Read Kambera 2 HANGANJI 13 Bible Online

2 HANGANJI 13 - Kambera bible

2 HANGANJI 13

¹La padua kambulu tailu wàna na ndaungu pareta-nanya na Yahunda i Yoàhu anana i Ahahia, nanjadi hanganji Ihirailu i Yuawàhu anana i Yehu, hakambulu pihu mbua ndaungu mandaina ba na-pareta la Hamaria.

²Hama tuna i Yerumbiamu na ma-pareta ba ndedipa nyuna, tuna numbu ba nanjala lai MIRI i Yuawàhu dàngu na-pawiti-nya hi nanjala-mbu na tau Ihirailu. Ndedi ndokuma na-dunjaku-nja da pawunda ma-akatu.

³Tuna nuduka hi nahàngga-nya na Ihirailu paraïna i MIRI hi nahili weli - hili weli pamàta-nya i Hahailu hanganji Hiria dàngu i Mbenihandàtu na anana pa-pakàku-ya na Ihirailu.

⁴Hi na-hamayangu i Yuawàhu lai MIRI, tàka hi natingi-ya na hamayangu-na paraïna i MIRI, ba naita-duya ba kanjupu mbana etiya na hanganji Hiria pa-kapidihu-ya na tau Ihirailu.

⁵Ka wua-nanyaka haàtu liku uru na tau Ihirailu i MIRI ma-pahàla-ha welingu la kawaha Hiria, hi lupa dahili luri mambiru beli hama tuna la kawunga-na.

⁶Jiapa-kai ba tuna nu nda na-pànjangu-a na tau Ihirailu pawunda-ha da njala da pawunga-na i Yerumbiamu. Pangala-madanya nanjala nuna. Na kahala hadana na marapu kawini Ahera damàta bianya pa-padaingu la Hamaria.

⁷Mbàda pa-tàlaru-nanyaka na kanguhuru pabera Ihirailu paraïna hanganji Hiria hi lupa da mani-kinjapa lai Hanganji Yuawàhu lima kambulu-adaka da tanatara li la njara, hakambulu kareta pabera, dàngu 10.000 panjuri.

⁸Hawiangu da rukuna i Yuawàhu dàngu mbuu ndàbada da paondu-na la kaborangu-na mbàda tulihu-haka la Mbuku Lii Ndai Hanganji Ihirailu.

⁹Nameti hi taninya la Hamaria. I Yoàhu na anana nanjadi hanganji hiluya nyuna.

¹⁰La pa-tailu kambulu pihu wàna na ndaungu pareta-nanya na Yahunda i Yoàhu, nanjadi hanganji Ihirailu i Yoàhu anana i Yuawàhu hi na-pareta la Hamaria hakambulu nomu mbua ndaungu mandaina.

¹¹Nanjala-mbu nyuna lai MIRI ba nakiku-nya na akatu-na i Hanganji Yerumbiamu na mambàda pawiti-nya pawunda njala na tau Ihirailu.

¹²Hawiangu da rukuna i Hanganji Yoàhu, papohu-nya na kaborangu-na la pa-kabungu ba hanobaku-ya i Amanjia na hanganji Yahunda, pa-tulihu-haka la Mbuku Lii Ndai Hanganji Ihirailu.

¹³Nameti i Yoàhu hi taninya la reti hanganji la Hamaria. I Yerumbiamu II na anana, nanjadi hanganji hiluya nyuna.

¹⁴La hau rehi hidu mbotu-nanya i Wunangu Eliha, hi namai i Hanganji Yoàhu pa-tadalu-ya nyuna. Ba naita-yaka ba mareni meti-nanyaka i Eliha, hii-nanyaka na hanganji dàngu paniina, “Dou na amanggu, na amanggu, na ma-mbangatu pa-kahiri-ya na Ihirailu!” wàna.

¹⁵“Piti tandai pana dàngu wua pana!” wànanya paraïna i Eliha. Hi napiti i Yoàhu,

¹⁶hi na-paràha-nya paraïna i Eliha ka nawai rehingu papana. Ka wai rehingu-nanyaka na hanganji, tàka i Eliha na-bànjalu-ya na limana la pinu limana na hanganji.

¹⁷Tunaka nu bunggahu-nanyaka na katonga ma-hanggangu la Hiria na hanganji, nunjuya na hupu lii-na na wunangu, “Puli-nyawa na wua panamu!” wàna i Eliha. Ba napuli-kinyaka na pana paraïna hanganji, wara-naka na wunangu, “Jiakau nyumuka na panana i MIRI. Wànya na pana nuna napa na-pakàku-ya na Hiria paraïna i MIRI. Napa upabera dàngu tau Hiria la Apiku lundu upakàku-ha nyuda,” wànanya.

¹⁸Hàlaka nu paràha-nanyaka i Hanganji Yoàhu paraïna i Eliha papiti-ha da pana hawiangu-na dàngu pa-pangàmbahu-nja la tana. Na-patailu wundangu na hanganji pa-pangàmbahu-nya na tana, hi na-jiaka.

¹⁹Mbeninaka i Eliha hi napanii, “Lupangu upalima panomu wundangu bàdi làti papangàmbahungu, tàka hi peku pakàku palundu-munya na banjaru Hiria. Tàka nàhu, napa upa-tailu wundangu-a pa-pakàku-ya,” wànanya.

²⁰Tunaka nu ndedi nggi tuna mandaina meti-nanyaka i Eliha hi taninya. La rehi nu da kalibaru tau rambangu welingu la Muapu dakàli handàkangu hau ndaungu palua pa-rambangu la tana Ihirailu.

²¹La hau lodu ba talànga taningu-da mameti da tau da manda pirada, hi jia ita bia-danja ba nàmunja da kalibaru tau rambangu welingu la Muapu. Ka ailulu kawuka bia-danyaka nu na mameti hu daa la retina i Eliha hi dapalai. Ba na-jonggaru kihaka da rii kawudu-na i Eliha nu na mameti, luri beli-nanyaka nu na mameti hi na-ndolaku.

²²La ngala pareta-na i Yoàhu, na-kapidihu-ya na tau Ihirailu paraïna i Hahailu na hanganji Hiria.

²³Na nyuna i MIRI naaï-ya na banjaru-na dàngu najàma-nja njalada. Nda namàta-anja ka patàlaru-ha tàka nandula-maha duna lumuna na pa-njanjingu-na dàngu i Ambarahàmu, i Ihàku dàngu i Yakupu. Lundu nàhu ndedima duna na-maromba-nya na banjaru-na.

²⁴Tunaka nu meti-nanyaka i Hahailu na hanganji Hiria, hi nanjadi hanganji i Mbenihandàtu na anana.

²⁵Tunaka nu na-patailu wundangu i Yoàhu hanganji Ihirailu pa-pakàku-ya i Mbenihandàtu dàngu hi napiti beliha da paraingu da pambàda wàhina i Mbenihandàtu la rehi pareta-na i Hanganji Yuawàhu na amana i Yoàhu.