Read Kambera 2 HANGANJI 1 Bible Online

2 HANGANJI 1 - Kambera bible

2 HANGANJI 1

¹Ba nameti-ka i Ahàpu na hanganji Ihirailu, patula ngganggangu-nanyaka na tana Muapu hangganya na Ihirailu.

²La hau na lodu na-kanabu i Ahahia na hanganji Ihirailu welingu la katonga la nunggulu mangia dita la uma manguna la Hamaria, hi lupa na-manua mandàkangu. Ka palewa-nanyaka tau pa-paàrangu la Mbaàlu-Hambupu, na marapu tau Ekurungu la Pilitingu, jàka nahàmu-du napa hi ndia-a.

³Tàka na papalewa-na i MIRI, na-paràha-nya i Elia, na wunangu welingu la Timbihu, palua pa-tàbuku-ha da papalewa-na i Hanganji Ahahia papanii-nja, “Ka nda ningua Ala la Ihirailu hi ilua ningu pakarai taranga la Mbaàlu-Hambupu, na marapu tau Ekurungu?

⁴Paniinya na hanganji ba tuna yia na paniina i MIRI, ‘Nda jia hàmu-amu napa, napa umetima!’ wàmunya,” wàna. Nu na hupu liina i MIRI na-pahàra-nya paraïna i Elia,

⁵ka beli-danyaka nuda da papalewa la hanganji; “Ka nggikina hi beli-minyai?” wàna ba na-paàrangu na hanganji.

⁶Dahema nyuda, “Na haàtu mini namai pa-tàbuku-kama, hi na-paràha-nggama pabeli papanii-nggau Tamu Umbu, ba tuna yia na papanii-na i MIRI lai nyumu Tamu Umbu, ‘Ka nda ningua Ala la Ihirailu hiu paràhangu palua pakarai taranga la Mbaàlu-Hambupu, na marapu tau Ekurungu? Nda jia hàmu-amu napa, napa umetima!’ wàna,” wàdanya.

⁷“Nggiki-i-na na hadana nu na tau?” wàna ba na-paàrangu na hanganji.

⁸“Nahau kalembi malai dàngu boru bànggi manula banda,” wàda ba dahema. “Ye, jiaya i Elia nu!” wàna na hanganji.

⁹Ka paràhangu-nanyaka haàtu parawira, pa-kariangu tau lima kambulu, palua payàpa-ya i Elia. Lua-nanyaka nu na parawira hi nahunggu-ya i Elia ba talànga mandapu-na la hau tandula. “Ha, atana i Ala,” wàna na parawira, “purukau wàna na pareta-nanggau na hanganji!” wànanya.

¹⁰“Jàka atana i Ala-maduka nyungga yia,” wàna ba nahema i Elia, “màtawa ka napuru na epi welingu la awangu ka na-pakehi pambuta-kai, nyumu dàngu da taumu!” wàna. La rehi numa ba napuru na epi pa-pakehi-ya nu na parawira dàngu da malima kambulu-da da tauna.

¹¹Hàla, hili haàtui parawira pa-paràha-na na hanganji pa-kariangu tau lima kambulu-mbu. Lua-danyaka hi dapanii-nya i Elia, “Ha, atana i Ala, puru-memangu-kau nàhu wàna na pareta-nanggau na hanganji!” wànanya.

¹²“Jàka atana i Ala-maduka nyungga yia,” wàna ba nahema i Elia, “màtawa ka napuru na epi welingu la awangu ka na-pakehi pambuta-kai, nyumu dàngu da taumu!” wàna. La rehi numa ba napuru na epina i Ala pa-pakehi pambuta-ha, nu na parawira dàngu da malima kambulu-da da tauna.

¹³Nahili handàkangui pa-paràhangu haàtu parawira na hanganji pa-kariangu tau lima kambulu. Hei-nanyaka la tandula na parawira, ba natàka-ka la hanggana i Elia, patika-nanyaka hi napanii, “Jàma àruki-nggama, dou atana i Ala! Aï àru-kika dàngu yiada da taunggu; àmbu pameti-du kama!

¹⁴Da madua da parawira hawiangu pa-kariangu da tauda dameti-ka ba na-pakehi-ha epi welingu la awangu; na nyuna nyungga duku ku-kamahi-nggau, aï àru-kika!” wàna.

¹⁵La rehi nu panii-nanyaka na papalewa-na i MIRI lai Elia, “Àmbu mangàdatu-du! Kiku bianya nyuna papuru welingu la tandula yiana,” wànanya. Tuna nuduka hi nalua karia-nya nu na parawira la hanganji, i Elia.

¹⁶Hi napanii i Elia la hanganji, “Napanii i MIRI, ‘Uparàhangu palua pakarai taranga la Mbaàlu-Hambupu na marapu tau Ekurungu beri hama tuna nda ningui-ka Ala ngia pa-paàrangu la Ihirailu nda jia hàmu-amu napa; napa umetima!’ ” wànanya.

¹⁷Ka meti-nanyaka i Ahahia hama tuna na papanii-na i MIRI la ngaruna i Elia. Nda ningua anana mini i Ahahia, ka njadi-nanyaka hanganji i Yoràmu na anguna paluhu[1] hiluya nyuna. Nuna nu nanjadi la padàmbu ndau wàna ba na-pareta i Yahoràmu anana i Yuhapàtu, na hanganji Yahunda.

¹⁸Hawiangu da ruku pawunda-na i Hanganji Ahahia mbàda tulihu-haka la Mbuku Lii Ndai Hanganji Ihirailu.