Read Kambera 1 HANGANJI 18 Bible Online

1 HANGANJI 18 - Kambera bible

1 HANGANJI 18

¹Palàngangu-ka ndedi pira mandaina, la patailu wàna na ndau wandu nda hapàda, napanii i MIRI lai Elia, “Luawa la hanggana i Hanganji Ahàpu, napa ku-papurungu urangu,” wànanya.

²Ka laku-nanyaka i Elia. La rehi nu pa-dàkangu-mananya na rimbangu la Hamaria.

³Tuna nuduka hi napaau-nya i Ombanja pamai la hanggana paraïna i Ahàpu. (I Ombanja ngora kuru uma hanganji-ya. Nyuna haàtu tau manundu-ya maweli eti langatàkangu palumu-nya i MIRI.

⁴Ba na-pameti-ha da wunangu-na i MIRI i Ihembilu, nyuna i Ombanja nandula-ha da 100 wunangu ba na-kawini-nja la liangu — tau 50 la hau liangu — dàngu nawua-nja pangangu pa-ngunungu.)

⁵Napanii i Ahàpu lai Ombanja, “Màla ka tanjada[15] ndàbanya yiana na tana ka tahimbu mata wai jàka ndia luku; raï hi ta-hunggungu bia rumba ndumada da njara dàngu da mbanggalu-nda, ka àmbu heumbu bandanda pa-pameti-nda,” wànanya.

⁶Ba dahàla-ka pa-pabiwa-nya na ngaba tana panjanga ba wàda, laku-danyaka. I Ahàpu la hau tubaya, tàka i Ombanja la hili hau tubaya.

⁷La padua ngarangia da-pajàngapu i Ombanja dàngu i Elia. Ba natanda-yaka ba jiaya i Elia, marubuku-nanyaka i Ombanja patembi-ya nyuna hi na-paàrangu, “Jiadukau yia ama Elia?” wànanya.

⁸“Deningu-mana, jia-makaka Elia,” wàna ba nahema i Elia. “Nàhu luawa papanii-nya na hanganji na mirimu, ba ningga yiahu nyungga,” wànanya.

⁹Nahema i Ombanja, “Nggàraya na njalanggu ama hiu panàngga-ngga la hanggàmaru ka na-pametika i Ahàpu?

¹⁰Parongu-na i MIRI maluri na Ala na palumu-mu nyumu ama, kupeka-nggau ba mbàda paràha-nanggaka nyungga na hanganji pahimbu-kau nyumu ama la nggi - nggini. Nda nii-anya yiahu jàka wàna na ma-pareta la hau tana, na-karuhi-ya na ma-pareta la tana nuna paraïna i Ahàpu ka na-harangu ba nda paita langatàka-akau lai nu.

¹¹Tàka nàhu lua lai nyuna papanii-nya ba ningga yiahu, wàmu-nggaika ama?

¹²Jàka taliu-ngguka weli yiahungu, jiangu-ma nangàndi-kau Ngahuna i MIRI la hau pangia panda piinggu, ama! Tàka jàka kupanii-nya i Ahàpu ba ninggau yiahu, hàla hi nda natoma-anggau, jiangu-maka duku na-pameti-ka napa. Kau pinya ama, weli pa-anakedangu-nggu ba kulumu weli etinya i MIRI!

¹³Ka ndedi urongua dumu ama la rehi pameti-naha da wunangu-na i MIRI i Ihembilu, ba ku-kawini-nja la liangu da tau 100 welingu lai nyuda — tau lima kambulu-ya la hau liangu — dàngu ba kuwua-nja pangangu pa-ngunungu?

¹⁴Jia ba tuna nggiki hamana hi paràha bia-mungga palua papanii-nya na hanganji ba ninggau yiahu ni ama? Jiangu-maka napa na-pameti-ka duku!” wàna.

¹⁵Nahema i Elia, “Parongu-na i MIRI Mahupu Mbiha na palumu-nggu, kuparàndingu ba lua wiki-manggu la lodu nàhu la hanganji,” wàna.

¹⁶Ka lua-nanyaka i Ombanja pa-patàka-nya na hanganji, hi nalua i Ahàpu pa-hàmburu-ya i Elia.

¹⁷Ba naita-yaka i Elia paraïna i Ahàpu, wara-nanyaka i Ahàpu, “Aiha, yiana biaya na ma-pa-kunggalungu la Ihirailu!” wàna.

¹⁸“Nda nyungga-a ma-pakunggalu,” wàna ba nahema i Elia, “nyumu wikima dumu Tamu Umbu, nyumu dàngu kuru umamu. Bau wàngu pa-hamaya-nja da marapu Mbaàlu, pangga-munja Tamu Umbu da hupu liina i MIRI.

¹⁹Wuangu-wa nàhu pareta ka na-pahàmburu dàngga nyungga nggubulu-na na rayatu Ihirailu la Palindi Kàramilu. Karia-mbunja da mapatu ngahu lima kambulu-da da wunangu Mbaàlu dàngu da mapatu ngahuda da wunangu marapu kawini Ahera da pawua-na wunda i Ràmbu Ihembilu!” wàna.

²⁰Ka dundilu-nahaka la palindi Kàramilu nggubulu-na na rayatu dàngu da wunangu Mbaàlu paraïna i Ahàpu.

²¹Hàla hi nandàharu-nya na rayatu paraïna i Elia hi napanii, “Lundu pirangu-mapa dimi nyimi bai pa-daingu pandara ndua? Jàka jiaya i MIRI na Ala, lumu-nyawa i MIRI! Jàka jiaya i Mbaàlu na Ala, lumu-nyawa na Mbaàlu!” wàna. Pàdi wàna bia na rayatu na ma-pauhi lai nu.

²²Tunaka nu panii-nanyaka i Elia, “Welingu la hongada da wunangu-na i MIRI, didi-meha-ma-a-kaka nyungga mapeka, tàka yiada yia ninja ba patu ngahu lima kambulu-ha da wunangu Mbaàlu.

²³Ngàndiwa nàmu nàhu dua ngiu hapi mini; paràha-nja da wunangu Mbaàlu ka dapiti-ya na heu parupu-ya, hàlaka nu ka dala - làtaku-ya ka da-bànjalu-ya la pinu ai pa-mutungu, àmbu da-padukulu-dunya epi lai nu. Tàka na hapi heui paloku tunggunya numai duku. Napa kurupu-ya hi kula - làtaku-ya ka ku-bànjalu-ya la pinu ai pa-mutungu. Tàka nyungga nda ku-padukulu-mbunya epi lai nu.

²⁴Màtawa da wunangu Mbaàlu ka da-hamayangu la marapu-da, tàka nyunggai duku ka ku-hamayangu lai MIRI. Na mahema wàngu pa-ngàndingu-na epi, jiaya na Ala,” wàna. Nggubulu-na na rayatu dahema pa-kodungu, “Jia hàmuya!” wàda.

²⁵Hi napanii-nja da wunangu Mbaàlu i Elia, “Pindi mangilu-wa nyimi hapi bai dangu kai paloku-ya. Hamayangu-wa la alami, na nyuna àmbi paketi-nja epi da ai,” wànanja.

²⁶Ka pindi-danyaka heu na hapi hi da-paloku-ya. Tunaka nu hamayangu-danyaka la Mbaàlu lundu tidungu-na na lodu ba dawàngu pakala - ladaku, “Hema-kamawa, ou Mbaàlu!” wàda. Nu ba tuda nu nutakungu-madanya parenja winggiru-nya na ngia pawotu maraku pambàda pandoi-da. Tàka nda ana ningua hemana.

²⁷La tidu lodu pakiringu-nanyaka i Elia papanii hangengi-nja, “Hamaya pa-kodungu-ki! Hi pa-alangu-maduya, ma ndia? Talànga wanguna ningu pa-kanandi-na ihu, jàka ndia hi lua-nanya pa-hambelingu ihu. Talànga wanguna ningu ngia palua-na ihu. Jàka ndia hi katuda bia-nanyapa, tàka lupa-maka bàdi ibenginya!” wànanja.

²⁸Tuna nuduka hi darihi pa-kodungu ba da-hamayangu nuda da wunangu. Dàngu hama tuna na pakàli wàda daka - kàri wànja hapanda dàngu nimbu da ihida hi lupa njànjaru wai riaha.

²⁹Tuda nu mànuma lundu maringu lodu hama tuna tau pa-huruku-ha; tàka nda ningua mahema nda ningua ma-ihili-nja.

³⁰Hi napanii-nya nggubulu-na na rayatu i Elia, “Ndàharungu nàmu!” wànanja. Ka langgungguru winggiru-danyaka. Tunaka nu pahàmu-nanyaka na ngia pawotu maraku lai MIRI na mambàda ta-nyungguru i Elia.

³¹Napiti hakambulu dàmbu watu, hau watu nduma hau kabihu welingu la hakambulu dàmbu kabihu da ana umbuku-da da anana i Yakupu, da tau da pambàda patamu-na Ihirailu i MIRI.

³²Jiaha da watu nudaka da pawàngu ba pahada belinya na ngia pawotu maraku paraïna i Elia ka lumunya i MIRI. La winggiru-na nuna na ngia pawotu maraku naàki-nya londa maràka bokulu-na hi peku paihi-nya ràkangu hakambulu lima litaru wai.

³³Na-panunggulungu ai pa-mutungu la ngia pawotu maraku. Hàla hi nala - làtaku-ya na hapi heu hi natuya la pinu ai pa-mutungu. Tunaka nu hi napanii, “Paihingu wai patu mbua wurungu pinu-maha, hàla buriya na wai la kameti maraku dàngu da aina,” wàna. Ba da-pahàra-nyaka nu na napanii,

³⁴“Hili handàkangu-ki,” wàna ba napanii, hi danunju-ya; “Hili handàkangu-ki,” wàna i Elia, hi dahili nunjuya.

³⁵Ka njànjaru-nanyaka na wai la winggiru-na na ngia pawotu maraku hi lupa nambinu-mbunya wai na londa waina.

³⁶Ba jia-yaka na rehi wotu maraku la malingu, ndàharungu-nanyaka la ngia pawotu maraku i Elia hi na-hamayangu, “Ou MIRI, Ala palumu-na i Ambarahàmu, i Ihàku dàngu i Yakupu, pa-jiliku àru-kinyawa nàhu ba jiakau Nyumu alana la Ihirailu, dàngu ba ata-mungga nyungga; dàngumbu ba hupu liimu Nyumuya mbuu ndàbada yiada da pawunda-nggu.

³⁷Hema-kawa, dou MIRI! Hema-kawa ka napiinya rayatu ba Alakau Nyumu, MIRI, dàngu ba Nyumu ma-pawiti-nja nyuda pabeli lai Nyumu,” wàna.

³⁸Hàlaka nu pangàndingu-nanyaka epi welingu la awangu i MIRI matunu pakehi-ya na kameti maraku dàngu da ai pa-mutungu-na, da watuna dàngu tanana hi na-pamihi ndàbaya na wai la londa wai.

³⁹Ba naita-yaka rayatu, marubuku-danyaka la tana hi dapanii, “I MIRI jiaya na Ala! Ala langatàka-ya i MIRI!” wàda.

⁴⁰Ka panii-nanyaka i Elia, “Yàpaha nida da wunangu Mbaàlu! àmbu jia ningudu haàtu mamara!” wàna. Ka lu yàpa-nahaka tau mbuu ndàbada nuda da wunangu Mbaàlu, hàla hi nangàndi-ha la Luku Kihungu paraïna i Elia, hi na-pameti ndàbaha lai nu.

⁴¹Tunaka nu panii-nanyaka lai Hanganji Ahàpu i Elia, “Màlawa nàhu kau lua pangangu umbu, nadu ba urangu-nanyaka taï; parongu-yaka na kawoku-na,” wàna.

⁴²Hi nalua pangangu i Ahàpu, tàka i Elia naheiya la Palindi Kàramilu. Lai nu marubuku-nanyaka la tana, la njonga kambàku-nanya na matana.

⁴³Napanii-nya na atana, “Heikau la pinu kau tàngaru hanggangu la tehiku,” wànanya. Hei-nanyaka nu na ata, hàla nabeli hi napanii, “Nda nggàra-a paita-nggu,” wàna. Na-papihu wundangu i Elia pa-paràha-nya nuna na ata pahei pa-tàngaru.

⁴⁴La papihu wundangu wàna nabeli papanii nuna na ata, “Ku-itangu karumangu hama mbàlaru tàbalu lima, na manàmu-nya welingu la tuba tehiku,” wàna. Ka panii-nanyaka na atana i Elia, “Lua lai Hanganji Ahàpu, paniinya ka nahei la kareta-na ba ndedi na pabeta-nya urangu,” wàna.

⁴⁵Ndedi mbàdiku-na pa-nggumungu-nanyaka na awangu, dàngu na-hapuputu na ngilu mbangatu hi na-pakiringu papuru na ura kawalu. Hei-nanyaka kareta-na i Ahàpu hi nabeli la Yihireyilu.

⁴⁶La rehi nu nangalangu àtalu welingu lai MIRI i Elia. Na làpitu padita-ya na kalembi malaina hi naboru-nya la bànggi-na hi na-nyanyaru pa-mangilu-nya i Ahàpu nàhu la ànda lundu tàka la pindu bokulu la Yihireyilu.