Read Kambera 1 HANGANJI 5 Bible Online

1 HANGANJI 5 - Kambera bible

1 HANGANJI 5

¹I Hiràmu, na hanganji Tiruhu, dakàli pa-kanduangu-ma dàngu i Hanganji Ndautu. Ba tuna, ba narongu-ka i Hiràmu ba hanganji-yaka i Halomu hiluya i Ndautu, na amana, paràhangu-nanyaka pa-palewa-na lai Halomu.

²Ka pangàndi-nanyaka yiana na lii langu i Halomu lai Hiràmu,

³“Umbu Hanganji Hiràmu ma-mangarangu! Jiangu-maka dumu umbu ba mbàda pi-munyaka na amanggu i Ndautu ba nua naingu-na na-pabera lerangu rukuna ba na-kaporuku-nya muhu welingu la tana winggiru-ma. Tàka ba ndedi nawua-nya talu paraïna i MIRI la mbuu ndàba muhuna, nda ningu manggawangu-na pa-pahadangu uma ngia palumu-nya i MIRI na Alana.

⁴Tàka nàhu na MIRI Alanggu mbàda wuangu-naka mambiru la nggubulu tana ngaba pareta-nggu. Nda ningua mamuhu-ngga dàngu nda ni-ngumbu hanggàmaru manggàna-ya na ta-nanggu.

⁵Mbàda tuna yiaka na pa-njanjingu-na i MIRI la amanggu i Ndautu, ‘Na anamu mini na pawotu-nggu napa la pa-hanganji hilukau nyumu, napa na-pahadangu Uma lumungu ndumanggu Nyungga,’ wàna. Tuna nuduka dumu, umbu Hiràmu ma-mangarangu, nyungga yia Halomu, mbàda bota-nggunyaka la pa-pahada-nya nuna na Uma.

⁶Mbàda pimamu-nyaka umbu ba nda ningua la honga taunggu nyungga mapingu papunggu ai hama tuna da taumu nyumu umbu. Tuna nuduka, hi ku-kamahi-nggau umbu, paràha àru-kinja làti da taumu papunggu-ngga ai kajiu Limbanongu. Napa ku-paràha-nja da taunggu pa-pambapa dànja nyuda, dàngu pira bia wunda papanii-mu ndumada nuda da taumu, napa ku-mbayaru-maha duku,” wàna.

⁷Dira hàmuya na etina i Hiràmu ba nangala-nya na lii langu nuna, “Wotu-nyawa i MIRI la lodu nàhu ba mbàda wua-nanyaka i Ndautu haàtu anana mini ma-kanjupu manggàna panjadi hanganji la banjaru bokulu nuna,” wàna.

⁸Ka pangàndi-nanyaka yiana na hemana i Hiràmu lai Halomu, “Mbàda ngala-nggunyaka na lii langu pa-karaimu nyumu umbu dàngu ku-patunju-ya. Napa ku-payemangu ai kajiu Limbanongu dàngu ai kajiu pakàli wàngu nunjuya na pakarai-mu umbu.

⁹Napa da taunggu dapuru ngàndiha la tehiku nuda da ai welingu la Limbanongu. Napa lai nu da-pakaràndi rakitu-nja nuda da ai ka peku pamili-ha namatu hingi wara la pangia na pawuku-mu. Lai nu napa pa-weharuha da rakitu hi wuaha la taumu nyumu umbu ka da-paloku pangala-nja. Welingu lai nyumu umbu, kukarai-kau la pa-payema-nja pangangu da tau ihi umanggu,” wàna.

¹⁰Ka wua-nanyaka i Halomu paraïna i Hiràmu mbuu ndàba da ai kajiu Limbanongu dàngu da ai kajiu pakàli wàngu da pa-kalana-na.

¹¹Ka wuanja pangangu da tau ihi umana i Hiràmu, nimbihu ndaungu nawua-nya i Hiràmu paraïna i Halomu 322.500 kilu uhu nggàndumu, dàngu 4.400 litaru[5] mina haitungu weli wingungu.

¹²I MIRI na-pahàra-nya na njanjina hi nawua-nya eti diha kanandingu i Halomu. Ka pa-kandua hàmu etingu-danyaka i Hiràmu dàngu i Halomu hi datura pa-njanjingu pa-kadua-da na ruku lii pa-hamangu-da.

¹³Na-dundilu 30.000 tau mini welingu la nggubulu Ihirailu i Halomu ka daràma rondi,

¹⁴dàngu nawotu-ya i Anduniràmu ka natanggu hamata-ha nyuda. Nabiwa katailu banjaru-nja nyuda paraïna i Halomu, tau 10.000-ya nimbihu-da. Da-pandutu - pandutungu nuda da tailu banjaru pa-ndàdiku hau wulangu la Limbanongu dàngu dàmbu wulangu la uma.

¹⁵Na-dundilu-mbu tau 80.000 i Halomu ka da-kahebi watu welingu la palindi dàngu 70.000 tau maduku-ha nuda da watu.

¹⁶Nawotu 3.300 manduru ka da-hamata-ya nuna na paràma.

¹⁷La hupu liina i Hanganji Halomu da-kahebi watu - watu bokulu mamana - nandangu ka tunya latana na Umana i MIRI.

¹⁸Tuna nudaka da tau maràma-na nyuna i Halomu dàngu da tau maràma-na nyuna i Hiràmu dàngu da tau welingu la paraingu Nggembàlu ba da-payemangu watu dàngu ai pa-pahada wànya na Umana i MIRI.