Read Kambera 1 HANGANJI 22 Bible Online

1 HANGANJI 22 - Kambera bible

1 HANGANJI 22

¹Dàmbu ndau rihina mandaina ba nda ningu pabera la tau Ihirailu dàngu tau Hiria.

²Na nyuna la ndaungu patailu wàna, i Yuhapàtu na hanganji Yahunda nalua pa-tadalu-ya i Ahàpu na hanganji Ihirailu.

³Ba ndedipa nu mbàda panii ndàba-nanjaka da ngora tanatara-na i Ahàpu, “Na paraingu Ramutu la Nggiliatu mangunda nyutaya! Ka nggikina hi nda tawàhi-ya welingu la Hiria?” wàna.

⁴Ba tuna ba namaika i Yuhapàtu, na-paàrangu i Ahàpu, “Ubihu Tamu Umbu pa-karia-ngga ka hadanya la Ramutu?” wànanya. “Hàmudu! Ka ta-pakariangu. Da tanatara dàngu da pamba li la njaranggu nyungga ka da pa-mbulungu la tanatara dàngu da pamba li la njaramu nyumu.

⁵Na nyuna tapaàra pàkunya bàdi i MIRI,” wàna.

⁶Ka pauhingu-nanyaka wunangu i Ahàpu, ràkangu patu ngahuha, hi na-paàra-nja, “Pekuna ihu ka kulua pahada-nya la Ramutu jàka ndia?” wàna. “Pekuna!” wàda ba dahema. “Napa i MIRI nawua-nggaunya nuna na paraingu Tamu Umbu,” wàda.

⁷Na nyuna nahili paàrangu i Yuhapàtu, “Nda ningua nàhu wunangu hawiangu lai yiahu ma-ngalangu pa-paàra-nya i MIRI ndumanda nyuta?” wàna.

⁸Nahema i Ahàpu, “Ningu haàtu-napa, jiaya i Mika anana i Yimula. Na nyuna nyungga nda kumbuha-anya, ba ndedi na-handàkangu-ma duna panyura nggà - nggàra mahàmu ndumanggu nyungga; manda hàmu mànuma,” wàna. “Ai, àmbu tumu nudu na!” wàna na hemana i Yuhapàtu.

⁹Ka paaungu-nanyaka haàtu panggawi uma hanganji i Ahàpu hi naluu palewa parengga-nya palua pa-ngàdalu-ya i Mika.

¹⁰La rehi nu i Ahàpu dàngu i Yuhapàtu mandapu mangu paki mangarangu-danya la kanjàka pareta la ngia pa-pàmbalungu uhu nggàndumu la hangga pindu bokulu Hamaria, ba damai ndàba da wunangu la hangga pa-patàkangu panyura-da.

¹¹Na haàtu welingu la wunangu nuda, na ma-tamungu Hendikia, anana i Kanaana, na-pandoi-ha da kadu bàhi napanii-nya i Ahàpu, “Yiana-ya na papanii-na i MIRI, ‘Wànja da kadu yia-daka Tamu Umbu bau beraya na Hiria hu pakabu-ha nyuda,’ ” wàna.

¹²Mbuu ndàbada da wunangu hawiangu da-pajiaya hi dapanii, “Hada-nyawa nyuna na Ramutu, napa umadàpangu-ma Tamu Umbu. Napa nawua-nggau talu i MIRI Tamu Umbu,” wàda.

¹³Nu ba tuna na panggawi malua pangà-daluya i Mika, napanii-nya i Mika, “Mbuu ndàbada da wunangu hawiangu mbàda nyura-danyaka na taluna na hanganji. Jia ba tuna màtawa nyumumbu Ama kau nyuraya na mahàmu hama tuna nyuda,” wànanya.

¹⁴Na nyuna nahema i Mika, “Parongu-na i MIRI maluri ku-panjanjingu, jàka nggàraya na papanii-nangga i MIRI, nunaya duku na pa-patàka-nggu!” wàna.

¹⁵Ba natàka-ka i Mika la hanggana i Hanganji Ahàpu, “Màla Mika, pekuma nyuma nu, i Hanganji Yuhapàtu dàngu nyungga palua pahada-nya la Ramutu jàka ndia?” wànanya. “Hada bianya duna!” wàna ba nahema i Mika. “Jiangu-ma duna umadàpangu Tamu Umbu. Napa i MIRI nawua-nggau talu Tamu Umbu,” wànanya.

¹⁶Nahema i Ahàpu, “Jàkau panii dàngga nyungga la tamuna i MIRI, peka-yawa na ma-padeningu. Ku-pambirangu-mapa bàdi pa-panamu-nggaunya na rukuna nuna?” wànanya.

¹⁷Nayema-ya i Mika, “Kuita-ha da tanatara Ihirailu ba dapai - ihangu la palindi - palindi. Hama tuna mbimbi manda ningu ma-pawanja. Tuna nuduka hi napanii i MIRI na rukuda nyuda, ‘Da tau yiada nda ningua liku uruda; màtawa ka dabeli mànjaku!’ ” wàna.

¹⁸Hi napanii i Ahàpu lai Yuhapàtu, “Màla na-padeningu-madu na papanii-nggunggau, ma ndia? Ndedi na-handàkangu-ma duna panyura mahàmu ndumanggu nyungga! Maakatu mànuma!” wàna.

¹⁹Nahili panii i Mika, “Nàhu patingi-nya na papanii-na i MIRI! Kuita-ya i MIRI ba na-mandapu la kanjàka pareta-na la awangu, tàka mbuu ndàbada da papalewa-na ndolaku-madanya la lihina,

²⁰Na-paàrangu i MIRI, ‘Nggamu napa majuju-ya i Ahàpu ka na-mbuhangu palua pa-pabera ka pameti-ya la Ramutu la Nggiliatu?’ wànanja. Tàka hau hema hau hema-mada.

²¹Ba tunaka nu ndàharungu-nanyaka na haàtu ngahu. Nalihinya i MIRI hi napanii, ‘Napa nyungga ka kunggeli-ya,’ wàna.

²²‘Nggiki-munya?’ wàna ba na-paàrangu i MIRI. Nahema na ngahu, ‘Napa kulua ka ku-pawiti-nya ka da-kambàliku ndàba da wunangu-na i Ahàpu,’ wàna. ‘Hàmudu, wànyawa nuna, bau ngalanguma panggeli-ya napa,’ ” wàna i MIRI.

²³Tunaka nu panii-nanyaka i Mika, “Ba tuna, nuna mambàda njadi-yaka. Mbàda pawiti-nanyaka i MIRI hi da-kambàliku-nggau da wunangu-mu Tamu Umbu, ba mbàda kawuku-mana-nyaka i MIRI pa-paita-nggaunya nuna na ura pàda!” wàna.

²⁴Ka ndàharungu-nanyaka i Wunangu Hendikia palihi-nya i Mika hi natàba-ya na matana i Mika dàngu paniina, “Nggiki hama peku-nakaka na Ngahuna i MIRI hi na-dunjaku-ngga nyungga tàka hi napanii dànggau nyumu?” wànanya.

²⁵Nahema i Mika, “Napa uitaya na mbutina la rehi tamamu pa-kawiningu la hau kurungu,” wànanya.

²⁶“Yàpaya nyuna!” wàna i Hanganji Ahàpu, “ngàndiya lai Amungu, na ngora paraingu, dàngu lai Tamu Umbu kudu Yoàhu.

²⁷Paniinja ka dapàtu-ya la uma kapàtangu, dàngu wuanya hakudu-a pangangu pa-ngunungu lundu kubeli dàngu nda nggàra ehinggu,” wàna.

²⁸“Jàkau beli dàngu nda nggàra ehimu Tamu Umbu, ka nda napanii-a i MIRI la ngarunggu nyungga! Mbuu ndàbana na maninya nàhu yiahu jiaha da hakahii,” wàna i Mika.

²⁹Tunaka nu laku-danyaka i Ahàpu na hanganji Ihirailu, dàngu i Yuhapàtu na hanganji Yahunda, pahada-nya na paraingu Ramutu la Nggiliatu.

³⁰Napanii i Ahàpu lai Yuhapàtu, “Napa nyungga ku-panjàda wikinggu ka kumangu patama la pabera, tàka nyumu-dumu Tamu Umbu upakima paki mangarangu,” wànanya. Tuna nuduka na panjàda-na wikina na hanganji Ihirailu ba laku pa-pahànjalungu.

³¹La rehi nu da matailu kambulu madua da ngora pamba pabera Hiria mbàda wua-nanjaka pareta paraïna hanganji-da ka jiaya na hanganji Ihirailu-a na pa-kaluluku-da.

³²Jia ba tuna, ba daita-yaka i Hanganji Yuhapàtu, làbu jiaya na hanganji Ihirailu, wàda ndàba. Tuna nuduka hi dadehi-nya pa-kaluluku-nya nyuna, tàka hi nawara i Yuhapàtu,

³³ka pi-danyaka ba nda jia-aya na hanganji Ihirailu, tuna nuduka hi dajiaka pa-kaluluku-nya nyuna.

³⁴Tàka na haàtu tanatara Hiria wàngu nda harawuku-na talànga puli pàku-nanya na wua panana, nda nawuku-aya na ngia pa-patuba-nanya. Tàka na nyuna nuna na wua pana nanggàna pawingu-manya i Ahàpu hi nalumbu làpahu-nya na kalembi pabera-na la ngia pa-panuangu-na. “Kuraraka!” wàna i Ahàpu ba nawara-nya na makata-nya na kareta. “Punjilungu kau luhu ngàndika welingu la pa-kabungu!” wànanya.

³⁵Ba talànga mbanana na pa-kabungu, pa-daingu ndolaku-na i Hanganji Ahàpu ba wàngu pa-harua-ya la kareta-na hangganya na tanatara Hiria. Na-njànjaru na riana welingu la manua-na hi na-lenangu la karaba kareta. La rudungu meti-nanyaka.

³⁶Ba mareni tama-naka na lodu, pa-wuangu pareta-ya nggubulu-da da pamba tanatara Ihirailu ka dabeli la paraida dàngu la tanada haàtu - haàtu,

³⁷maa ba mbàda meti-naka na hanganji. Ka beli-danyaka hi datani-nya i Ahàpu la Hamaria.

³⁸Ba bahaya na kareta la tàma Hamaria, ihu pàku-danya da kawini pahunda, na ria welingu la kareta nuna najàli-ya ahu, jia pa-wingungu-maya hama tuna na pambàda paniina i MIRI.

³⁹Hawiangu da rukuna i Hanganji Ahàpu, rukuna na uma hanganji welingu la nggedingu dàngu mbuu ndàbada da paraingu patura-na, mbàda tulihu-haka la mbuku Lii Ndai Hanganji Ihirailu.

⁴⁰Ba nameti-ka i Ahàpu, nanjadi hanganji i Ahahia na anana hiluya nyuna.

⁴¹La papatu wàna na ndaungu pareta-na i Ahàpu, na hanganji Ihirailu, nanjadi hanganji la Yahunda i Yuhapàtu anana i aha.

⁴²La rehi nu tailu kambulu lima-naka na ndaungu lurina. Dua kambulu lima ndaungu mandaina ba na-pareta la Yeruhali. Na inana jiaya i Ahumba anana i Hilihi.

⁴³Hama tuna i Aha na amana na ma-pareta ba ndedipa nyuna, nawunda mahàmu i Yuhapàtu la hangga matana i MIRI. Na-payila-nya welingu la pa-hanganji-na mbuu ndàbana na tau pahunda mini kawini da ma-pahunda la ngia pa-lumungu marapu da mani-i-njapa welingu ba na ama-manapa. Na nyuna da ngia palumu - ngia palumungu la marapu nda na-nyungguru-aha, hi pa-daingu wotu bia-napa kameti maraku dàngu natunu karanu lai nu na rayatu. I Yuhapàtu na pandoi-ha da kapalu la Tàrihu ka wotu àmahu rara welingu la Opiru; tàka da kapalu nuda nda danjadi-a pa-palirungu rukuna ba daruha la Ehiungu-Nggembiru. Na Hanganji Ahahia welingu la Ihirailu na-kamahingu ka da-paliru pa-kariangu da tau kapalu-na nyuna dàngu da tau kapalu-na i Yuhapàtu, tàka nda nabihu-a i Yuhapàtu jiapa ka nahàmu-kai na pa-luangga-mainguda dàngu na hanganji Ihirailu. Hàlaka nu meti-nanyaka i Yuhapàtu hi taninya la retida da hanganji la paraingu-na i Ndautu. I Yoràmu na anana nanjadi hanganji hiluya nyuna. Na rukuna i Yuhapàtu hawiangu, na kaborangu-na dàn(...)

⁴⁴

⁴⁵

⁴⁶

⁴⁷

⁴⁸

⁴⁹

⁵⁰

⁵¹

⁵²La pa-hakambulu pihu wàna na ndaungu pareta-na i Hanganji Yuhapàtu welingu la Yahunda, nanjadi hanganji Ihirailu i Ahahia anana i Ahàpu hi na-pareta-ya na Ihirailu dàmbu ndaungu mandaina.

⁵³Nawunda manjala hanggangu lai MIRI ba nakiku-nya na ngerangu ma-akatu welingu la amana dàngu welingu la inana dàngu welingu la Hanganji Yerumbiamu na ma-pawiti-nya na tau Ihirailu pawunda manjala.

⁵⁴Nalumu-nya dàngu na-rajaku-nya na Mbaàlu. Dàngu hama tuna na amana na ma-pareta wungangu, nyunambu nawuda-ya na ma-karaü lai MIRI, na ala palumu-na na tau Ihirailu.