Read Kambera 1 HANGANJI 9 Bible Online

1 HANGANJI 9 - Kambera bible

1 HANGANJI 9

¹Ba na-lundungu-ka na pahadangu-na Umana i MIRI i Halomu dàngu na uma hanganji dàngu mbuu ndàba na pawuku-na,

²nahili pa-wuwangu wikina i MIRI lai Halomu hama tuna na manjadi la Nggimbiungu.

³Napanii i MIRI lai Halomu, “Mbàda rongu-nggunyaka na hamayangu-mu, tàka nàhu paloha-nggunyaka, na uma na pambàda pahada-mu yiana pa-pahinggilu-ya lundu nu - nu ka ngia pa-lumungu lai Nyunggaya. Napa ku-hamata-ya dàngu kudai mànuya yiana na uma.

⁴Jàka wàngu tànji etimu bau lumungga Nyungga hama tuna na amamu i Ndautu, hiu karadaku-nja da ukunggu dàngu da hupu liinggu,

⁵napa ku-pahàra-nya na panjanji-nggunya na amamu i Ndautu, ba ningu mànuma haàtu welingu la ana umbuku-na napa ma-hanganji la Ihirailu.

⁶Na nyuna jàkai taluru-ngga Nyungga, nyumu jàka ndia da ana umbuku-mu dàngu ndai karadaku-nja da ukunggu dàngu da hupu liinggu tàka hii lumungu kamàla ala,

⁷napa ku-payila-nya na banjaru-nggu na Ihirailu welingu la tana pambàda wua-nggunja nyuda. Napa ku-dunjaku-mbunya yiana na uma na pambàda pamàndu-nggu la pa-pahinggilu-ya ka ngia pa-lumungu lai Nyunggaya. Napa pa-pawawa dàngu pa-paakangu-ya la nggi - nggini na tau Ihirailu.

⁸Napa nanjadi-ya tanyungguru watu yiana na uma lumungu hi lupa na-hangàtaru dàngu na-katàtaku nimbuhu-na na tau na malii lai nu, ‘Ka nggikina hi tuna nu na pawunda-na i MIRI ni la tana yiana dàngu ni la uma yiana?’ wàda ba dapanii.

⁹Hi nahema napa na tau, ‘Rukuna ba mbàda dunjaku-danyaka i MIRI na Alada, na mambàda karia-nja da boku la mangilu-da welingu la Mehiru. Da-lumungu kamàla - kamàla ala. Tuna nuduka i MIRI hi na-patàka-nya yiana na tàparu,’ wàda,” wàna.

¹⁰Dua kambulu ndaungu mandaina ba na-pahada-nya na Umana i MIRI dàngu na uma hanganji i Halomu.

¹¹Mbuu ndàba da ai kajiu Limbanongu dàngu da ai kajiu pakàli wàngu dàngu mbuu ndàba da àmahu rara pa-pahadangu wàngu uma ba wàna i Halomu pawua-na i Hanganji Hiràmu-ha lai nyuna. Ba na-lundungu-ka na paràma, wua-nanyaka dua kambulu paraingu la ngaba tana Nggalilia i Hiràmu paraïna i Hanganji Halomu.

¹²Ka lua-nanyaka i Hiràmu pa-tàngaru-ha, tàka nda nalii-aya la etina nuda da pa-wuangu-ha.

¹³Napanii-nya i Halomu, “Ai ha, angu dedi, tuda yia bia da paraingu pawua-mungga nyungga?” wànanya. Tuna nuduka Kambulu[10] hi wàdanya lundu nàhu na ngaba lai nu.

¹⁴Rihi welingu la 4.000 kilo àmahu rara pambàda pangàndi-na i Hiràmu lai Halomu.

¹⁵Nawàngu kalaratu ràma lerangu i Halomu ba na-pahadangu Umana i MIRI, uma hanganji, kangeli paraingu Yeruhali dàngu ba kanguhurungu tana la mbara luru Umana i MIRI. Kalaratu tungu numbu ba natura beliha da paraingu Hahuru, Manggindu dàngu Nggehiru. (

¹⁶Na paraingu Nggehiru jiaya na paraingu pa-nàhaku dàngu pa-pakàku-na àmangu na hanganji Mehiru, hi na-pameti-ha da mangia-nya dàngu hi nahulu-ya na paraingu. La rehi malamiri nawua-ya nuna na paraingu la anana kawini ka mbola ngàndi-nanya la lodu mangoma-na lai Halomu.

¹⁷Dàngu i Halomu-ka na mahili tura beliya nuna na paraingu.) Wàngu kalaratu ràma lerangu-mbu, ba nahili tura beliya na Mbetu-Horungu Luru i Halomu,

¹⁸hamangui na Mbaalàtu, na Tamàru la maràda telangu Yahunda,

¹⁹da paraingu ngia pa-pahàmu pangangu, da paraingu pangia njara dàngu da kareta pabera-na. Mbuu ndàbada da pa-pahadangu ba wàna i Halomu, la Yeruhali, la Limbanongu, dàngu la nggi bia la lumbu pareta-na hama tuna na pambàda wukuna mbàda pahàra-nanjaka.

²⁰Ndumana nuna na ràma lerangu na-dundilu-ha paraïna i Halomu da tau ana umbuku tau Amori, Heti, Perihu, Hewi dàngu Yembuhu. Nyuda nu ana umbuku banjaru Kanaàngu da panda pameti-da da tau Ihirailu ba da-mandapu-nya nuna na tana. Lundu nàhu da ana umbuku-da nyuda pa-daingu ata-mahapa.

²²Nda natuu-aha ata da tau Ihirailu paraïna i Halomu; nyuda pa-pangabangu-ha la pa-panjuri, parawira, liku uru pabera, ngora pamba kareta pabera, dàngu pamba mali la njara.

²³Lima ngahu lima kambulu-ya na panggawi pawuangu wai ngaba pa-hamata-ya na tau na ma-pahàra-nya na ràma lerangu la ma-màtu ngia paràma-na i Halomu.

²⁴Na tana la luruna na Umana i MIRI na-hungguru-nya paraïna i Halomu ba na-lelingu-ka na papaha-na, nu na ana hanganji Mehiru, welingu la paraingu-na i Ndautu la uma hanganji pawulu-nanya paraïna i Halomu.

²⁵Na-pandailungu la dalu hau ndaungu pawotu maraku patunu dàngu maraku papeku i Halomu la ngia pawotu maraku pawulu-na ndumana i MIRI. Natunu-mbu dupa ndumana i MIRI. Tuna nuduka ba na-palundu-nya na pahadangu-na Umana i MIRI i Halomu.

²⁶Nduma pamba kapalu-na, na-pandoi kapalu i Halomu la Ehiungu-Nggembiru, la lihina la Elutu la hingi tehiku la Njobu wai Akamba, na tana ngaba Endumu.

²⁷Na-pangàndingu tau kapalu-na ma-ndàmangu i Hanganji Hiràmu ka da-paliru pa-kariangu dàngu da tau kapalu-na i Halomu.

²⁸Da-palirungu-maka handàka palua la Opiru ka papiti 14.000 kilu àmahu rara ndumana i Halomu.