Read Kambera 1 HANGANJI 3 Bible Online

1 HANGANJI 3 - Kambera bible

1 HANGANJI 3

¹Natuya angu pa-kuhingu-na na Mehiru i Halomu wàngu kanoma-nanya i Ràmbu Kudu ana hanganji Mehiru. Na-karia-nya i Ràmbu Kudu paraïna i Halomu la paraingu-na i Ndautu pa-ndàdiku ningu lai nu lundu na-lundungu na pahada-nya na uma hanganji dàngu na Umana i MIRI dàngu na tindingu winggiru-na na Yeruhali.

²Ba ndedi pahada-nya na Umana i MIRI la rehi nu, wotu bia-nanyapa maraku la mà - màtu ngia pawotu maraku na rayatu.

³Nambuha-nya i MIRI i Halomu dàngu nakiku-nja da panaungu-na na amana, na nyuna rupu dàngu marakungu bia-nanyapa banda maraku la mà - màtu ngia pawotu maraku.

⁴Na ngia pawotu maraku ma-manuha ha-lawàla jiaya la Nggimbiungu. Nakàli lua mànu pawotu kameti maraku lai nu i Halomu. La hau na lodu, hama tuna na pandàma-na, nahili lua lai nu.

⁵La rudungu nuna na-pawuwangu wikina i MIRI lai nyuna la manggadipangu dàngu na-paàra-nya, “Karaiwa jàka nggàra pambuha-mu Halomu jiangu-ma napa kuwua-nggaunya,” wànanya.

⁶Nahema i Halomu, “MIRI, mbàda paloha-munyaka ba dira mbuha-munya na amanggu i Ndautu na atamu. Nyuna nahàmu, na-patutungu dàngu na-tuturu lai Nyumu. Dàngu na pa-màndungu wàna bau mbuha pangala-nya nyuna, mbàda wua-munyaka nyuna haàtu anana mini na ma-pareta la rehi nàhu pahilu-ya nyuna.

⁷Ou MIRI, Alanggu, mbàda wotu-munggaka la pa-hanganji hiluya na amanggu, jiapa-kai ka lalu kanguraku-nggupa dàngu nda kupingu-a jàka nggiki ha-mana ba pareta.

⁸Ningga la honga banjaru pambàda pindimu panjadi banjaru wikimu. Banjaru bokulu-maha nda pataü-a padiha-ha.

⁹Jia ba tuna, MIRI, wua-nggawa eti diha kanandingu pa-kalana-nggu la pa-pareta-ya yiana na banjaru-mu wàngu mamola dàngu ka paheka-nya nggiya na mahàmu dàngu nggiya na ma-akatu. Jàka nda tuna nu nggiki hama peku pareta bia-ngguya yiana na banjaru bokulu-mu?” wàna.

¹⁰I MIRI nambuha-nya nuna na pa-karaina i Halomu

¹¹hi napanii-nya, “Rukuna bau karai eti diha kanandingu la pa-pareta wàngu mamola, dàngu ba nda malai luria, jàka ndia pawulu wàngu nduma wikimu jàka ndia ka dameti da muhumu,

¹²kupinu-ya na pakarai-mu. Napa ku-parihi manggàna-kau dàngu urihi pingu welingu la mbuu ndàba tau la pinu tana yiana mambàda luri la rehi na ma-làpahu jàka ndia maluri napa la rehi na manàmu-nya.

¹³Jiapa da panda karaimu napa kuwua-mbunggaunja: napa uwulu dàngu patembi-kau la ngala lurimu, urihinja da hanganji hawiangu jiapa ka nggi hanganji-yaka.

¹⁴Dàngu jàkau hamanya i Ndautu na amamu, ba na-karadaku-ngga dàngu ba nakiku-nja da ukunggu, napa kuwua-nggau malai luri,” wànanya.

¹⁵Ba na-pawàla-ka, pi-nanyaka i Halomu ba mbàda panii-dà-nanyaka paraïna i MIRI la manggadipangu. Ka beli-nanyaka la Yeruhali hi na-ndolaku la hangga Pàti Pa-ràndingu-na i MIRI hi nawotu kameti maraku patunu dàngu kameti maraku papeku. Tunaka nu hi na-paloku mbabu nduma mbuu ndàba da panggawi-na.

¹⁶La hau na lodu, mai-danyaka da tau ma-dua kawini pahunda la hanggana i Hanganji Halomu.

¹⁷Napanii na haàtu welingu lai nyuda, “Tamu Umbu ma-mangarangu, nyungga dàngu na kawini yiana angu umama. Nda ningua tau hawiangu angu ndàdiku-ma. Nda pira mbua lodu na ma-làpahu ku-habolangu haàtu anakeda mini. Pa-làngangu dàmbu lodu na kawini yiana na-habolangu-mbu haàtu anakeda mini.

¹⁹La hau na rudungu ba talànga mahuru-ma, dàngu nda harawuku-na yiana na kawini nanapu-nya na anana lundu nameti.

²⁰La paduaka rudungu ba talànga mahuru-nggu, hadangu-nanyaka yiana na kawini hi napiti-ya na ananggu welingu la karaha-nggu. Nuna na ananggu na-tuya la ngia pa-katuda-na nyuna, tàka na anana nyuna na mambàda meti na-bànjalu-ya la ngia pa-katuda-nggu nyungga.

²¹La haromu-na, ba ku-pawàla-ka dàngu ka ku-pahuhu-ya na ananggu ba wàngguka, kuita-ya ba mbàda meti-naka. Ba kukinju-yaka, ka nda jia-aya na ananggu,” wàna.

²²Na nyuna napanii na kawini haàtu, “Kambàliku-munya! Yiana na maluri ananggu nyungga-maya duku, nuna na mameti anamu nyumu-maya dumu!” wàna. Nahema na kawini na ma-wungangu, “Ndia-a! Nuna na mameti anamu nyumu-maya dumu, yiana na maluri ananggu nyungga-maya duku!” wàna. Tuna nuduka ba da-palumungu la hangga hanganji.

²³Hi napanii i Hanganji Halomu, “Ima-ràngga peka nyimi haàtu - haàtu ba ana-minya na maluri, tàka na mameti nda ana-aminya,” wànanja.

²⁴Ba panii tunaka nu paràhangu-nanyaka tau na hanganji papiti ha-panda.

²⁵Tunaka nu hi nahili panii na hanganji, “Kadipu padua-ya na ana rara na maluri dàngu wuanja maràngga ha-kadipu nimbihu-da nada da kawini!” wàna.

²⁶Ba narongu-yaka na pareta nuna, panii-naka na ina-mana duna nuna na ana rara, “Màtangu àru, dou Tamu Umbu manga-rangu, àmbu pameti-duya ni na ana rara. Wua bia-nyawa nyuna,” wàna. Hi panii tuna nu ba kanjupu namu-dunanya na anana. Na nyuna napanii na kawini haàtu, “Màla nyuna, kadipu biaya, màta ka àmbu haàtu-du welingu lai nyuma mangala-nya!” wàna.

²⁷Ka panii-naka i Halomu, “Àmbu pameti-duya na na ana rara! Wua-yawa la kawini na ma-wungangu — nyuna duna na inana,” wàna.

²⁸Ba narongu-ka na banjaru Ihirailu ruku-na na botangu-na i Halomu la palakara nuna, hangàtaru ndàba-danyaka dàngu tembi-danya i Halomu. Nadu, ba lohangu-nanyaka ba mbàda wua-nanyaka nyuna eti diha kana-ndingu paraïna i Ala la pabota palakara wàngu mamola.