Read Kambera 2 HANGANJI 10 Bible Online

2 HANGANJI 10 - Kambera bible

2 HANGANJI 10

¹Tau pihu kambulu-ha da ana umbuku-na i Ahàpu la Hamaria. Jia ba tuna pa-ngàndingu-nanyaka huratu i Yehu la Hamaria, la nganggu amada da ana umbuku-na i Ahàpu dàngu la maningu kawahangu hamangui da ma-pangora - pangora la panggolu la paraingu nuna. Tuna nu na linguna na huratu,

²“Da ana umbuku-na i Ahàpu ninja la limami nyimi, dàngu ningu kareta pabera-mi, njarami, madàka-mi, dàngu paraingu - paraingu maningu tindingu-mi. Jia batuna, bai lu ngala-kinyaka yiana na huratu,

³pindiwa mahàmu halawàla welingu la hongada nuda da ana umbuku-na i Ahàpu dàngu wotu-yawa nyuna panjadi hanganji, kai mangu pa-kukutungu pambeni hanggangu pa-karaha-ya nyuna,” wàna.

⁴Ka mangàdatu-danyaka da maningu kawahangu la Hamaria. Panii-danyaka, “Jiapa-kingu i Hanganji Yoràmu dàngu i Hanganji Ahahia nda da-duluku-a pandubaku-ya i Yehu, nggàra-amaka nyuta!” wàda.

⁵Tuna nuduka na ngora uma hanganji dàngu na ngora paraingu anguda da ma-pangora - pangora la panggolu dàngu ba hapajia-ha da nganggu amada da ana umbuku-na i Ahàpu hi da-pangàndi-nya yiana na lii langu lai Yehu, “Hurutu nyàku-mamanya duma lai nyumu dàngu wai rehingu-mamanya pawunda-ya jàka nggàra pareta bia pawua-mu-nggama umbu. Nda jia wotu-ama hanganji jiapa ka nggamuya-kadu. Wundaya na mahàmu la papimu nyumu umbu,” wàda.

⁶Ka hili pangàndingu-nanyaka huratu i Yehu lai nyuda, tuna yia na linguna, “Jàkai wai angu-dungga nyungga nyimi mbuu ndàbami, dàngu hii wai rehingu panunju-ha da pareta-nggu, pameti-hawa da ana umbuku-na i Ahàpu, dàngu haromu la rehi tuna nàhu ngàndiha lai nyungga da katiku-da la Yihireyilu,” wàna. Da mapihu kambulu-da da ana umbuku-na i Hanganji Ahàpu da-ndàdiku la ma-pangora - pangora panggolu la paraingu Hamaria, dàngu nyudama ma-kapipi-ha.

⁷Ba dangala-nyaka na huratu-na i Yehu, pameti-dahaka da mapihu kambulu-da da ana umbuku-na i Ahàpu paraï da ma-pangora panggolu la paraingu Hamaria hi datuha la katanga da katiku-da hi da-pangàndi-nja lai Yehu la Yihireyilu.

⁸Ba panii-nyaka nuna i Yehu, wuangu-nanyaka pareta ka pa-nunggulu-nja nuda da katiku ka dàmbu pabundu-da la pindu bokulu paraingu, dàngu ka màtanja lundu mbaru lai nu.

⁹Hadangu la mbaru luhu-nanyaka i Yehu la pindu bokulu hi napanii-nja da tau ma-pauhi lai nu, “Nyunggama ma-pahamangu wulu aka pa-ndubaku-ya i Yoràmu dàngu ma-pameti-ya; ndai njala-a dimi nyimi la rukuna nuna. Tàka mbuu ndàbada da tau yiada nda nyungga-a ma-pameti-ha.

¹⁰Yiana-duyaka na tandana ba danjadi mbuu ndàbada napa da papanii-na i MIRI rukuda da ana umbuku-na i Ahàpu. Mbàda pahàra-nanyaka paraïna i MIRI na papanii-na la ngaruna i Elia, na atana,” wàna.

¹¹Tunaka nu pameti-nahaka paraïna i Yehu mbuu ndàbada hawiangu da kalembi-na i Ahàpu da ma-ndàdiku la Yihireyilu, dàngu mbuu ndàbada da panggawi-na, da kandua hàmu etina, dàngu da ratuna; nda haàtu-a pa-pahia-na paluri.

¹²Hadangu-nanyaka i Yehu welingu la Yihireyilu hi nalaku la Hamaria. La padua ngarangia la hau pangia “Kotaku Mapawangu,” ba wàdanya,

¹³na-hàmburu-ha ba nda pirada da kalembi-na i Ahahia na hanganji Yahunda. “Nggamukai?” wàna ba na-paàra-nja. “Kalembi-na i Ahahia-kama,” wàda ba dahema. “Lua-manya la Yihireyilu pa-tadalu-ha nggubulu-da da kalembi hanganji dàngu da ana umbuku-na i Tamu Ràmbu Ihembilu,” wàda.

¹⁴“Yapa kaluri-nja nyuda!” wàna ba na-wuangu pareta i Yehu la tauna. Ka yàpa-dahaka nuda da tau hi pameti-ha la lihi hau humuru màdu, patu kambulu madua-ha mbuu ndàbada. Nda haàtu-a pa-pahiangu paluri.

¹⁵Laku pa-ngalangu-nanyaka i Yehu. La padua ngarangia, nayema-ya paraïna i Yunandàpu anana i Rekàpu. Napulu dànya paraïna i Yehu hi napanii, “Kanii hi angu eti-madunda wàngguka? Umbuhangu-du pandula-ka nyungga?” wànanya. “Deningu-mana,” wàna ba nahema i Yunandàpu. “Jàka tuna nu màla ka tapakei lima,” wàna i Yehu. Pakei-lima-danyaka, tàka i Yehu hi nawànda-ya i Yunandàpu pahei la kareta-na,

¹⁶hi napanii, “Màla kikungga, dàngu ka ita wiki-munya nggiki hamana ba ku-karinggatu ndumana i MIRI,” wàna. Hàla, pa-kariangu-danyaka la kareta palaku la Hamaria.

¹⁷Ba datàka-ka lai nu, pameti ndàba-nahaka da kalembi-na i Ahàpu paraïna i Yehu, nda haàtu-a mapeka. Nuna nu nanjadi nunjuya na paniina i MIRI lai Elia.

¹⁸Na-paràha-nja pa-pauhi na ihi Hamaria paraïna i Yehu hi napanii, “Nda lalu ka-ringgatu-ana i Hanganji Ahàpu palumu-nya na Mbaàlu; kurihi karinggatu-pa duku napa welingu lai nyuna.

¹⁹Jia ba tuna pauhi ndàbanja da wunangu Mbaàlu, dàngu da malumu-nya, hamangui da ratuna; àmbu haàtu-du pahili. Wotu pa-mbabungu-nggunya napa kameti maraku ndumana na Mbaàlu. Nggamu napa na manda ninya pa-hukungu metiya,” wàna. Tàka nuna màhi-ananya i Yehu ka pameti ndàbaha da malumu-nya na Mbaàlu.

²⁰Tunaka nu hi na-wuangu-ya yiana na pareta i Yehu, “Kawuku-ya na hau lodu pa-pahinggilu ka lumunya na Mbaàlu!” wàna. Ka kawuku-danyaka nuna na lodu paraï da tau,

²¹tàka hi na-bobaru-ya paraïna i Yehu la nggubulu Ihirailu. La lodu nu mai ndàba-danyaka da ma-lumungu Mbaàlu, nda haàtu-a manda mai. Datama la uma lumungu Mbaàlu hi dapinu-ya nuna na uma piti welingu la ngaba lundu la kajia.

²²Tunaka nu wuangu-nanyaka pareta i Yehu la ratu ma-paloku-ha da paki pa-lumungu wàngu ka wuanja paki da tau da mamai pa-lumungu Mbaàlu. Ba pahàra-nyaka nuna na pareta,

²³tama-nanyaka la uma lumungu Mbaàlu i Yehu anguna i Yunandàpu anana i Rekàpu, hi napanii-nja da tau lai nu, “Tàngaru pahàmu-nja yiada da maninja jàka ma-lumungu Mbaàlu-aha; napa hi ningu bia yiahu tau malumu-nya i MIRI,” wàna.

²⁴Hàla, wotu-danyaka kameti maraku lai Mbaàlu i Yehu dàngu i Yunandàpu. Na nyuna la hambeli uma, mbàda wandalu-nahaka paraïna i Yehu da walu kambulu tau madai dàngu parawira. Nyuda nuda mbàda ngala-danyaka yiana na pareta, “Lupangu-ma ipameti ndàbaha nyimi nuda da tau; jàka nggamu ma-pulingu haàtu papalai welingu lai nyuda, pa-pameti-maya napa!” wàna.

²⁵Ba nahàla-kika pawotu kameti maraku, luhu-nanyaka i Yehu hi napanii-nja da madai dàngu da parawira, “Tamawa kai pameti ndàbaha nyuda. Àmbu jia haàtu-du ma-tamòhuku!” wànanja. Tama-danyaka wàngu hapanda pa-binjiru, hi da-pameti ndàbaha da tau lai nu, hi ruruhu-ha da metida la hambeli. Tunaka nu tama-danyaka la uma lumungu mbara dalu,

²⁶hi da-paluhu-ya na kahala hadana na Mbaàlu hi tunuya.

²⁷Nuna na kahala hada pa-patàlaru kariangu-ya dàngu na umana, hàla, hi tuya ngia pa-hambeli lundu nàhu.

²⁸Tuna nuduka napamau-nanya na ngera lumungu Mbaàlu la Ihirailu paraïna i Yehu.

²⁹Jia ba tuna, tuna yia napanii-nya i Yehu paraïna i MIRI, “Mbàda pahàra-munyaka la ana umbuku-na i Ahàpu mbuu ndàbana na papanii-nggunggau. Rukuna nuna ku-panjanjingu ba lundu la ndalaru patu napa ba danjadi hanganji la Ihirailu da ana umbuku-mu,” wànanya. Tàka nda wàngu mbulungu eti-ana i Yehu pa-karadaku-nya na Ukuna i MIRI, na Ala Ihirailu. Nahama-nya i Yerumbiamu na ma-pawiti-nya panjala na tau Ihirailu ba nawàngu pa-paràha-nja pa-lumungu hapi àmahu rara pa-pahada-na la Mbetilu dàngu la Ndàngu.

³²La rehi nu pa-kiringu-nanyaka i MIRI pa-pakujuru-ya na ngaba tana Ihirailu. I Hahailu na hanganji Hiria, nawàhi ndàbaha da ngaba tana Ihirailu

³³la pahunga lodu welingu la Luku Yorundangu lundu hu luru hama marauna la paraingu Arowiru la lihi Luku Àrunongu, papohu-nya na ngaba tana Nggiliatu dàngu Mbahàngu, ngia pa-ngiangu-da da kabihu Nggàtu, Rumbingu dàngu Manahi pahunga lodu.

³⁴Hawiangu da rukuna i Yehu papohu-nja da pa-onduna la kaborangu-na mbàda tulihu-haka la Mbuku Lii Ndai Hanganji Ihirailu.

³⁵Dua kambulu walu mbua ndaungu mandaina ba na-pareta i Yehu ba hanganji Ihirailu-ya. Nameti hi taninya la Hamaria. Hi nanjadi hanganji i Yuawàhu na anana pahilu-ya nyuna.