Read Kambera 2 HANGANJI 14 Bible Online

2 HANGANJI 14 - Kambera bible

2 HANGANJI 14

¹La padàmbu wàna na ndaungu pareta-nanya na Ihirailu i Yoàhu anana i Yuawàhu, nanjadi hanganji Yahunda i Amanjia na anana i Yoàhu.

²La rehi nu dua kambulu limana na ndaungu lurina, na-pareta la Yeruhali dua kambulu hiwa mbua ndaungu mandaina. Na inana jiaya i Yuandàngu welingu la Yeruhali.

³Nawunda-ya na mali-ya na etina i MIRI nyuna i Amanjia. Tàka nda nahama-anya i Ndautu na boku la mangilu-na. Nadu hama tuna na amana,

⁴nda na-nyànggaru-mbuha nyuna da ngia pa-lumungu marapu, hi lupa nawotu mànu-mapa kameti maraku dàngu natunu-mapa dupa lai nu na rayatu.

⁵Ba na-undungu-ka na mandapu hanganji-na, paràhangu-nanyaka i Amanjia pa-pameti-ha da panggawi da ma-pameti-ya na amana.

⁶Tàka da anada nuda da panggawi nda na-pameti-aha, nadu ba kiku-nanya na hupu liina i MIRI la Mbukuna i Muha na matuna yia na linguna, “Àmbu huku pameti-ha da ina amada ruku akatu pawunda-da da anada, dàngu àmbu huku pameti-ha da anada ruku akatu pawunda-da da ina amada. Nimbihu-na na tau mbulungu ruku akatu pawunda wiki-ana bàdi hi pekuna la pahuku pameti-ya,” ba wàna.

⁷La handàkangu pa-pakabungu na-pameti 10.000 panjuri Endumu i Amanjia la Lolangu Mbàru, dàngu nawàhi-ya na paraingu Hela, hi na-patamu-nya Yòkuteyilu nuna na paraingu. Lundu nàhu Yòkuteyilu-mayapa na tamuna nuna na paraingu.

⁸Tunaka nu na-paràhangu papalewa-na i Amanjia lai Yoàhu na hanganji Ihirailu, parari-ya nyuna ka pabera.

⁹Na nyuna na-palewa tau i Hanganji Yoàhu pa-patàka-nya na hemana, tuna yia, “La hau rehi na rii madàka la Limbanongu na-pangàndingu langu la pingi kajiu, ‘Ha pingi kajiu, wuangu-ya na ana karia anamu la ananggu nyungga ka natuya papaha-na,’ wàna. Tàka ba tunaka nu li-nanyaka na heu banda omangu lai nu, hi nataro - rohaku-ya nuna na rii madàka.

¹⁰Nyumu, Amanjia, ba mbàda pakàku-munya na tau Endumu, tuna nuduka hi lupa ungànjangu. Narihi hàmupa, jiayai duna ka wàmu rukuna nuna na talumu dàngu kau kandii bia la uma! Nggàra linguna la pahi - himbu lii pahili na ma-pa-hanggàmaru-ya na wikimu dàngu na rayatu-maamu?” wànanya.

¹¹Na nyuna i Amanjia nda na-kawela-nya na papanii-na i Yoàhu hanganji Ihirailu. Tuna nuduka hi da-hadangu palaku la Mbetu-Hemihu la Yahunda i Hanganji Yoàhu dàngu da tauna hi da-pabera dàngu i Amanjia lai nu.

¹²Pa-pakàku-ha da tanatara Yahunda hi lupa dapalai beli ndàba la umada da panjuri-na.

¹³Nayàpa-ya i Amanjia paraïna i Yoàhu, hi natama-nya na Yeruhali dàngu na-nyungguru-ya na kangeli paraingu ràkangu dua ngahu metiru marauna, piti welingu la Pindu Bokulu Epuraïmu lundu la Pindu Bokulu Kabihu.

¹⁴Mbuu ndàbada da àmahu rara da àmahu bara dàngu mbuu ndàbada da kanaingu da pa-jàngapu-na la Umana i MIRI dàngu da banda da malanja uma hanganji napiti-ha hi nangàndi-ha paraïna Yoàhu la Hamaria pa-kariangu ma-tanawangu da manda pirada.

¹⁵Hawiangu da rukuna i Hanganji Yoàhu, papohu-nya na kaborangu-na la pa-kabungu ba hanobaku-ya i Amanjia, na hanganji Yahunda, pambàda tulihu-haka la Mbuku Lii Ndai Hanganji Ihirailu.

¹⁶Nameti i Yoàhu hi taninya la reti hanganji la Hamaria. I Yerumbiamu II na anana nanjadi hanganji hiluya nyuna.

¹⁷Ba nameti-ka i Yoàhu na hanganji Ihirailu, hakambulu lima mbua ndaunapa mandaina paluri i Amanjia, na hanganji Yahunda.

¹⁸Tunaka nu ningu ma-pahama kangunduhungu la Yeruhali pa-pameti-ya i Amanjia. Tuna nuduka hi napalai la Lakihu, na nyuna dayaulu-ya muhuna hi da-pameti-ya lai nu. Na metina pangàndi beli wàngu njaraya la Yeruhali, hi taninya la reti hanganji la paraingu-na i Ndautu. Na rayatu Yahunda dawotu-ya i Uhia[14] anana i Amanjia panjadi hanganji hiluya na amana. La rehi nu hakambulu nomu-anapa na ndaungu lurina i Uhia. Hawiangu na rukuna i Amanjia pambàda tulihu-haka la Mbuku Lii Ndai Hanganji Yahunda.

²²Ba nameti-ka na amana, nawàhi beliya na paraingu Elàtu i Uhia hi natura beliya.

²³La pa-hakambulu lima wàna na ndaungu pareta-nanya na Yahunda i Amanjia anana i Yoàhu, nanjadi hanganji Ihirailu i Yerumbiamu II anana i Yoàhu, hi na-pareta la Hamaria patu kambulu hau ndaungu mandaina.

²⁴Nanjala nyuna lai MIRI, ba nakiku-nya na akatu-na i Yerumbiamu I na mambàda pawiti-nya panjala na tau Ihirailu.

²⁵Nyuna duka yiana i Yerumbiamu II na mawàhi beliha nggubulu-da da ngaba tana Ihirailu, piti weli diangu la ànda ma-hanggangu la Hamàtu lundu hu luru la Tehiku Meti. Nuna nu nunjuya na njanjina i MIRI, na Ala Ihirailu la ngaru atana i Wunangu Yunuhu anana i Amitaï tau Nggàta-Hepiru.

²⁶Naita-ya paraïna i MIRI ba dira mayila-ya na tau Ihirailu, tàka nda ana haàtu-a mandula-ha nyuda.

²⁷Nda nawuku-aya paraïna i MIRI ka pa-tàlaru-ya lundu nu - nu na Ihirailu, tuna nuduka hi nandula-ha wàngu limana i Yerumbiamu II.

²⁸Hawiangu da rukuna i Yerumbiamu II, rukuna na kaborangu-na la pakabu - pakabungu dàngu nggiki hamana ba nawàhi beliya na Ndamàhiku dàngu na Hamàtu welingu la Yahunda nduma Ihirailu, mbuu ndàbada nuda pambàda tulihu-haka la Mbuku Lii Ndai Hanganji Ihirailu.

²⁹Nameti i Yerumbiamu II hi taninya la reti hanganji. I Hakaria na anana nanjadi hanganji hiluya nyuna.