Read Kambera 2 HANGANJI 12 Bible Online

2 HANGANJI 12 - Kambera bible

2 HANGANJI 12

¹La papihu wàna na ndaungu pareta-na i Yehu la Ihirailu, nanjadi hanganji Yahunda i Yoàhu, hi na-pareta la Yeruhali patu kambulu ndaungu mandaina. Na inana Hipuya-ya na tamuna welingu la paraingu Mbiruhemba.

²Ruku hàmu kapipi-na i Ratu Yuyanda, la ngala lurina Yoàhu nawunda-ya na maliya na etina i MIRI.

³Naa-aika-nyuna, da ngia pa-lumungu marapu nda na-patàlaru-aha, hi lupa nawotu-mapa kameti maraku dàngu natunu-mapa kaminyangu lai nu na rayatu.

⁴La hau na lodu napaau ndàbanja da ratu i Yoàhu hi na-paràha-nja pa-pahàmu-ha da àmahu pa-ngalangu welingu la ma-maraku la Umana i MIRI, da àmahu pa-mbayaru ba paloku kameti maraku, hamangui da àmahu da pa-wuangu wàngu eti.

⁵Nimbihu ratu, lupangu paduku meha-manaha duna da àmahu maraku tau palumu-na. Da àmahu nuda jiaha da pawàngu ka pahàmu wànja da maruha la Umana i MIRI.

⁶La padua kambulu tailu wàna na ndaungu ba na-pareta i Yoàhu, ndedimbu da-pahàmu-ha da maruha la Umana i MIRI paraï da ratu.

⁷Tuna nuduka hi napaau-nya i Ratu Yuyanda dàngu da ratu hawiangu paraïna i Yoàhu, hi napanii, “Ka nggikina dimi hi ndedi ipahàmu-ya na Umana i MIRI? Piti welingu la lodu nàhu nda pa-pahia-anggaipa pa-pahàmu-ha da àmahu pakeimi. Lupangu iwuangu ndàba-maha bàdi ka pahàmu-ya na Umana i MIRI,” wàna.

⁸Da-patunju-ya paraï da ratu la panda pauhi-nja da àmahu welingu la rayatu, dàngu la panda dukuya na ngera pahàmu-ya na Umana i MIRI.

⁹Ka piti-nanyaka hau ana pàti i Yuyanda hi natunya mambowa la ndàbina, hi na-bànjalu-ya nu na ana pàti la lihi ngia pawotu maraku, la patuu kawana pindu tama la Umana i MIRI. Mbuu ndàbada da àmahu maraku la Umana i MIRI dapuhi-ha nu la ana pàti paraï da ratu da mapawai ngaba la pindu tama.

¹⁰Handàka dangu - handàka dangu-daka da àmahu nu la ana pàti mai-danyaka na hakaratarihu hanganji anguda i Ratu Bokulu padiha-ha nuda da àmahu hi kawuhuku-ha.

¹¹Ba hàlaka pa-tulihu-ya na danguda, wua-danjaka da manduru da ma-hamata-ya na paràma ba pahàmu-ya na Umana i MIRI. Na pa-ngalangu-na da manduru da ma-mbayaru-ha da tukangu ai, da tukangu uma,

¹²da tukangu watu dàngu da ma-kahebi watu. Nyudambu da makei ai dàngu watu, dàngu da ma-kaloru ndàbanya na ngera paluhu àmahu ndumada nuda da pa-pahàmu.

¹³Na nyuna nda ana hakudu-mbu welingu la àmahu nuda pa-pandoi wàngu maku - maku àmahu bara, kaba tarobu, taropitu, pa-paloku wànja da palita jàka ndia kanaingu hawiangu welingu la àmahu rara àmahu bara.

¹⁴Mbuu ndàbada pa-mbayarungu la tukangu-ha dàngu pakei wàngu ngga - nggàra da pawàngu ndumana na uma.

¹⁵Nuda da manduru da-padeningu langatàka-ma. Ba tuna, nda nggàra ihi wàngu-a pakarai-ha da kaloka-da da àmahu welingu lai nyuda.

¹⁶Da àmahu welingu la kameti maraku hilu runggi dàngu welingu la kameti maraku jàmangu njala nda papuhi-aha nu la ana pàti; da àmahu nuda pa-wuangu la ratuha.

¹⁷La rehi nu nahada-nya na paraingu Nggàtu paraïna i Hahailu na hanganji Hiria hi na-mandapu-nya. Hàla nawuku-mbuya la pahada-nya na Yeruhali.

¹⁸Ka pa-ngàndi-nanyaka àmahu palohu i Hahailu paraïna i Yoàhu. Nuda da àmahu napiti-ha welingu la mbuu ndàbada da maraku pawotu lai MIRI welingu lai nyuna wiki i Yoàhu dàngu welingu lai Yuhapàtu, i Yoràmu dàngu i Ahahia, nu da hanganji da ma-pareta ba ndedipa nyuna. Dàngumbu welingu la mbuu ndàbada da àmahu rara la kanai àmahu la Umana i MIRI dàngu la uma hanganji. Ka nda nanjadi-apa pahada-nya na Yeruhali i Hahailu.

¹⁹Tunaka nu da-pahamangu wulu aka da panggawi pa-hanganji Yahunda la pa-ndubaku-ya i Hanganji Yoàhu. Da tau madua welingu lai nyuda nu, i Yuhakàru anana i Himiatu, dàngu i Yuhambàtu anana i Homiru, da-pameti-ya i Yoàhu la hau uma la kabundu tana la pahunga lodu welingu la Yeruhali, la pa-kamburungu la Hila. Pa-taningu la reti hanganji-ya i Yoàhu la paraingu-na i Ndautu. I Amanjia na anana nanjadi hanganji hiluya nyuna. Hawiangu da rukuna i Hanganji Yoàhu pa-tulihu-haka la Mbuku Lii Ndai Hanganji Yahunda.