Read Kambera 1 HANGANJI 8 Bible Online

1 HANGANJI 8 - Kambera bible

1 HANGANJI 8

¹Hàlaka nu paau-nanjaka da ngora kabihu i Halomu ka damai lai nyuna la Yeruhali papiti-ya na Pàti Pa-ràndingu-na i MIRI welingu la Hiungu, na paraingu-na i Ndautu, ka ngàndiya la Umana i MIRI.

²Ka mai-danyaka nyuda mbuu ndàbada la Lodu Remi Maü ma-paraungu la wulangu Etanimu.

³Ba da-pauhi ndàbaka da ma-pangora danda-danyaka na Pàti Pa-ràndingu paraï da ratu ba hapajiaha,

⁴hi dangànji-ya la Umana i MIRI. Da-paleli-mbunja la Umana i MIRI na Maü Terana i MIRI dàngu da kanaingu-naka paraï da ba hapajia-ha da tau Lewi dàngu da ratu.

⁵Pauhi-danyaka la hangga Pàti Pa-ràndingu i Hanganji Halomu dàngu nggubulu-na na banjaru Ihirailu hi dawotu maraku lai MIRI mbimbi dàngu hapi ma-kanjupu danguha hi lupa nda pataü padiha-ha.

⁶Hàlaka nu ngàndi-danyaka hu daa la Umana i MIRI na Pàti Pa-ràndingu paraï da ratu ba hapajia-ha hi da-bànjalu-ya la Rowa Mahupu Matua la lumbuda da kahala hada patau awangu.

⁷Da ruu kàpada nuda da kahala hada da-tawàlahu pa-pamaü-nya na pàti dàngu da ai paduku wànya.

⁸Paraï pa-madita nuda da ai paduku wàngu peku itaha da hupuda welingu la hangga Rowa Mahupu Matua. (Lundu lodu nàhu ni-manjapa nuda da ai lai nu.)

⁹Hinggilu-da da watu kapipi nda hili nggàra-a maningu daa la Pàti Pa-ràndingu. Nuda da watu papuhi-na i Muhaha lai nu la Palindi Hinai ba natura pa-njanjingu dàngu banjaru Ihirailu i MIRI ba jiaya na luhuda welingu la Mehiru hanggangu la tana Kanaàngu.

¹⁰Ba daluhu ndàbaka da ratu welingu la Umana i MIRI hi jia hibu bia-nanya karumangu nuna na uma.

¹¹Nuna na karumangu na-kalilangu wànya na bokulu-na i MIRI ba ninya, hi nda peku tama belida pa-pahàrangu wai ngabada da ratu.

¹²Ka hamayangu-nanyaka i Halomu, “Ou MIRI, Nyumuma matuya na mata lodu la awangu. Ba tuna urihi mbuhangu bia pa-ngiangu la kapàtangu karumangu.

¹³Nàhu kuwulu-nggau uma manandangu, ngia pa-ngiangu-mu lundu nu - nu,” wàna.

¹⁴Ba nahàla-ka pa-hamayangu, pambeli hangga-nanyaka i Halomu nggubulu-na na rayatu na ma-talànga ndolaku lai nu hi nakarai-nja kanyuru-na i Ala.

¹⁵Napanii i Halomu, “Tuna yia àmangu ba na-panjanjingu i MIRI la amanggu i Ndautu, ‘Piti welingu ba kuluhu karia-nya na banjaru-nggu welingu la Mehiru, nda ningua hau paraingu la nggubulu tana Ihirailu pambàda pindinggu ka wulu niya na uma ngia palumu-ngga. Tàka mbàda pindinggu-nggauka nyumu, Ndautu, pa-pareta-ya na banjaru-nggu,’ wànanya. Pa-wotungu-ya i MIRI Ala Ihirailu na mambàda pahàra-nya nu na pa-njanjingu-na!” wàna.

¹⁶

¹⁷Hàla hili panii pa-ngalangu-nanyaka i Halomu, “Mbàda wuku-nanyaka paraïna amanggu i Ndautu pa-pahadangu uma lumungu lai MIRI Ala Ihirailu.

¹⁸Tàka i MIRI napanii-nya nyuna, ‘Nahàmu-ma na pawuku-mu.

¹⁹Na nyuna nda nyumua, jiaya na anamu duna na ma-pahada-nya napa na umanggu,’ wànanya.

²⁰Nu, pahàra-nanyaka nàhu i MIRI na pa-njanjingu-na. Mbàda hanganji Ihirailu-kaka nyungga hiluya na amanggu, dàngu mbàda pahadangu-ngguka uma lumungu ndumana i MIRI na Ala Ihirailu.

²¹Nu daa la Umana i MIRI mbàda payema-nggunyaka pangia-na na Pàti Pa-ràndingu na pa-paihingu watu pa-njanjingu-na i MIRI dàngu da boku la mangilu-nda ba jiaya naluhu karia-nanja welingu la Mehiru,” wànanya.

²²Hàlaka nu, ba talànga ita mata-nanya paraïna banjaru na maninya, pambeli hanggangu-nanyaka i Halomu la ngia pawotu maraku hi na-wulaku-ha hu dita da limana,

²³hi na-hamayangu, “Ou MIRI Ala Ihirailu! La awangu jàka ndia la tanambu nda ningua mahama-nggau Nyumu! Nyumu upahàrangu pa-njanjingu-mu dàngu upaloha-nya na mbuha-munya na banjaru-mu na ma-tuturu mànu dàngu na ma-manundu weli etingu lai Nyumu.

²⁴Mbàda katundu-munyaka na pa-njanjingu-mu la amanggu i Ndautu; la lodu nàhu nimbihu-da nuda da pambàda tikimu mbàda pahàra-munjaka.

²⁵Mbàda pa-njanjingu-mbumuka la amanggu, jàka da-manundu langatàka da ana umbuku-na hama tuna nyuna, napa ningu mànuma haàtu welingu la ana umbuku-na na ma-hanganji la Ihirailu. Nàhu, ou MIRI Ala Ihirailu, ku-kamahi-nggau màtawa mbuu ndàba da panjanji-munya na amanggu i Ndautu, na atamu, kau pahàra-mbunja, wàna.

²⁶

²⁷Na nyuna, ou Ala, langatàka-ma nu ba peku ndàdiku-mu la pinu tana yiana? Jiapa na awangu nggubulu-na nda natoma-a nggailaru-na ndumamu Nyumu, ka rihi-amaka na uma lumungu pambàda pahada-nggu yiana!

²⁸Ou MIRI, Alanggu, ata-mamungga! Jiapa kai ba tuna tanaü àru-kiya na hamayangu-nggu dàngu kataku àruya na pakarai-nggu la lodu nàhu.

²⁹Màla àruki kau mangganya la lodu la rudungu yiana na uma lumungu pambàda pindimu ndumamu Nyumu. Hamangui jàka ma-hamaya hanggangu la uma yiana, nyungga dàngu na banjaru-mu, màla àruki kau tingi-kama welingu la ngia pa-ngiangu-mu la awangu dàngu kau jàma àru nggama, wàna.

³⁰

³¹Jàka ningu haàtu tau pa-panjala ba ningu njalana la haàtu tau hawiangu, tàka hi karia-nya la ngia pawotu maraku lai Nyumu daa la uma lumungu yiana ka na-harangu ba nda nanjala-a,

³²ou MIRI, màla kau rongu àruki la awangu dàngu kau botaya na palakara-da da atamu yiada. Màla àruki kau-panggàna-nya hukungu ma-paràkangu na manjala, tàka na manda njala kau pamara-ya, wàna.

³³Jàka na-pakàku-ya muhu na banjaru-mu na Ihirailu rukuna ba danjala, hàla hi damai beli lai Nyumu dàngu hi da-maraku-nggau ba MIRI-kau, hàla hi damai la uma lumungu hi da-hamayangu pakarai-ya na jàmangu njala lai Nyumu,

³⁴màla àruki kau tingiha welingu la awangu. Màla àruki kau jàmanya na njala banjaru-mu yiana, dàngu kau karia belinja la tana pambàda wua-munja da boku la mangilu-da, wàna.

³⁵Jàka nanjala na banjaru-mu lai Nyumu tàka hiu hukunja wàngu nda pa-purungu-mu urangu hàla hi da-panjilungu welingu la njalada dàngu hi da-maraku-nggau ba MIRI-kau tàka hi damai la uma lumungu pa-hamaya-nggau Nyumu,

³⁶Màla àruki kau tingiha welingu la awangu. Dàngu jàmanya na njalana na banjaru-mu na Ihirailu dàngu na hanganji-da. Pepaka-nja pawunda-ya na ma-padeningu. Hàlaka nu papura-nyawa urangu yiana na tanamu ou MIRI, na tana pawua-munya na banjaru-mu ka damangu-nya lundu nu - nu.

³⁷Jàka natungu na rimbangu jàka ndia na hidu pa-nggàbalungu la tana yiana, dàngu jàka daruha da ihi woka la ngilu mbana, la mabohu jàka ndia la kabala, jàka na-nàhaku-ya muhu na banjaru-mu jàka ndia nanggàna-ya kanyaki,

³⁸màla àruki kau tingiya na hamayangu-da. Jàka era ningu ma-hawina la honga banjaru-mu na Ihirailu hi na-hamayangu lai Nyumu ba nawàngu pa-pandemangu limana la uma lumungu yiana,

³⁹màla àruki kau tingiha welingu la pangia-mu la awangu dàngu kau jàmanja da njalada dàngu kau ndulaha nyuda. Didi-akau Nyumu mapinya na wini eti tau. Jia ba tuna wunda-yawa la nimbihu tau jàka nggàraya na ma-paràkangu lai nyuna,

⁴⁰ka na-karadaku mànunggau banjaru-mu ba da-ngiangu la tana pawua-munja da boku la mangilu-ma, wàna.

⁴¹Jàka ningu haàtu tau hangàdangu la tana hau paraingu mamarau marongu-ya rukuna na bokulu-mu Nyumu dàngu rukuda da pa-hangàtarungu da pambàda wunda-munya na banjaru-mu, hàla hi namai la uma lumungu yiana pa-maraku-nggau dàngu ka na-hamaya-nggau Nyumu,

⁴²

⁴³màla àruki kau tanaü-ya welingu la pangia-mu la awangu na hamayangu-na dàngu kau kataku-ya na pa-karaina. Ka tanda ndàba-nanggauka banjaru la nggubulu pinu tana hi da-karadaku-nggau Nyumu hama tuna na banjaru-mu na Ihirailu. Napa nyuda dapinya ba ngia pa-lumungu lai Nyumuya yiana na uma pa-pahada-nggu, wàna.

⁴⁴Jàkau paràha-nya palua pa-pabera pa-hanobaku muhu na banjaru-mu, ka da-pambeli hangganya welingu la nggi biaha yiana na paraingu paleha-mu hi da-hamaya hanggangu la tubana yiana na uma pambàda pahada-nggu ndumamu Nyumu,

⁴⁵utingi àru-kiya la awangu na hamayangu-da nyuda, dàngu kau wuanja talu.

⁴⁶Jàka nanjala na banjaru-mu lai Nyumu — langatàka ba nda ningu-a haàtu manda njala — hàla rukuna na hànggamu upulinya na muhu pa-pakàku-ha nyuda, hi dangàndi-ha nyuda pa-tanawa-nja la tana mamarau jàka ndia la ma-mareni,

⁴⁷màla àruki kau tingiya na hamayangu-da. Jàka da-dunjaku njaka da njalada ba ninja la tana nuna, tàka hi da-hamaya-nggau ba dàngu pekada ba tuba njala-daka dàngu ba mbàda akatu-daka, tingi àru-kiya na hamayangu-da ou MIRI.

⁴⁸Jàka weli eti weli puhu-mada la tana nuna pa-dunjaku-nja da njalada, hi da-hamaya-nggau ba dàngu hanggangu-da la tana yiana na pawua-munja da boku la mangilu-ma la tubana na paraingu paleha-mu dàngu yiana na uma lumungu na pambàda pahada-nggunggau Nyumu,

⁴⁹màtawa na hamayangu-da kau tingiya welingu la pangia-mu la awangu dàngu kau milanja eti.

⁵⁰Màla àruki kau jàmanja mbuu ndàba da njala dàngu da akatu-da lai Nyumu, dàngu kau pawiti-nya ka dahàmu-nja muhuda.

⁵¹Nyuda banjaru wiki-mamunja da pambàda luhu ngàndimu welingu la Mehiru na tana ngia pa-pamayila-ha.

⁵²Màla àruki Nyumu, ou MIRI Ala, kau hamata mànuya na banjaru-mu na Ihirailu dàngu na hanganji-na. Dàngu kau orangu àruki pa-tanaü-ya na hamayangu-da handàka wara - handàka warada pakarai pa-ndulangu lai Nyumu.

⁵³Welingu la honga mbuu ndàba banjaru mbàda leha-muhaka nyuda panjadi banjaru wikimu, hama tuna na pambàda panii-munja nyuda la ngaruna na atamu i Muha, ba talànga iru ngàndi-muha da boku la mangilu-ma paluhu welingu la Mehiru,” wàna.

⁵⁴Tuna nuduka ba na-hamayangu i Halomu ba dàngu patika-na la hangga ngia pawotu maraku ba nawàngu pa-pandemangu limana hu dita. Hàlaka nu hi na-ndolaku

⁵⁵dàngu wàngu pa-kodungu-na ba nakarai kanyuru welingu lai Ala ndumana mbuu ndàba na tau na ma-pauhi lai nu, hi napanii,

⁵⁶“Pa-wotungu-ya i MIRI na mambàda wuanya mambiru na banjaru-na hama tuna na pambàda njanjina la ngaruna i Muha na atana. Mbuu ndàbada da mahàmu da panjanji-na mbàda pahàra-nanjaka.

⁵⁷Màla àruki i MIRI Alanda ka na-karia-nda nyuta hama tuna ba mbàda karia-nanja da boku la mangilu-nda. Màla àruki ka àmbu na-dunjaku-nda nyuta.

⁵⁸Màla aruki ka na-panjadi-ta tau ma-tuturu lai Nyuna ka taluri nunju mànuya na pambuha-na dàngu ka ta-karadaku la mbuu ndàba uku dàngu da hupu liina da pambàda wua-nanja da boku la mangilu-nda.

⁵⁹Màla àruki i MIRI, na Alanda, ka nanamu mànuya na hamayangu dàngu na lii kamahingu yiana na pa-patàka-nggunya Nyuna. Màla àruki ka na-pajiliku mànunya na màja etina la banjaru Ihirailu dàngu na hanganji-na wàngu ngga - nggàra pa-kalana-da hau lodu - hau lodu.

⁶⁰Ba tuna nu pi-nanyaka napa paraï banjaru la pinu tana ba didi-aya i MIRI na Ala nda hili ningua hawiangu.

⁶¹Màtawa nyimi, banjaru-na, kai tuturu mànu lai MIRI, na Alanda dàngu kai karadaku-nja da uku dàngu da hupu liina hama tuna na pawunda-mi la lodu nàhu,” wànanja.

⁶²Hàlaka nu wotu-danyaka maraku lai MIRI i Hanganji Halomu dàngu mbuu ndàba na tau ma-pauhi lai nu.

⁶³Nduma kameti maraku papeku nawotu maraku 22.000 hapi dàngu 120.000 mbimbi i Halomu. Tuna nuduka na hanganji dàngu na banjaru Ihirailu nggubulu-na ba dawunda-ya na lii katua-ya na Umana i MIRI.

⁶⁴La lodu numbu ba nawunda lii i Halomu pa-katua-ya na hanamba la hangga Umana i MIRI. Tunaka nu wotu-nanyaka maraku patunu nu la talora, maraku uhu nggàndumu, dàngu aparu-da da banda kameti maraku papeku. Mbuu ndàbada nuda pawotu lai nuha nadu na ngia pawotu maraku ma-welingu la parunggu lalu kuduna nduma mbuu ndàbada nuda da kameti.

⁶⁵Lai nu la Umana i MIRI i Halomu dàngu nggubulu-na na banjaru Ihirailu dambabu-nya na Remi Maü ma-paraungu pihu mbua lodu mandaina. Kanjupu danguya na tau ma-pauhi lai nu. Welida la ngaba tana mamarau piti welingu la Ànda Hamàtu mbara dia lundu la padira Mehiru mbara luru.

⁶⁶La lodu pawalu wàna pahia-nanyaka pabeli na tau paraïna i Halomu. Nyuda mbuu ndàbada dawotu-nya nyuna hi damàngu pabeli la umada dàngu mbaha etida rukuna mbuu ndàba na kanyuru pambàda wuana i MIRI la atana i Ndautu dàngu la banjaru-na na Ihirailu.