Read Kambera 2 HANGANJI 15 Bible Online

2 HANGANJI 15 - Kambera bible

2 HANGANJI 15

¹La padua kambulu pihu wàna na ndaungu pareta-nanya na Ihirailu i Yerumbiamu II, nanjadi hanganji Yahunda i Uhia[15] anana i Amanjia.

²La rehi nu hakambulu nomuna na ndaungu lurina hi na-pareta la Yeruhali lima kambulu dàmbu ndaungu mandaina. Na inana Yekuluya-ya na tamuna, kawini Yeruhali.

³Hama tuna na amana, nawunda-mbuha da maliya na etina i MIRI i Uhia.

⁴Naa-aika-nyuna da ngia pa-lumungu marapu nda na-patàlaru-aha, hi lupa pa-daingu wotuna kameti maraku dàngu natunu dupa lai nu na rayatu.

⁵Na-papàda-nya mayila la hidu manula ihi pa-mangginggitungu paraïna i MIRI, dàngu lundu metina, nda ana puli-mana nuna na hiduna. Pa-pahinggilu-ya la hau uma hi papànja-nya welingu la wai ngerana. I Yotàmu na anana nanjadi wakilu pa-pareta-ya na rayatu.

⁶Hawiangu da rukuna i Uhia pambàda tulihu-haka la Mbuku Lii Ndai Hanganji Yahunda.

⁷Nameti i Uhia hi taninya la reti hanganji la paraingu-na i Ndautu. I Yotàmu na anana nanjadi hanganji hiluya nyuna.

⁸La patailu kambulu walu wàna na ndaungu pareta-nanya na Yahunda i Hanganji Uhia, nanjadi hanganji Ihirailu i Hakaria anana i Yerumbiamu II hi na-pareta la Hamaria nomu mbua wulangu mandaina.

⁹Hama tuna da hanganji ma-pareta ba ndedipa nyuna, nanjala-mbu nyuna lai MIRI. Nakiku-nya na akatu-na i Yerumbiamu I na mambàda pawiti-nya panjala na Ihirailu.

¹⁰I Halumu anana i Yambihu na-pahama kangunduhungu pa-ndubaku-ya i Hanganji Hakaria, hi na-pameti-ya nyuna la Yimbiliamu, hi nanjadi hanganji hiluya nyuna.

¹¹Nu ba tuna nu hàrangu-nanyaka na pambàda njanji-nanya i Hanganji Yehu paraïna i MIRI ba nanjadi hanganji la Ihirailu lundu la ndalaru patu[16] da ana umbuku-na. Hawiangu da rukuna i Hanganji Hakaria pambàda tulihu-haka la Mbuku Lii Ndai Hanganji Ihirailu.

¹³La patailu kambulu hiwa wàna na ndaungu pareta-nanya na Yahunda i Hanganji Uhia, nanjadi hanganji Ihirailu i Halumu anana i Yambihu. Hau wula-ana pa-pareta la Hamaria,

¹⁴nadu nalua la Hamaria welingu la Tiràhu i Manahimu anana i Nggandi, hi na-pameti-ya i Halumu, hi nanjadi hanganji hiluya nyuna.

¹⁵Ba hanàhu-na welingu la Tiràhu i Manahimu, dira pakabu-nanya na paraingu Tipuha dàngu da tana ngaba la winggiru-na dàngu na-patàlaru-ha da mangia-nya. Rukuna ba nda nabihu pa-tamaï lai nyuna nuna na paraingu, ka hàli-nahaka da kambuda da kawini ma-pa-anakedangu la paraingu nuna. Hawiangu da rukuna i Hanganji Halumu, hamangui na pahama kangunduhungu-na, pambàda tulihu-haka la Mbuku Lii Ndai Hanganji Ihirailu.

¹⁷La patailu kambulu hiwa wàna na ndaungu pareta-nanya na Yahunda i Hanganji Uhia, nanjadi hanganji Ihirailu i Manahimu anana i Nggandi, hi na-pareta la Hamaria hakambulu ndaungu mandaina.

¹⁸Nanjala lai MIRI la ngala lurina ba nakiku-nya na-akatu-na i Yerumbiamu I, na ma-pawiti-nya panjala na tau Ihirailu.

¹⁹Ba nahada-nya na Ihirailu paraïna i Pulu,[17] na hanganji Ahuru, nawua-nya 34.000 kilu àmahu bara paraïna i Manahimu, ka na-pandulangu pa-paundu-nya na kawaha-na i Manahimu la Ihirailu.

²⁰Nuda da àmahu nangala-nja welingu la tau mawulu - tau mawulu i Manahimu ba nawàngu pahoha-ha ka da-maràngga wuangu lima kambulu àmahu bara haàtu - haàtu. Tuna nuduka hi kiri màta-nanya na tana nuna paraïna i Pulu hi nabeli-ya la tana wikina.

²¹Hawiangu da rukuna i Manahimu pambàda tulihu-haka la Mbuku Lii Ndai Hanganji Ihirailu.

²²Nameti hi taninya, hi nanjadi hanganji i Pekahia na anana hiluya nyuna.

²³La palima kambulu wàna na ndaungu pareta-nanya na Yahunda i Hanganji Uhia, nanjadi hanganji Ihirailu i Pekahia anana i Manahimu hi na-pareta la Hamaria dàmbu ndaungu mandaina.

²⁴Nanjala nyuna lai MIRI ba nakiku-nya na akatu-na i Yerumbiamu I, na ma-pawiti-nya panjala na tau Ihirailu.

²⁵Na haàtu welingu la parawira-naka, nu i Peka anana i Remalia da-pahama kangunduhungu dàngu da tau malima kambulu welingu la Nggiliatu. Hàla hi da-pameti-ya i Pekahia la hau tindingu la uma hanganji la Hamaria dàngu da tau madua da ma-tamungu Àrunggòpu dàngu Àruyei. Tunaka nu njadi-nanyaka hanganji i Peka hiluya i Pekahia.

²⁶Hawiangu da rukuna i Hanganji Pekahia pambàda tulihu-haka la Mbuku Lii Ndai Hanganji Ihirailu.

²⁷La palima kambulu dàmbu wàna na ndaungu pareta-nanya na Yahunda i Hanganji Uhia, nanjadi hanganji Ihirailu i Peka anana i Remalia. Na-pareta la Hamaria dua kambulu ndaungu mandaina.

²⁸Nanjala nyuna lai MIRI ba nakiku-nya na akatu-na i Yerumbiamu I na ma-pawitinya panjala na tau Ihirailu.

²⁹La rehi pareta-na i Peka, i Tinggulàtu-Pilehiru hanganji Ahuru nawàhi-ha da paraingu Iyungu, Ambilu-Mbetu-Maaka, Yanua, Kendihu, Hahuru, da tana ngaba Nggiliatu, Nggalilia dàngu Nàputali. Na-dundilu-mbuha pa-tanawa-nja la Ahuru da ma-mandapu-nya.

³⁰La padua kambulu wàna na ndaungu pareta-nanya na Yahunda i Hanganji Yotàmu anana i Uhia, na-pahama kangunduhungu i Hohia anana i Ela pa-ndubaku-ya i Hanganji Peka hi na-pameti-ya, hàla, hi nanjadi hanganji hiluya nyuna.

³¹Hawiangu da rukuna i Hanganji Peka pambàda tulihu-haka la Mbuku Lii Ndai Hanganji Ihirailu.

³²La padàmbu wàna na ndaungu pareta-nanya na Ihirailu i Hanganji Peka anana i Remalia, nanjadi hanganji Yahunda i Yotàmu anana i Uhia.

³³La rehi nu dua kambulu limana na ndaungu lurina hi na-pareta la Yeruhali hakambulu nomu mbua ndaungu mandaina. Na inana jiaya i Yeruha anana i Handuku.

³⁴Nawunda-ha da maliya na etina i MIRI i Yotàmu, kikunya na huri lurina i Uhia na amana.

³⁵Naa-aika nyuna da ngia pa-lumungu marapu nda na-patàlaru-aha, hi lupa nawotu mànu-mapa maraku dàngu natunu mànu-mapa dupa lai nu na rayatu. Jiaya i Yotàmu nyuna-maka na ma-pahada-nya na Pindu Bokulu Dia la Uma Ala.

³⁶La rehi pareta-na i Yotàmu, pa-kiringu-nanyaka i MIRI pa-pangàndi-nya i Renjingu na hanganji Hiria dàngu i Peka na hanganji Ihirailu pahada-nya na Yahunda. Hawiangu da rukuna i Hanganji Yotàmu pambàda tulihu-haka la Mbuku Lii Ndai Hanganji Yahunda.

³⁸Nameti hi taninya la reti hanganji la paraingu-na i Ndautu, hi nanjadi hanganji i Ahàhu na anana hiluya nyuna.