Read Kambera 1 HANGANJI 2 Bible Online

1 HANGANJI 2 - Kambera bible

1 HANGANJI 2

¹Ba na-mareni-ka na kawuku lurina, paau-nanyaka i Halomu na anana mini paraïna i Ndautu hi na-pamua-nya. Napanii i Ndautu,

²“Rehi-nanyaka na metinggu. Pamàndu-manya na etimu dàngu màtawa kau tara uramu.

³Wunda-hawa jàka nggàraha da hupu liina i MIRI Alamu lai nyumu. Nunju-hawa da ukuna dàngu da hupu liina da pa-tulihu la Mbukuna i Muha, kau madàpangu la nggi biakau ulaku ningu dàngu jàka nggàra biaya na pawunda-mu.

⁴Jàkau karadaku-nya i MIRI, napa na-pahàra-nya na pa-njanjingu-na ba da ana umbuku-nggu napa da ma-pareta-ya na Ihirailu, mili àru nyuna ka weli eti weli puhuda ba da-tuturu mànu panunju-ha da hupu liina.

⁵Hili ninyapa na hau! Jiangu-ma bau namu-yapa jàka nggàraya na pawunda-na i Yuàpu hanggangu lai nyungga ba na-pameti-ha da ma-dua da ngora tanatara Ihirailu, nu i Àpuneru anana i Neru dàngu i Amaha anana i Yetiru. Na-pameti-ha nyuda la rehi papeku ba da-pahàra-nya na kiringu pameti tau la rehi pabera. Nyuna ma-pameti tau manda njala tàka nyungga ma-hambeta-ya na pawunda-na hi lupa ku-mayila.[2]

⁶Ba tuna, dou na ananggu duku, lupangu-ma upalua-nya lima pa-namatu-nya na mahàmu la kanandingu-mu; jia-aya àmbu pahia-dunya pameti mandangu.

⁷Na nyuna uhàmu-manja eti da anana mini i Mbàrahilaï welingu la Nggiliatu. Wuanja pa-ndulangu ka na-patoma na lurida, nadu ba dahàmu-ngga nyungga ba kupalai welingu la hanggana na ayamu, i Àpuhalomu.

⁸Jàka jia-yaka i Himei anana i Nggera welingu la paraingu Mbahurimu la ngaba Mbanyamingu, ningu-mbupa kareuku pa-bànjalu-nggunggau. Ba jiaya na lakunggu la Mahanaïmu, naràtu mbana etingga i Himei. Na nyuna, ba ku-pajàmburu-danyaka la Luku Yorundangu, ku-harangu lai nyuna parongu-na i MIRI ba nda jia pameti-anggunya nyuna.

⁹Na nyuna yia-naya na kareuku pa-bànjalu-nggunggau: àmbu màta-dunya pamara welingu la hukungu. Kupi-manggau bau manggà-na; jia ba tuna, ka mbàda kaweda-nakai pa-mukarungu-ma ka na-ngalangu hukungu meti,” wànanya.

¹⁰Tunaka nu meti-nanyaka i Ndautu hi taninya la paraingu-na i Ndautu.

¹¹Patu kambulu ndauna mandaina ba hanganji Ihirailu-ya: pihu mbua ndauna ba nama-ndapu la Hemburungu, dàngu tailu kambulu tailu mbua ndauna la Yeruhali.

¹²La hambeli-na nu hanganji-yaka i Halomu hilu-ya i Ndautu na amana. Na kuaha-na ba hanganji-ya i Halomu kanjupu undungu-ya.

¹³La hau na lodu lua-nanyaka i Andunia lai Mbàtihemba. Ka paàra-nanyaka i Andunia paraïna i Mbàtihemba, “Pawuku mahàmu-duya na tadalu-mu nàhu?” wànanya. “Mahàmu-ya,” wàna ba nahema i Andunia.

¹⁴Hàla hi nahili bonjaya, “Ningu pa-karainggu-nggau làti ina,” wàna. “Nggàraya?” wàna ba na-paàrangu i Mbàtihemba.

¹⁵Nahema i Andunia, “Upi-manya nyumu ina, ba nyungga duku làti manjadi hanganji; nuna-mayaka na pambàda monuna nggubulu-na na Ihirailu. Na nyuna hauya na manjadi; na eringgu na manjadi hanganji, ba tuna nu na pawuku-na i MIRI.

¹⁶Nàhu ningu hau pa-karainggu; kumonu-nggau ina àmbu jia tulaku-dumunya,” wàna.

¹⁷“Nggàra pa-karaimu?” wàna ba na-paàrangu i Mbàtihemba. Nahema i Andunia, “Kumonu-nggau ina kau karaiya làti i Hanganji Halomu ka na-pahia-ngga pa-kanoma-ya i Ambihàku, na ana karia welingu la Hunimu. Kupi hàmu-manya ba nda jia tulaku-ananya na pakarai-mu nyumu ina paraïna i Halomu,” wàna.

¹⁸“Jiaya, tu biana duna,” wàna ba nahema i Mbàtihemba. “Napa kupanii dànya na hanganji ndumamu nyumu,” wànanya.

¹⁹Ka lua-nanyaka la hanganji i Mbàtihemba ka panii wànya na ndumana i Andunia. Ndolaku-nanyaka na hanganji payema-ya na inana hi na-karuduku patembi-ya, hàla hi nahili mandapu beli la kanjàka pareta-na. Na-paràhangu tau pa-payema-nya kanjàka na inana la kawana-na.

²⁰Ba na-mandapu-ka, panii-nanyaka i Mbàtihemba, “Ningu hawutu pa-karainggu làti welingu lai nyumu. Kumonu-nggau àmbu jia tulaku-dumunya,” wànanya. “Nggàraya nu ina?” wàna ba na-paàrangu i Halomu. “Nda jia tulaku-anggunya duku,” wàna.

²¹Nahema i Mbàtihemba, “Pahia-nya làti i Andunia na ayamu, ka na-kanoma-ya i Ambihàku,” wànanya.

²²“Ka nggikina hiu karaiya nuna lai nyungga ina?” wàna ba na paàrangu i Halomu. “Hama biana ina, bau karaika ka kuwua-ya yiana na kanjàka pareta lai nyuna. Ka ba ayamadu-nggunya. Hangia-nai, daangu-mbunya nyuna paraïda i Ratu Àpuyataru dàngu i Yuàpu!” wàna.

²³Ba panii tunaka nu harangu-nanyaka i Halomu parongu-na i MIRI, “Màla àruki ka nanggàna-ka ràtungu-na i MIRI, jàka nda kuhuku pameti-ya i Andunia rukuna nuna na pakarai-na!

²⁴Mbàda paundu-nanyaka i MIRI na mandapu-nggu la kanjàka pareta-na amanggu i Ndautu. Mbàda pahàra-nanyaka na njanjina dàngu mbàda wua-nangga-nyaka yiana na pa-hanganji lai nyungga dàngu la ana umbuku-nggu. Ku-harangu parongu-na i MIRI na maluri, la lodu nàhuma ba nameti i Andunia!” wàna.

²⁵Ka wuangu-nanyaka pareta i Halomu lai Mbanaya hi nalua pa-pameti-ya i Andunia.

²⁶Tunaka nu panii-nanyaka lai Ratu Àpuyataru i Hanganji Halomu, “Beliwa la kotaku paraingu-mu la Anatutu. Ràka pa-hukungu metikau làti, na nyuna nda jia huku-anggunggau la lodu nàhu, nadu bau angu-nyapa na amanggu, angu pàda-munya na mayila-na. Dàngu nyumumbu ma-paloku-ya na Pàti Pa-ràndingu-na i MIRI,” wànanya.

²⁷Hàla hi na-pukalu-ya welingu la wai ngaba ratu i Àpuyataru paraïna i Halomu. Wànya nuna na pawunda-na i Halomu, hàrangu-nanyaka na papanii-na i MIRI la Hilu, rukuna i Ratu Eli dàngu ana umbuku-na.

²⁸Narongu ndàbaha nuda da mambàda hàrangu i Yuàpu. Ka mangàdatu-nanyaka ba naangu ninya i Andunia. Tàka amangu nda naangu-anya i Àpuhalomu. Ka palai-nanyaka la Maü Terana i MIRI hi nayàpa-ha da hupuna na ngia pawotu maraku.[3]

²⁹Pa-patàkangu-ya i Halomu na rukuna yiana. Ka paràha-nanyaka i Mbanaya pa-pameti-ya i Yuàpu.

³⁰Ka lua-nanyaka i Mbanaya la Maü Terana i MIRI hi napanii-nya i Yuàpu, “Luhukau welingu lai hena wànanggau na hanganji!” wànanya. “Ndia-a!” wàna ba nahema i Yuàpu. “Meti ningu lai yiahu wàngguma,” wàna. Beli-nanyaka i Mbanaya pa-patàka-nya nuna na hanganji.

³¹Ba narongu-yaka nuna panii-naka na hanganji, “Luawa pa-pahàra-nya nuna na papanii-na. Pameti-ya dàngu taninya. Ka àmbu kutanggu hemaya nyungga dàngu mbuu ndàba ana umbuku-na na amanggu ruku na pameti tau pawunda-na i Yuàpu hanggangu la tau manda njala.

³²Napa na-hukunya paraïna i MIRI rukuna na pawunda-na ba na-pameti tau bundu nda pinanya na amanggu. I Àpuneru, na parawira Ihirailu dàngu i Amaha na parawira Yahunda, pa-kadua-da nda ningua njalada. Darihi hàmupa nyuda welingu lai Yuàpu wiki, tàka na-pameti biaha.

³³Napa na hukungu rukuna na metida nuda da tau madua parawira natanggu-nja i Yuàpu dàngu ana umbuku-na lundu nu - nu. Na nyuna mbuu ndàba da ana umbuku-na na amanggu da manjadi hanganji, na-pakanyuru mànuha paraïna i MIRI — napa nyuda da-ondungu,” wàna.

³⁴Ka lua-nanyaka i Mbanaya la Maü Terana i MIRI hi na-pameti-ya lai nu i Yuàpu. Hàla hi taninya i Yuàpu la umana la hambeli paraingu.

³⁵Tunaka nu wotu-nanyaka paraïna hanganji panjadi liku uru kanguhuru pabera i Mbanaya hiluya i Yuàpu, dàngu hi wotuya i Handuku panjadi ratu hiluya i Àpuyataru.

³⁶Tunaka nu paau-nanyaka i Himei paraïna na hanganji hi napanii-nya, “Wuluwa uma nduma wikimu yiahu la Yeruhali. Ndàdiku lai nu dàngu àmbu luhudu welingu la paraingu.

³⁷Jàka jia toru mbeni biamu paluhu hiu làpahu bau palaya na ana Luku Kindurungu, lupangu-ma pameti-kau; dàngu panjala wiki-mamunya dumu rukuna nuna,” wànanya.

³⁸“Tu biana duna, Tamu Umbu manga-rangu,” wàna ba nahema i Himei. “Kukiku-manya duku na hupu liimu Tamu Umbu,” wàna. Ka ndàdiku-nanyaka la Yeruhali i Himei nda nggi tuna mandaina.

³⁹Ba tailu mbua ndaunaka na ma-làpahu palai-danyaka la Nggàta da tau madua da atana i Himei la Hanganji Akihu anana mini i Maaka. Ba narongu-yaka nuna i Himei,

⁴⁰wotu-nanyaka hela na kalandai-na hi nalua la Hanganji Akihu la Nggàta pahimbu-ha nuda da atana. Ba na-jàngapu-haka, karia beli-nanjaka.

⁴¹Ba narongu-yaka na pawunda-na i Himei paraïna i Halomu,

⁴²paràhangu-nanyaka papaau-nya i Himei hi napanii, “Mbàda paràha-nggunggauka pa-panjanjingu la parongu-na i MIRI ba nda jia dunjaku-amunya na Yeruhali. Dàngu mbàda panamu-mbunggu-nggauka, jàka jia luhu biamu welingu la Yeruhali, lupangu-ma umeti. Ba tuna, mbàda pa-njanjingu-muka dàngu mbàda patunju-muka la panunju-ya na pareta-nggu wàngguka, ma-ndia?

⁴³Tàka nàhu ka nggikina hi jia hinggilu bia-munya na njanjimu dàngu hiu panggaya na hupu liinggu?

⁴⁴Upi hàmu-manja mbuu ndàba da akatu-mu ma-hanggangu la amanggu. Ndumada nuda napa nahuku-nggau i MIRI,

⁴⁵tàka nyungga napa na-pakanyuru-ngga dàngu napa na-paundu-nya na pa-hanganji-na na amanggu lundu nu - nu,” wànanya.

⁴⁶Ba nahàlaka papanii tuna nu, wuangu-nanyaka pareta-na hanganji lai Mbanaya, hi nalua i Mbanaya pa-pameti-ya i Himei. Nàhu mbulungu-nanyaka na kawaha-na i Halomu la pa-hanganji-na.