.

²¹Tunaka nu na patailu wundangu pa-panggubu i Elia la pinuna nuna na anakeda, dàngu hamayangu-na, “Ou MIRI, Alanggu, paluri àru-kiya yiana na anakeda!” wàna.

²²I MIRI natingi-ya na hamayangu-na i Elia; ngeri kayeku-nanyaka nuna na anakeda hi naluri beli.

²³Hàla karia-nanyaka i Elia na anakeda la inana hi napanii, “Ina, yiana na anamu ina! Naluri-ka!” wàna.

²⁴Nahema na kawini meti lei, “Nàhu piinggunyaka ba atana i Alakau nyumu ama dàngu deningu-mana ba ma-welingu lai MIRI-ya na papanii-mu nyumu, ama!” wàna.