Read Kambera 1 HANGANJI 19 Bible Online

1 HANGANJI 19 - Kambera bible

1 HANGANJI 19

¹Napanii-nya i Ihembilu na papaha-na, i Ahàpu, rukuna mbuu ndàba da pawunda-na i Elia, dàngumbu nggiki hama pameti-naha da wunangu Mbaàlu i Elia.

²Ka pangàndi-nanyaka yiana na lii langu i Ihembilu lai Elia, “Màla àruki ka dahuku ndàbangga da marapu, jiapa ka da-pameti-mbuka, jàka nda ku-palua-nggau lima la rehi tuna nàhu la lodu haromu hama tuna bau palua-nja lima da wunangu Mbaàlu,” wànanya.

³Ka mangàdatu-nanyaka i Elia, hi napalai ka àmbu pameti-ya. Laku-nanyaka dàngu na atana la Mbiruhemba la Yahunda. Na-bànjalu-ya lai nu na atana,

⁴hi nalaku hau lodu la wihi la maràda telangu, hi na-pànjangu la lumbu hareti pingi ai ma-marumbingu. Mandapu-nanyaka lai nu dàngu rinju-nanya na metima-a. “Nda ku-torungu-apa, MIRI,” wàna lai MIRI, “piti biaya na luringgu, nda kurihi-a pahàmu welingu la boku la mangilu-nggu!” wàna.

⁵Hàla tanggilungu-nanyaka nu la lumbu ai hi na-katuda. Hi jia bengi bia-nanya paraï haàtu papalewa hi napanii-nya, “Hadangu kau ngangu Elia!” wànanya.

⁶Na-tàngaru la winggiru-na i Elia hi naita-ya hauna na roti dàngu na kadihi maningu waingu la lihi katiku-na. Ngangu ngunungu-nanyaka hi nahili ta-nggilungu.

⁷La pandua wundangu wàna nahili mai na papalewa pabengi-nya hi napanii-nya, “Hadangu kau ngangu Elia, ka peku torungu-mu palaku marau,” wànanya.

⁸Ka hadangu-nanyaka i Elia, hi nangangu hi na-ngunungu, hi na-àtalu dàngu hi peku lakuna patu kambulu lodu mandaina la Palindi Hinai,[16] na ngia pa-pawuwangu-na wikina i MIRI.

⁹Todu-nanyaka lai nu i Elia la hau liangu. Hi napanii-nya paraïna i MIRi, “Nggàra ulamu yiahu Elia?” wànanya.

¹⁰Nahema i Elia, “Ou MIRI, Ala Mahupu Mbiha, naingu ràma-manggu duku ndumamu Nyumu-ma-a. Tàka na banjaru Ihirailu dapangga-yaka na pa-njanjingu-da dàngu Nyumu. Mbàda nyungguru-dahaka da ngia pawotu maraku mangumu dàngu da-pameti-ha da wunangu-mu. Didi meha-ma-akaka nyungga mapeka, tàka nàhu, ka pameti-ya nyuna wàda-nggaka!” wàna.

¹¹“Luhukau hiana welingu la liangu,” wànanya paraïna i MIRI, “kau ndolaku la hangganggu Nyungga la pinu palindi,” wànanya. Hàla, li-nanyaka lai nu i MIRI pa-kariangu ngilu madira mbangatu-ya hi dakawita da tandula dàngu dambera da palindi watu, tàka nda na-pa-lohangu-a wikina i MIRI nu la ngilu. Ba na-mandangu-ka na ngilu, tungu-nanyaka na upungu, tàka nda napa-lohangu-a wikina i MIRI nu la upungu.

¹²Hàlaka nu tàka-nanyaka na epi, tàka nda nianya i MIRI nu la epi. Hàlaka nu hi ronguya na talia lii kamemihu ma-manaüru.

¹³Ba narongu-yaka nu na talia lii i Elia, pa-lumburu wàna-nyaka kalembi malaina na matana hi naluhu pa-ndolaku la ngaru liangu. Napanii dànya hau talia lii, “Nggàra ulamu yiahu Elia?” wànanya.

¹⁴Nahema i Elia, “MIRI, Ala Mahupu Mbiha, naingu ràma-manggu duku ndumamu Nyumu-ma-a. Tàka na banjaru Ihirailu dapangga-yaka na pa-njanjingu-da dàngu Nyumu. Mbàda nyungguru-dahaka da ngia pawotu maraku mangumu dàngu da-pameti-haka da wunangu-mu. Didi-meha-ma-akaka nyungga mapeka, tàka nàhu ka pameti-ya nyuna, wàda-nggaka,” wàna.

¹⁵Napanii i MIRI, “Beliwa la maràda telangu lihina la Ndamàhiku. Hàla luawa la paraingu kau burinya lonahu i Hahailu ka tandana ba wotuya la pa-hanganji Hiria.

¹⁶Tumunya numbu i Yehu anana i Nimihi ka hanganji Ihirailu-ya, dàngu i Eliha anana i Hapàtu welingu la Ambilu-Mahola ka wunangu-ya hilukau nyumu.

¹⁷Nggamu biaya na panda pameti-na i Hahailu, napa na-pameti-ya paraïna i Yehu, tàka da mamara welingu lai Yehu napa na-pameti-ha paraïna i Eliha.

¹⁸Na nyuna napa ku-pamara-ha da tau 7.000 la Ihirailu, nu da tau da ma-padaingu pa-tuturu lai Nyungga dàngu da mandedi handàkangu pa-marubukungu kahala hada Mbaàlu jàka ndia pa-puduku-ya,” wànanya.

¹⁹Ka laku-nanyaka i Elia hi natoma-nya i Eliha ba talànga lukuna. Hakambulu dua mawada da hapi la magilu-na tàka nyuna wiki i Eliha naluku wànja da hamawa hapi da ma-malamiri dehi. Ba nàhu-nyaka la lihina i Eliha i Elia, àli-nanyaka na kalembi malaina i Elia hi na-palàmbaru-nya la kunduna i Eliha.

²⁰Ka màta-nanjaka da hapina i Eliha hi na-nyanyaru pandutu-ya i Elia. Ba natoma-nyaka panii-nanyaka i Eliha, “Puli kàdingga làti ka ku-pabeli pàkunja langu da ma-kaweda, ka kumangu patundu-nggau, ama,” wànanya. Nahema i Elia, “Tu biana duna. Nda kuhiri-anggau nyumu,”[17] wànanya.

²¹Ka beli-nanyaka la wokana i Eliha hi narupu-ha da hapina. Na ai lukuna jiaya na ai pa-mutungu pa-manahu wànja da tolu hapi. Tunaka nu paberi-nanjaka tolungu da tauna, hi dangangu. Hàlaka nu laku-nanyaka i Eliha patundu-nya i Elia hi nanjadi angu pa-mbapangu-na.