Read Kambera 2 HANGANJI 11 Bible Online

2 HANGANJI 11 - Kambera bible

2 HANGANJI 11

¹Ba narongu-kika i Atàluya na ruku metina i Hanganji Ahahia na anana, wuangu-nanyaka pareta ka pameti ndàbaha da ihi umana i Ahahia.

²I Yoàhu na anana i Ahahia, tika pa-pameti kariangu-yaka amangu papohu-nja da ana hanganji hawiangu, na nyuna na-tamòhuku rukuna ba na-pamara-ya paraïna i Yuhemba na mamuna. I Yoàhu dàngu na ma-kabida-nya pangàndi pa-kawiningu-ya la hau kurungu ngia pa-katuda la Umana i MIRI.

³Nomu mbua ndaungu mandaina ba na-kabida-nya nuna na anakeda la Umana i MIRI paraïna i Yuhemba la ngala pareta-na i Atàluya ba hanganji kawini-ya.

⁴La ndaungu papihu wàna, napaau ndàbanja paraïna i Ratu Yuyanda da parawira karaha wikina na hanganji kawini dàngu ba hapajia-ha da madai uma hanganji ka damai pa-pahàmburu dànya nyuna la Umana i MIRI. Lai nu na-paràha-nja pa-harangu la pa-pahàra-nya na pawuku-na. Tunaka nu paita-nanjaka nyuda i Yoàhu, na anana i Hanganji Ahahia,

⁵hi nawua-nja yiana na pareta, “Jàka ipawai ngaba la lodu Hangahu, habika tailu welingu lai nyimi lupangu-ma dadai ningu la uma hanganji;

⁶na habika tailui dadai la pindu bokulu Huru, tàka na habika tailu na marihi dadai la pindu bokulu la kajia-da da madai hawiangu.[13]

⁷Da dàmbu kalikapu da manda pawai ngaba padai la lodu Hangahu, màta ka dadai wàngu hapanda pa-binjiru la Umana i MIRI la pamangga-nya i Hanganji Yoàhu. Lupangu idai mànu-maya bàdi nyuna la nggi biaya nalaku ningu, tàka nimbihu-na na tau na ma-kamangu palihi-nggai nyimi, lupangu-ma ipameti-ya,” wànanja.

⁹Da-karadaku ndàba da parawira la pareta-na i Yuyanda hi dalua ngàndi-nyaha nyuna da tauda da mapawai ngaba dàngu da manda pawai ngaba nu la lodu Hangahu.

¹⁰Da nimbu dàngu da temingu-na i Hanganji Ndautu da pa-pahàmu la Umana i MIRI nawua-njaha ba hapajia-ha da parawira paraïna i Yuyanda.

¹¹La winggiru-na la hangga Umana i MIRI, natuha da madai wàngu hapanda pa-binjiru ka mangganya na hanganji.

¹²Hàlaka nu luhu ngàndi-nanyaka la hambeli i Yoàhu paraïna i Yuyanda, na-pa-tànggapu-nya na tubuku pareta la katiku-na, dàngu hi nawua-nyaya nyuna na Mbuku Uku Ala. Hàla, hi wotuya pa-hanganji i Yoàhu dàngu hi bobaru-ya nuna la rayatu. Da-kapòkukungu limada na rayatu dàngu warada, “Oha-anaka na hanganji!” wàda.

¹³Na hanganji kawini i Atàluya narongu-ya na paya-aunguda da madai dàngu na rayatu. Ri - ringa-naka palua la Umana i MIRI, la ngia pa-langgungguru-na na tau dangu.

¹⁴Lai nu naita-ya na hanganji bidi ba na-ndolaku la pindu tama Umana i MIRI na ngia pawotu-ya, da-winggiru-nya paraï da parawira dàngu da ma-palingu taropitu. Nggubulu-na na rayatu dawara mbaha eti ba dàngu palingu-daha da taropitu. Bàriku-nahaka da pakina i Atàluya tanda karaü etina hi na-kaoka, “Katadaku! Katadaku!” wàna.

¹⁵Nda na-pahiangu-a i Yuyanda ka pameti-ya i Atàluya la winggiru-na na Umana i MIRI, ba tuna napanii ndàbanja da ngora tanatara i Yuyanda, “Luhu ngàndiya nyuna la njongada da dua juru tau madai, dàngu pameti-ya jàka nggamu ma-mbuhangu pa-pamara-ya nyuna,” wànanja.

¹⁶Ka yàpa-danyaka, hi dangàndi-ya la uma hanganji. Lai nu, da-pameti niya la hangga pindu Bokulu Njara.

¹⁷Na-paràha-nja i Yoàhu dàngu na rayatu paraïna i Ratu Yuyanda ka da-panjanjingu dàngu i MIRI ba danjadi banjaru-na i MIRI nyuda napa; na-paràha-mbunya na hanganji ka natura pa-njanjingu dàngu na rayatu.

¹⁸Hàlaka nu njungu-nanyaka na rayatu hi da-nyungguru-ya na uma lumungu Mbaàlu; da ngia pawotu maraku dàngu da kahala hadana pa-pakabu-ha, tàka i Matàngu na ratu Mbaàlu pa-pameti-ya la hanggada da ngia pawotu maraku. Nawua-nja wai ngaba da madai paraïna i Yuyanda ka dadaiya na Umana i MIRI,

¹⁹tàka nyuna anguda ba hapajia-ha da parawira, ba hapajia-ha da karaha wikina na hanganji dàngu ba hapajia-ha da madai uma hanganji hamangui na rayatu mbutana da-karia-nya i Hanganji Yoàhu welingu la Umana i MIRI palaku la uma hanganji. Ba natama i Yoàhu nali ningu la pindu Bokulu Madai, hi na-mandapu la kanjàka pareta.

²⁰Na-hawola ndàba na rayatu. Na-mambiru-mbuka na paraingu-da dàngu pa-pameti-yaka i Atàluya.

²¹Pihu mbua ndaungu-na na ndaungu lurina i Yoàhu ba nanjadi hanganji Yahunda.