Read Kambera 1 HANGANJI 7 Bible Online

1 HANGANJI 7 - Kambera bible

1 HANGANJI 7

¹Na-pahadangu-mbu uma hanganji nduma wikina i Halomu. Hakambulu tailu mbua ndaungu mandaina ba na-pahada-nya nuna na uma hanganji-na i Halomu.

²Nu la uma hanganji natunya rowa ma-tamungu “Hanamba Omangu Limbanongu”[7] Na hukutu-na: 44 metiru nunjuna, 22 metiru ndàbaru-na, dàngu 13,5 metiru janggana. Nuna na hanamba tailu ndalaru-da da kambaniru ai kajiu Limbanongu; nimbihu ndalaru hakambulu limada da kambaniru tàka la ditada patungu huku ai kajiu Limbanongu-ha. Na hi-ndina pa-pandoi welingu la ai ma-hamangu-mbuya ma-pahangindi-nja da huku.

⁴La dindingu la kalai kawana-na na hanamba ninja da katonga: tailu ndalaru la hau dindingu da-patubangu dàngu da tailu ndalaru la dindingu hau. Da halaya-da da pindu dàngu da katonga da-palara ka-patungu madita.

⁶Na-pahadangu-mbu “Rowa Kambaniru Watu” i Halomu. Na nunjuna nu na rowa 22 metiru-na tàka na ndàbaru-na 13,5 metiru-na. La hanggana nuna na rowa ningu kawindu maningu kambaniru watungu dàngu pa-nonguna.

⁷Na hili hau rowai jiaya na “Rowa Kanjàka Pareta”, Rowa Pangandilangu wàda-mbunya. Yiana na rowa pa-pandàningu wàngu ai kajiu Limbanongu-ya piti welingu la latana lundu la hukuna. La rowa yiana-ka na ngia pabota-na palakara - palakara la ngera pangandilangu i Halomu.

⁸Na ngia pa-ngiangu-na i Halomu pawulu hama tuna da uma hawiangu-ya, tàka na pangia-na la hili hau talora la kajia Rowa Pangandilangu-ya. Ndumana na papaha-na, nu na ana hanganji Mehiru, na-pahadangu-mbu uma ma-hamangu i Halomu.

⁹Mbuu ndàbada nuda da uma, hamangui na talora nggailaru-na piti welingu la latana lupa la toku ndidungu, pa-pandoi welingu la watu mamana - nandangu-maha. Nuda da watu pa-pandoi hahangu-ha la ngia paàki watu, dàngu pa-kadipu-ha kikunja da hukutu-da; da kambu dàngu da kajia-da pa-pamirihu wàngu rondangu-ha.

¹⁰Da latada nuda da uma pa-pandoi welingu la watu - watu bokulu ma-pawilingu-ha. Nuda da watu ningu matailu paradua metiru nunjuda, ningumbu mapatu metiru-da.

¹¹La pinuda patuha da watu hawiangu da ma-pawilingu dàngu da pa-kadipu kikunja da hukutu-da, hi pitaku wànja ai kajiu Limbanongu.

¹²Na talora uma hanganji dàngu na talora mbara dalu la Umana i MIRI dàngu na rowa mangia ngabana ningu kangeli-da pa-pandàningu wàngu handàni ai kajiu Limbanongu la nimbihu tailu ndàni watu.

¹³La paraingu Tiruhu ninya na haàtu mini ma-tamungu Huràmu. Hupu mapingu làngatàka-ya dàngu kanjupu manyàmungu-ya la patuku mà - màtu kanaingu welingu la parunggu. Na amana na mambàda meti tau Tiruhu-mayai dàngu hupu mapingu-mbuya la patuku kanaingu welingu la parunggu. Na inana kabihu Nàputali-ya. Mbàda paràhangu-naka tau i Hanganji Halomu palua pa-ngàdalu-ya i Huràmu ka namai panjadi liku uru la mbuu ndàba paràma ba tuku kanaingu welingu la parunggu. Ka mai-nanyaka i Huràmu hi naràmaha da pakarai-na i Halomu.

¹⁵Nalala dua mbungu kambaniru parunggu i Huràmu, na janggada nimbihu-da walu mbua metiru-da dàngu 5,3 metiru kili kuluruda, tàka da timbina da parunggu 7,4 hiti-metiru-da. Nuda da kambaniru dakubu da unuda.

¹⁶Nalala-mbu dàmbu tubuku kambaniru welingu la parunggu ndumada nuda da dua mbungu kambaniru, nimbihu-da 2,2 metiru janggada

¹⁷da-pahada wàla mangàtangu ma-1,8 metiru janggada. Nimbihu hupu ditada da kambaniru pa-pamanandangu wàngu dua ndalaru wua njalima welingu la parunggu. Nggubulu-da dua ngahu wua njalima la nimbihu hupu dita kambaniru. Hàlaka nu kalipa-nanya lulu àmahu parunggu i Huràmu hi natuha la hupu ditada da kambaniru. Pihu walangu lulu àmahu parunggu la nimbihu hupu dita kambaniru, tàka la pinu lulu àmahu nunambu ningu hau lata ma-kawunggilu. La pinuda da lata kawunggilu yiada-duka

²¹da ngia patuha la kambaniru nuda da tubuku kambaniru da mapahada wàla mangàtangu. Nuda da kambaniru natuu ngia ngabaha la pindu tama Umana i MIRI — na hapungu la mbara luruya, tàka na hapungui la mbara diaya. Na mangia luru na-patamu-nya Yakingu,[8] tàka na kambaniru mangia dia na-patamu-nya Mbowàhu.[9] Tuna nuduka i Huràmu ba na-palundu-nya na pandoi-ha nuda da kambaniru.

²³Tunaka nu pandoi-nanyaka hau karaba kawori i Huràmu welingu la parunggu, na hukutu-na tuna nu: na manjolungu-na 2,2 metiru, welingu la karaha hapapa-na lundu la karaha hapapa hauna 4,4 metiru-na dàngu na kili kuluru-na 13,2 metiru-na.

²⁴Tàka na halinggi karaha-na nuna na karaba pa-manandangu wàngu dua ndalaru wua karobu-ya palala pa-kariangu-ha dàngu nuna na karaba.

²⁵Nuna na karaba pa-bànjalu la pinu wunggu hakambulu dua ngiu hapi parunggu-ya — tailu da-hanggangu hu dia, tailu hu luru, tailu la patama lodu, dàngu tailu la pahunga lodu.

²⁶Na timbina nuna na karaba 75 mili metiru-na. Na halinggi-na hama tuna halinggi maku ma-hangebalu hama wàla mangàta ma-hanggebaru-ya. Nuna na karaba na-ihingu ràkangu 40.000 litaru wai.

²⁷Na-pandoi-mbu hakambulu kareta ndema welingu la parunggu i Huràmu. Nimbihu-da nuda da kareta ndema da nunjuda dàngu da ndàbaru-da da-maràngga 1,8 metiru, tàka na janggada 1,3 metiru.

²⁸Nuda da kareta kapambalu parunggu ma-kapatungu kabihu-ha da patuu la halaya-da.

²⁹Nuda da kapambalu pa-huratungu hinga, hapi dàngu patau awangu-ha. La halaya - halaya-na — la dita dàngu la wawada da nggàmbaru hinga dàngu hapi — da-kawiwalu da huratu wàla ai pa-unangu.

³⁰Nimbihu-da nuda da kareta ndema, pa - patuda da ndutungu-da dàngu tandai ndutungu ma-welingu la parunggu-mbu. La patu kabihu-da nuda da kareta ndema ningu kambaniru tula welingu la parunggu dàngu wàla ai pa-unangu pa-manandangu wàda la karaha - karaha-da.

³¹La hupu ditada da patu kambaniru tula da-pandekilungu la hau halaya manjadi kalukuru matema-ya na mbàluna. Nuda da kambaniru tula da-manyori 44 hiti metiru la pinu kapambalu parunggu pa-kabihungu, dàngu 22 hiti metiru la lumbuna. La ngaruna nu na halaya pa-hurutu-ya.

³²Da ndutungu-da 66 hiti metiru janggada. La lumbu kapambalu parunggu-ha da pangia-da. Da tandai ndu-tunguda dàngu da kareta ndemada da-panuangu.

³³Da ndutungu-da hama ndutungu kareta pabera-ha; da kuluru ndutungu, da kaleki ndutungu, da tandai ndutungu dàngu da pingi kaleki ndutungu-da pa-pandoi welingu la parunggu ndàbaha.

³⁴La lumbu nimbihu kabihu-da nuda da kareta ndema ninja ba patuda da ngia payàpa ma-panuangu la kareta-da.

³⁵La winggiru pinuda da kareta ndema ningu halinggi-da, 22 hiti metiru mbàlaru-da; da kambaniru tulana dàngu da kapambalu parunggu-na da-panuangu dàngu kareta ndemana.

³⁶Da kambaniru tulana dàngu da kapambalu parunggu pa-pamanandangu wàngu nggàmbaru patau awangu, hinga dàngu pingi - pingi wola la nggi bia na mabulu ndumada nuda, pa-kariangu wàla ai paunangu la winggiru-na.

³⁷Tuna nuduka ba pandoi-ha nuda da kareta ndema. Hama ndàba-mada — hamada da hukutu-da dàngu da hadada.

³⁸Na-pandoi-mbu hakambulu mbàlu bokulu i Huràmu, da-maràngga hau da kareta ndema. Nimbihu mbàlu 1,8 metiru-na welingu la karaha hauna lundu la karaha hapapa-na, dàngu 800 litaru wai ihina.

³⁹Ba natuha da kareta ndema i Huràmu, la mbara luru Umana i MIRI-nanja da lima mbua, tàka da lima mbua mbara dia-nanja. Na karaba parunggu natuya la kabihu mbara luru pa-haritungu la pahunga.

⁴⁰Na pandoi-mbu kawalu, hakòpu dàngu tobu robu i Huràmu. Hàlaka nu lundungu-danyaka mbuu ndàba da paràma-na lai Halomu nduma Umana i MIRI. Yiada da ma-pandutungu jiaha da kanaingu pa-pandoi-na: Dua mbungu kambaniru bokulu Dua tubuku kambaniru da patuu la kapuka-da da kambaniru da madua mbunguda Lulu àmahu parunggu pa-kalipa la nimbihu tubuku kambaniru Patu ngahu njalima parunggu da pa-wandalu la dua ndalaru nimbihu-da hangahu njalima la winggiru lulu àmahu pa-kalipa la nimbihu tubuku kambaniru Hakambulu kareta ndema Hakambulu mbàlu bokulu Karaba parunggu Hakambulu dua ngiu hapi parunggu mandema-ya na karaba Kawalu - kawalu, hakòpu - hakòpu dàngu tobu robu - tobu robu. Mbuu ndàbada nuda da kanaingu Umana i MIRI da pa-pandoi-na i Huràmu ndumana i Halomu pa-pandoi welingu la parunggu-ha, pauda lundu da-kalilangu.

⁴⁶La hupu liina na hanganji, mbuu ndàbada nuda palala-ha la ngia palala bàhi la hau pangia la henaku-na Hukutu dàngu na Hàratàngu la Lolangu Yorundangu.

⁴⁷Nda na-paràhangu-a patimba-nja paraïna i Halomu nuda nu da parunggu, ba lalu danguda. Ba tuna, da mbotuda nuda da banda nda papi-anja.

⁴⁸Na-paràhangu-mbu i Halomu pa-pandoi kanaingu àmahu rara nduma Umana i MIRI. Hama tuda yiada da ma-pandutungu: Ngia pawotu maraku Menja nduma roti pa-mangejingu lai Ala Hakambulu tandai palita da pa-pandolaku la hangga Rowa Mahupu Matua, lima mbara luru dàngu lima mbara dia Wàla ai - wàla ai Palita - palita Ngepi - ngepi Tobu robu - tobu robu Papàda wàngu palita Moku - moku Kawinga - kawinga dupa Kanai wàla epi Kaleki pindu ndumana na pindu Rowa Mahupu Matua dàngu da pindu hambeli-na na Umana i MIRI.

⁵¹Ba na-palundu ndàba-njaka i Halomu na pahada-nanya na Umana i MIRI, bànjalu-nahaka la nggu - nggundangu-na nuna na uma, mbuu ndàba da àmahu bara, da àmahu rara, dàngu da banda hawiangu da pambàda wotuna lai MIRI i Ndautu amana.