Read Kambera 1 HANGANJI 6 Bible Online

1 HANGANJI 6 - Kambera bible

1 HANGANJI 6

¹La wulangu Hiu, nu na wulangu padàmbu wàna, la papatu wàna na ndaungu pareta-na i Halomu, 480 ndaungu la hambeli luhuna na banjaru Ihirailu welingu la Mehiru, pakiringu-nanyaka i Halomu pa-pahada-nya na Umana i MIRI.

²Na hukutu-na na Umana i MIRI mbara dalu tuna nu: 27 metiru nunjuna, 9 metiru ndàbaru-na, dàngu 13,5 metiru janggana.

³Na pangia ngia ngabana na Umana i MIRI 4,5 metiru ndàbaru-na, dàngu 9 metiru nunjuna, nu hamana na ndàbaru-na nuna na uma.

⁴La kangeli-na nuna na Uma ninja da katonga da ma-mbàlaru hanggangu hu dalu.

⁵La kangeli la kajia dàngu la karaha la hambeli-na pa-pandoingu kuru - kurungu ma-bonjangu da matailu nunggulu-da 2,2 metiru janggada nimbihu-da.

⁶Nimbihu-da da kurungu da mangia wawa 2,2 metiru mbàlaru-da, la nunggulu padàmbu wàna 2,7 metiru dàngu la nunggulu patailu wàna 3,1 metiru. Da kangeli la nunggulu mangia wawa darihi timbi welingu la kangeli la ditana, hi nda pajàra-a pa-pakobu-ha da kangeli Uma Ala ba tuha da patengangu-da da kurungu ma-bonjangu.

⁷Da patengangu nuda ai kajiu Limbanonguha da pawàngu. Da pindu la kurungu ma-bonjangu da mangia wawa la mbara luruha, dàngu hanggangu la nunggulu padàmbu wàna dàngu la patailu wàna ningu panongu hawunjilu. Tunaka nu tuna-nyaka na hindina na uma i Halomu ndumana nuna wua aharu dàngu kapambalu ai kajiu Limbanongu pawàngu. Nu ba talànga padaha-nya na Umana i MIRI, nda paana ronguma lingu palu tukulu, kataka jàka ndia pakakahu bahikai, nadu da watu pa-pahada wànya na uma pambàda pandoi haha-mahaka la ngia paàki - ngia paàkiha. Tuna nu duka ba na-pahada-nya na uma paraïna Halomu hi lupa na-palundu-nya.

¹¹Ka panii-nanyaka i MIRI lai Halomu,

¹²“Jàkau nunjuha mbuu ndàba da uku dàngu da hupu liinggu, napa kuwunda-nggauha da pambàda njanji-nggunya na amamu i Ndautu.

¹³Ku-ndàdiku napa la Uma pa-pahada-mu yiana dàngu ni mànu-mangga la honga banjaru-nggu na Ihirailu. Nda jia dunjaku-anggunya,” wàna.

¹⁴Tuna yiaka ba na-palundu-nya na pa-hadangu Umana i MIRI i Halomu:

¹⁵Mbutana na karaha kangeli mbara dalu nandàni wànya kajiu Limbanongu piti welingu la latana lundu la hindina. Na latana pa-pandoi welingu la ai kajiu pakàli wànguya.

¹⁶Nu daa la Uma, na mangia lua pa-pandoingu kurungu-ya ba wàngu patunya dindi padira welingu la ai kajiu, piti welingu la latana lundu la hindina. Na kurungu nuna pa-patamungu Rowa Mahupu Matua-ya; hiwa metiru nunjuna.

¹⁷Na rowa la ngabana na Rowa Mahupu Matua, Rowa Bokulu wàdanya dàngu 18 metiru nunjuna.

¹⁸Da kangeli mbara daluna nggubulu-na na uma pandàni wàngu ai kajiu Limbanongu-ha hi nda pa-ana ita-maha da watu kangeli-na. Nuna na ndànina pa-pamanandangu wàngu huratu wua karobu dàngu wàla ai - wàla ai hanggebaru-ya.

¹⁹Na Rowa Mahupu Matua na pa-pandoi nu daa la Umana i MIRI pa-payemangu-ya ndumana na Pàti Pa-ràndingu-na i MIRI.

²⁰Na nunjuna, na ndàbaru-na dàngu na janggana nuna na rowa da maràngga hiwa metiru. Na ngia pawotu maraku la ngabana na Rowa Mahupu Matua pa-pandoi welingu la ai kajiu Limbanongu-ya. La pindu tama hanggangu la rowa nuna pa-walangu kanàtaru-ya. Mbutana na kuruna na Umana i MIRI papohu-nya na Rowa Mahupu Matua dàngu na ngia pawotu maraku-na pata-palungu àmangu raraha.

²³Nu daa la Rowa Mahupu Matua patu-mbuha ba dàmbuda da kahala hada patau awangu[6] pa-pandoi welingu la ai haitungu. Nu da dàmbu kahala hada da maràngga 4,4 metiru janggada;

²⁴na hukutu dàngu na hadada hama-mada. Maràngga ningu ruu kàpada, nimbihu-da nu da ruu kàpada 2,2 metiru malaida. Da-tawangga ruu kàpada nimbihuda nuda da kahala hada welingu la hupu hapapa lundu la hupu hapapa 4,4 metiru-da.

²⁷Nuda da dàmbu kahala hada pa-bànjalu paperangu-ha la Rowa Mahupu Matua hi lupa da hapapa ruu kàpada da maràngga jonggaru dindingu, dàngu da hili hapapa ruu kàpadai da maràngga pa-jonggaru la paduana nuna na rowa.

²⁸Nuda da dàmbu kahala hada patau awangu pa-tapalungu àmahu raraha nimbihu-da.

²⁹Nggubulu-da da dindingu mbara daluna na Umana i MIRI pa-manandangu wàngu huratu kahala hada patau awangu, pingi wola dàngu wàla ai hanggebaru-ha.

³⁰Na latana na Umana i MIRI nggubulu-na pa-tapalungu àmahu rara-mbuya.

³¹La pindu tama hanggangu la Rowa Mahupu Matua pa-pakànangu du mbàla ndàbi pinduya welingu la ai haitungu. La mbara ditana na pindu na-pahokalu manuhu-kungu la padua-na

³²Pa-huratungu kahala hada patau awangu, pingi wola dàngu wàla ai hanggebaru-ha nuda da dua mbàla ndàbi pindu. Da ndàbi pindu, da kahala hada patau awangu dàngu da huratu pingi wola, nuda mbuu ndàbada pa-tapalungu àmahu raraha.

³³La pindu tama hanggangu la rowa mangia ngaba, nu na rowa bokulu, patungu halaya pindu da-palara kapatungu madita welingu la ai haitungu.

³⁴Dàngu pa-pandoingu-mbuya dua mbàla ndàbi pindu papeku làpitu welingu la ai kajiu pakàli wàngu.

³⁵Pa-huratungu patau awangu, pingi wola dàngu wàla ai hanggebaru-ha nuda da ndàbi pindu ba pa-mananda-nja. Mbuu ndàbada nuda da pa-huratu pa-tapalungu àmahu raraha.

³⁶La hanggana na Umana i MIRI patungu talora-ya. Nuna na talora pa-winggiru wàngu kangeli mapanda - ndàningu-ya; la pinu nimbihu tailu ndàni watu, ningu hàndani ai kajiu Limbanongu.

³⁷Ba tuya na latana na Umana i MIRI wulangu Hiuya, nu na wulangu padàmbu wàna, la papatu wàna na ndaungu pareta-na i Halomu.

³⁸Tàka la wulangu Mbulu, nu na wulangu pawalu wàna, la pa-hakambulu hau wàna na ndaungu pareta-na, palundu-nanyaka na pahada-nanya na Umana i MIRI paraïna i Halomu, jia-maya hama tuna na pambàda kàkatu. Pihu mbua ndaungu mandaina ba pahada-nya nuna na Uma.