Read Kambera 1 HANGANJI 20 Bible Online

1 HANGANJI 20 - Kambera bible

1 HANGANJI 20

¹La hau na lodu pauhi-nanjaka mbuu ndàbada da tanatara-na i Mbenihandàtu, na hanganji Hiria, na-karia-nja da tailu kambulu madua hanganji hawiangu dàngu njara, dàngu kareta pabera-da, hi nalua pa-nggupulu-ya na paraingu Hamaria pahada-nya.

²Na-paràhangu papalewa lai Ahàpu, na hanganji Ihirailu, la paraingu nuna pa-patàka-nya yiana na lii langu,

³“I Hanganji Mbenihandàtu na-karuhi-ya, kau wuanya àmahu rara, àmahu bara, da papaha-mu, dàngu da anamu da ma-ànjaru,” wàda.

⁴Nahema i Ahàpu, “Paniinya i Tamu Umbu Hanganji Mbenihandàtu ba ku-pajia-ya. Màta ka namangu-ngga nyungga dàngu mbuu ndàbada da mangunggu,” wàna.

⁵Tunaka nu hili beli-danyai nuda da pa-palewa lai Ahàpu pa-patàka-nya na hili hau pa-karuhi. Tuna yia na pa-karuhi, “Yia la mangilu-na mbàda karuhi-nanggauka paraïna hanganji-ma kau wuanya àmahu rara, àmahu bara dàngu da papaha-mu pa-kariangu da anamu.

⁶Tàka nàhu, napa na-palewa-ha da ngora tanatara-na, pa-pareha-ya na umamu dàngu da umada da panggawi-mu, hi dapiti nggàra bia ma-pawilingu la pakaka-da. Napa damaiha yiahu haromu la rehi tungu nàhu,” wàda.

⁷Ka paau ndàba-nanjaka da ngora Ihirailu i Ahàpu hi napanii-nja, “Hakahii wiki-maminyaka ba wuku-nanya pa-hanggàmaru-mataka na tau nuna. Na-karuhi-ka ka kuwua-nyaha da papaha-nggu dàngu da ananggu dàngu da àmahu marara, mabara-nggu, tàka mbàda pajia-nggunyaka,” wàna.

⁸Dapanii ndàba da liku uru dàngu na rayatu, “Àmbu wàrihu-duya umbu! Àmbu pa-kikungu-du,” wàda.

⁹Tuna nuduka, hi tuna yia nahema-naha da papalewa-na i Mbenihandàtu, i Ahàpu, “Paniinya i Tamu Umbu, na hanganji-mi ba ku-patunju-ya na pa-karuhi-na la mangilu, na nyuna na pa-karuhi-na nàhu, na padàmbu wàna, nda peku pajia-anggunya,” wànanya. Ka laku-danyaka nuda da papalewa. Tunaka nu hili mai-danyaka papanii,

¹⁰“Napa na-palewa tau manda uku dangu na hanganji-ma pa-pakabu-ya na paraingu-mu, dàngu peku ngàndi-danja wàngu limada da kabu watu ta-nyungguru-na na paraingu-mu. Na-harangu-ma ka dahuku-nya jàka ndia ka da-pameti-ya paraï da marapu, jàka nda pa-pahàra-nya nuna!” wàda.

¹¹Nahema i Hanganji Ahàpu, “Paniinya i Hanganji Mbenihandàtu: Na panjuri karohu-mana duna nda na-hamela hahangu-a ba ndedi pa-pakabungu, la hambeli-na nupa duna,” wàna.

¹²Ba patàka-nya nuna na hemana i Ahàpu lai Mbenihandàtu talànga unungu pàkuda dàngu da hanganji hawiangu da angu pa-kuhingu na la kotaku uma terada. Ba narongu-yaka nuna wua-nanjaka pareta da parawira-na i Mbenihandàtu ka dahada-nya na paraingu Hamaria. Ka laku-danyaka.

¹³La rehi nu lua-nanyaka na haàtu wunangu lai Hanganji Ahàpu, hi napanii, “Napanii i MIRI, ‘Muita-ha nida da tanatara da madangu! Napa kuwua-nggau talu hanggangu lai nyuda la lodu nàhu, ka pidumu-nggaka napa ba MIRI-ka Nyungga,’ wàna i MIRI,” wànanya.

¹⁴“Nggamu mahada mangilungu?” wàna ba na-paàrangu i Ahàpu. Nahema na wunangu, “Da panjuri bidi mini pa-kapipi-da da kapala ndaera, wàna i MIRI,” wàna. “Tàka nggamu ma-kapipi-ya nu ba njungu?” wàna ba nahili paàrangu na hanganji. “Nyumu wikima umbu,” wàna na hemana na wunangu.

¹⁵Ka pauhi-nanjaka da panjuri bidi mini pa-kapipi-da da kapala ndaera paraïna hanganji. Mbuu ndàbada 232-ha da panjuri. Hàlaka nu tunanya numai na tanatara Ihirailu. Nggubulu-da tau 7.000-ha.

¹⁶Da-pakiringu pa-hadangu la tidu lodu, ba talànga unungu lundu maüku-da la kotaku uma tera i Mbenihandàtu dàngu da hanganji da ma-tailu kambulu madua da angu pa-kuhingu-na.

¹⁷Da ma-ndàharu mangilungu jiaha da panjuri bidi mini. Da tau pa-paràha-na patanggu kuki muhu i Mbenihandàtu, da-patàka-nya nyuna ba nàmungu hajuru tanatara welingu la tubana la Hamaria.

¹⁸Ka wuangu-nanyaka pareta i Mbenihandàtu payàpa kaluri-nja nyuda da tanatara, ka mai-danya pa-pabera jàka ndia ka mai-danya pa-papeku-kai.

¹⁹Pa-kiringu-danyaka panjungu da panjuri bidi mini welingu la Hamaria, hi na-pandutungu na tanatara Ihirailu.

²⁰Nimbihu-da da-pameti-ha da muhu pa-hanobaku-da hi lupa dapalai da tau Hiria, ba danyara-ha tau Ihirailu. Na nyuna naluhu i Mbenihandàtu; napalai-ya la njara, da-karia-nya paraï da manda piraha welingu la pamba tanatara li la njarana.

²¹Natama-mbu la pa-kabungu i Ahàpu hi na-patàlaru-ha da kareta pabera dàngu na-pameti-ha da njarada. La lodu nu kanjupu nda najaru-ya na mberana na tau Hiria.

²²Tunaka nu lua-nanyaka nuna na wunangu lai Ahàpu hi napanii-nya, “Belika duna nàhu umbu, ka pa-kapingatu wikinda dàngu ka hawanjiru pa-hàmungu, nadu ba hili mai-nanyapa pahada-nda na hanganji Hiria la pa-kameli ruu ai na manàmu-nya,” wàna.

²³Da parawira-na i Hanganji Mbenihandàtu dapanii-nya i Mbenihandàtu, “Da pa-alangu palumu-na na banjaru Ihirailu maningu kawahangu la palindi-ha, tuna nuduka hi na-pakàku-ta banjaru Ihirailu. Ba tuna jiangu-ma ba peku pakàku-ndaha nyuda la ma-ndidaru.

²⁴Màlawa làti nàhu umbu kau pahilu wànja parawira - parawira wikimu da hanganji da ma-tailu kambulu madua-ha.

²⁵Hàlaka nu umbu kau pamàtu-ya na pamba tanatara pambàda pakàku, pa-kariangu njara dàngu kareta pabera hama dangu-mbuda da ma-mangilu. Napa ka tahada-nya na banjaru Ihirailu la ma-ndidaru, dàngu jiangu-ma tatalu la rehi nu,” wàdanya. Na-patunju-ya paraïna i Hanganji Mbenihandàtu hi natundu-nya na paniida nuda da parawira-na.

²⁶Ka dundilu-nahaka da tanatarana la pa-kameli ruu ai ma-pandàkingu hi nalaku karia-nja lundu la paraingu Apiku pahada-nya na tau Ihirailu.

²⁷Da tau Ihirailui duda pa-wandalungu-danyaka pa-pajurungu hi dalaku ka pa-hànjalungu. Da-pabiwa kadua pambangu hi da-pahadangu maü tera la papada da tau Hiria. Jàka pamenja-nja dàngu tanatara Hiria da ma-taneparu pinuya na ngaba tana nggailaru lai nu, hama tuna dua kabàba kamàmbi-ma-aha ba itaha da pamba Ihirailu.

²⁸Ka hili mai-nanyaka na haàtu wunangu lai Hanganji Ahàpu hi napanii-nya, “Napanii i MIRI, ‘Rukuna ba dakaka-ya paraï da tau Hiria ba mbulungu la ma-palindingu-a hi ningu kawaha-nggu, tàka la ma-ndidaru ndia-a, napa kuwua-nggau talu hanggangu la tanatara-da nyuda na manda uku danguya, ka pi-dimi-nggaka nyumu dàngu na rayatu-mu ba MIRI-ka Nyungga,’ ” wànanya.

²⁹Pihu mbua lodu mandaina ba daengangu la kotaku maü terada da tau Hiria dàngu da tau Ihirailu. La lodu papihu wàna pa-kiringu-danyaka pa-pakabungu. Nu la pakabungu 100.000-ya na tau Hiria pa-pameti tau Ihirailu.

³⁰Da tau da mamara dapalai-ha la paraingu Apiku, tàka na kangeli-na na paraingu na-tanyungguru pa-kambitaku-ha da tau 27.000 welingu lai nyuda. Napalai-mbu la paraingu nuna i Mbenihandàtu hi na-kawiningu la hau uma la kurungu mbara dalu.

³¹Mai ndàba-danyaka da parawira-na lai nyuna hi dapanii-nya, “Dakàli mila etida da hanganji Ihirailu, wàda da marongu la tau. Ba tuna, puli-nggama làti ka malua la hangga hanganji Ihirailu ba mawàngu pa-kalambungu karungu tanda peka halaera dàngu liku la nggoruma tanda hurutu nyàku; raï ka àmbu na-pameti-kau umbu,” wàdanya.

³²Ka kalambungu-danyaka karungu dàngu liku la nggoruda, hi dalua la hanggana i Ahàpu hi dapanii, “I Mbenihandàtu ata-munya Tamu Umbu. Nakama-hinggau Tamu Umbu, àmbu pameti àru-kiya nyuna,” wàda. Nahema i Ahàpu, “Naluri-dupa nu na angu dedinggu?” wàna.

³³Pandapungu-madanya duda talia lii mahàmu welingu lai Ahàpu da parawira-na i Mbenihandàtu. Ba tuna “na angu dedinggu,” ba wàna-kika i Ahàpu, ailulu hemama-a-danya, “Deningu-mana ba angu dedi-munya Tamu Umbu, i Mbenihandàtu, wàda. Hi napanii i Ahàpu, “Karia-nya yiahu!” wàna. Ba natàka-ka i Mbenihandàtu, wànda-nanyaka pahei kareta paraïna i Ahàpu.

³⁴Ka panii-nanyaka i Mbenihandàtu lai nyuna, “Napa ku-pabeli-nggauha umbu da paraingu pambàda wàhina na amanggu welingu la amamu. Peku pa-hadangu-mbumu umbu ngia pa-danggangu-mu la paraingu Ndamàhiku hama tuna na pawàna na amanggu la Hamaria,” wàna. “Palata-nya na njanjimu nu umbu, napa ku-pamara-kau,” wànanya. Hàlaka nu tura-danyaka pa-njanjingu i Ahàpu dàngu i Mbenihandàtu hi namangu papuli-nya.

³⁵La hupu liina i MIRI, na haàtu wunangu welingu la kalibaru wunangu na-paràha-nya na wunangu haàtu ka napalu-ya nyuna. Tàka nda nabihu-a nu na anguna,

³⁶ba tuna napanii nuna na wunangu, “Rukuna ba ndau karadaku la hupu liina i MIRI napa na-njàkilukau hinga bau laku-kika welingu yiahu,” wànanya. Deningu-mana ba na-yilangu-kika welingu lai nu, njàkilu-mananya paraï hinga.

³⁷Tunaka nu lua-nanyaka nuna na wunangu la tau haàtui hi napanii, “Paluka nyungga!” wànanya. Ka palu pa-langatàka-mananya paraïna nuna na tau lundu na-manua.

³⁸Hàlaka nu kamburu wàna-nyaka ha-kadipu tera na matana nuna na wunangu, ka àmbu natanda-ya tau, hi nalaku pa-ndolaku la hingi ànda pa-patia-nya kawiliku-na na hanganji Ihirailu.

³⁹Ba nàhu-nyaka na hanganji, wara-nanyaka nyuna paraïna wunangu, “Umbu ma-mangarangu, ba ku-mbeni hanggangu la pa-kabungu, na haàtu panjuri nangàndi-ngga haàtu muhu payàpa, hi napanii-ngga, ‘Dai pahàmu-manya yiana na tau; jàka napalai, lupangu-ma pameti-kau nyumu hiluya nyuna jàka ndia umbayaru 3.000 àmahu bara,’ wànangga.

⁴⁰Tàka ba tunaka nu ba talànga ningu ihi ulanggu, palai-nanyaka nuna na tau,” wàna. Nahema na hanganji, “Mbàda rata-mamu-nyaka na hukungu nduma wikimu, ba tuna uhandepa-mayaka bàdi,” wànanya.

⁴¹Bunggahu-nanyaka na tera kamburungu welingu la matana na wunangu, ka tanda-nanyaka paraïna hanganji ba haàtu wunangu-ya.

⁴²Ka panii-nanyaka la hanganji na wunangu, “Yiana-ya na papanii-na i MIRI, ‘Na tau pa-pameti ba wànggu upulinya pamara. Jia ba tuna lupangu-maka bàdi umeti hiluya; napa dakabu da tanataramu rukuna ba damà-tanja papalai da tanatara-na,’ ” wànanya.

⁴³Beli-nanyaka la Hamaria na hanganji dàngu handuka etina dàngu mbenina.