Read Kambera 1 HANGANJI 21 Bible Online

1 HANGANJI 21 - Kambera bible

1 HANGANJI 21

¹La lihi umana i Hanganji Ahàpu la Yihireyilu ninya na hau woka angguru manguna na haàtu tau ma-tamungu Nambutu.

²La hau na lodu napanii-nya i Nambutu i Ahàpu, “Ku-mbuhangu pa-mangunya na woka anggurumu, ba lihi umanggu-nya nuna na woka, ka pamula-nya rii lai nu wànggu. Napa kuwua-nggau woka angguru marihi hàmu hiluna, jàka ndia jàkau rihi mbuhangu, napa kukeiya tuda ràka wilina,” wànanya.

³Nahema i Nambutu, “Yiana na woka angguru kangeha welingu la boku la mangilu-manggunya. Parongu-na i Ala, nda jia wua-anggu-nggaunya umbu!” wànanya.

⁴Wàngu handuka etina dàngu mbenina, beli-nanyaka i Ahàpu hi na-tanggulingu la ngia pa-katuda-na ba dàngu talurungu-na dàngu nda bihuna pangangu rukuna na papanii-nanya paraïna i Nambutu.

⁵Lua-nanyaka i Ihembilu na papaha-na lai nyuna pa-paàra-nya, “Ka nggikina hiu hawina? Nggikina hi ndau bihu pangangu?” wànanya.

⁶Nahema i Ahàpu, “Rukuna ba nda nahàmu na etinggu hanggangu lai Nambutu. Ku-mbuhangu làti pakeiya na woka angguru-na, jàka ndia jàka narihi mbuhangu ningu ka njepa wànya woka angguru hau. Tàka nda nabihu-a!” wàna.

⁷“Ka ni hi hanganji-madukau!” wàna ba nahema i Ihembilu. “Hadangu-wa nàhu kau ngangu. Pa-mànjaku-ya na etimu, nadu ba nyungga mawua-nggaunya napa na woka angguru-na i Nambutu!” wànanya.

⁸Hàlaka nu tulihu-nanyaka huratu i Ihembilu, patungu tanda henggilu hanganji. Nuna na huratu na-pangàndi-nya la liku uru - liku uru dàngu ma-pangora - ma-pangora la pa-nggolu la Yihireyilu.

⁹Tuna yia na ihina na huratu, “Bobaru-ya ka na-puaha na rayatu dàngu paaunya pa-pauhi; nu la pauhi wuanya ngia pa-mandapu ma-mangunju i Nambutu.

¹⁰Paràhangu madua tau akatu pa-mandapu hangganya nyuna dàngu ka da-panjala-ya nyuna ba mbàda ràtu-nanya i Ala dàngu na hanganji. Hàlaka nu ngàndiya la hambeli paraingu, ka nàhaku-nya watu lundu nameti!” wàna.

¹¹Da-pahàra-nya nuna na hupu liina i Ihembilu paraï da liku uru dàngu da ma-pangora la Yihireyilu.

¹²Bobaru-danyaka ka na-puaha na rayatu. Tunaka nu paau-danyaka pa-pauhi na tau hi dawua-nya pangia ma-mangunju i Nambutu.

¹³Tau madua tau akatu da-mandapu hangganya i Nambutu, hi da-panjala-ya la hangga madangu ba mbàda ràtu-nanyaka i Ala dàngu na hanganji. Rukuna nuna ngàndi-danyaka la hambeli paraingu hi nàhaku-nya watu lundu nameti.

¹⁴Na ruku pahàra-nya na pameti-ya i Nambutu pa-patàkangu-ya lai Ihembilu.

¹⁵Ba narongu-yaka i Ihembilu, panii-nanyaka i Ahàpu, “Mbàda meti-naka i Nambutu. Luawa nàhu papiti-ya na woka angguru na panda bihuna padangga-nya lai nyumu,” wànanya.

¹⁶Lu laku-nanyaka i Ahàpu hi natuya manguna nuna na woka angguru.

¹⁷Tàka i MIRI hi napanii-nya i Elia na wunangu welingu la Timbihu,

¹⁸“I Ahàpu na hanganji Hamaria ninya nàhu la wokana i Nambutu, patuya manguna nuna na woka. Ba tuna luawa lai nu,

¹⁹dàngu patàka-nya lai nyuna ba tuna yia na paniinggu Nyungga, MIRI, ‘Bau hàla pa-pameti tau hili rambangu-kimu-nyaipa! Rukuna nuna napa najàli-ya ahu na riamu la ngia pajàli-nanya ahu na riana i Nambutu!’ wàmunya,” wàna.

²⁰Ba naita-yaka i Elia paraïna i Ahàpu, “Yi ha muhu, ndutu-mamungga!” wàna. “Deningu-mana,” wàna ba nahema i Elia. “Nadu ba kita eti-mamu-nyaka pawunda ma-akatu la hangga matana i MIRI,

²¹tuna yiaka na papanii-na i MIRI lai nyumu, ‘Napa ku-patàka-nya na tàlaru lai nyumu. Napa ku-pahinggilu-kau, dàngu nimbihu-da da mini la kuru umamu, ma-kaweda bidi tau, ku-pamohu-ha napa.

²²Na kuru umamu napa nahama-nya na kuru umana i Hanganji Yerumbiamu anana i Nembàtu dàngu hama tuna na kuru umana i Hanganji Mbaeha anana i Ahia, nadu bau pawiti-dunyaka pawunda njala na tau Ihirailu hi dawuda-ya na ma-karaü lai Nyungga,’ wàna.

²³Tàka na ma-nggànaya i Ihembilu, napanii i MIRI ba nangaa-nya ahu na ihina la paraingu Yihireyilu.

²⁴Nggamu biaha da ihi kuru umamu da mameti la paraingu napa dangaanja ahu, tàka da mameti la hambeli paraingu napa dangaa-nja ma-hawurungu,” wàna.

²⁵Ndedima ningu tau hama tuna i Ahàpu na makita etina pawunda ma-akatu la hangga matana i MIRI. Nawunda-ha mbuu ndàbada nuda da ma-akatu ruku pahoha-na i Ihembilu, na papaha-na.

²⁶Nawunda-ha da njala ma-kanjupu pa-makia wàngu i Ahàpu: na-lumungu marapu hama tuna na pawunda-da da tau Amori, nu da tau pambàda wàngga paluhu-na i MIRI welingu la tana Kanaàngu ba natama-nya tau Ihirailu nuna na tana.

²⁷Ba nahàla-ka papanii i Elia, bàriku-nahaka da pakina i Ahàpu hi na-kalambungu karungu tanda pekana halaera, na-puaha, dàngu karungu-mbu pa-kalambu-na ba na-katuda, tàka jàka laku-nanya nabiti mànu na matana.

²⁸Napanii i MIRI lai Wunangu Elia,

²⁹“Mbàda ita-munyaka nggiki hama pawawana wikina i Ahàpu la hangganggu? Rukuna nuna, nda ku-patàka-anya napa na-tàlaru la ngala lurina. La rehina na anana hina hi ku-patàka-nya nuna na tàlaru,” wàna.