Read Kambera 2 HANGANJI 16 Bible Online

2 HANGANJI 16 - Kambera bible

2 HANGANJI 16

¹La pa-hakambulu pihu wàna na ndaungu pareta-nanya na Ihirailu i Hanganji Peka anana i Ramalia, nanjadi hanganji Yahunda i Ahàhu anana i Yotàmu.

²La rehi nu dua kambulu-na na ndaungu lurina hi na-pareta la Yeruhali hakambulu nomu mbua ndaungu mandaina. Nda nakiku-anya na huri luri hàmuna i Hanganji Ndautu, na boku la mangilu-na, tàka nawunda-ha da manda liya na etina i MIRI, na Alana.

³Nakiku-nja da huri lurida da hanganji Ihirailu, jiapa nawotu-mbuyaipa pa-kameti maraku na ana wikina, kikunya na huri àngada da tau pambàda wànggana i MIRI welingu la tana Kanaàngu ba natama-nya tau Ihirailu nuna na tana.

⁴Nawotu kameti maraku dàngu natunu dupa i Ahàhu la ngia palumu - ngia palumungu marapu la palindi - palindi dàngu la lumbu pingi ai da ma-marumbingu.

⁵La rehi nu na-kawaha beliya hanganji Endumu[18] na paraingu Elàtu hi nawàngga-ha da tau Yahunda da ma-ngiangu lai nu. Tunaka nu mai-danyaka da tau Endumu hi da-ndàdiku la paraingu nuna lundu lodu nàhu. La rehi numbu ba dahada-nya dàngu ba da-nggupulu-ya na Yeruhali paraïda i Renjingu na hanganji Hiria dàngu i Peka na hanganji Ihirailu, tàka nda da-ngalangu-a pa-pakàku-ya i Ahàhu.

⁷Na-paràhangu pa-palewa-na i Ahàhu lai Tinggulàtu-Pilehiru na hanganji Ahuru pa-patàka-nya na lii langu yiana, “Nyungga ata tuturu-mungga; jia ba tuna, mai àru dàngu pamara àruka welingu la hanganji Hiria dàngu Ihirailu da mahada-ngga nàhu,” wàna.

⁸I Ahàhu napiti-mbu àmahu rara àmahu bara welingu la Umana i MIRI dàngu banda malanja uma hanganji hi na-pangàndi-nja pawua juanya na hanganji Ahuru.

⁹Na-kataku-ya na lii kamahingu-na i Ahàhu paraïna i Tinggulàtu-Pilehiru, hi nanjungu dàngu hi nawàhi-ya na Ndamàhiku. Na dundilu-ha pa-tanawa-nja la Kiru da mangia-nya, tàka i Hanganji Renjingu na-pameti-ya.

¹⁰Ba nalua la Ndamàhiku i Hanganji Ahàhu pa-hàmburu-ya i Hanganji Tinggulàtu-Pilehiru, naita-ya na ngia pawotu maraku la paraingu nuna. Hàla, hi na-pangàndi-nya i Ratu Uria la Yeruhali na hadana nu na ngia pawotu maraku dàngu na hukutu pa-wingungu-na mbutana.

¹¹Ka pahadangu-nanyaka hau ngia pawotu maraku i Uria pa-totuku-nya na hada dàngu na hukutu nu na pangala-na, hi na-palundu-nya ba ndedi nabeli i Ahàhu.

¹²Ba natàka-ka welingu la Ndamàhiku, ita-nanyaka paraïna i Ahàhu ba mbàda lundungu-naka na ngia pawotu maraku.

¹³Hi nawotu kameti maraku banda dàngu maraku uhu nggàndumu la pinuna. Dàngumbu hi naburi-nya maraku angguru, dàngu wai ria welingu la kameti maraku papeku la pinuna.

¹⁴Naita-ya paraïna i Ahàhu na ngia pawotu maraku parunggu na pa-pahinggilu ndumana i MIRI ba nangia padua welingu la Uma Ala dàngu la ngia pawotu maraku na ma-bidingu. Tuna nuduka hi na-paleli-nya na ngia pawotu maraku parunggu la hangga Uma Ala la mbara diana na ngia pawotu maraku na ma-bidingu.

¹⁵Hàlaka nu hi napanii-nya i Uria, “Wànyawa yiana na ngia pawotu maraku-nggu nyungga na ma-bokulu patunu kameti maraku mbaru dàngu kameti maraku malingu da pawotu hanganji dàngu rayatu, dàngu buriya lai nu na maraku angguru welingu la rayatu. Buri-mbunya wai riada mbuu ndàbada da banda pa-maraku wàngu nuna na ngia pawotu maraku. Tàka na ngia pawotu maraku parunggu memangu màta ka nyungga mawànya pa-paàra wànja da wàndi,” wànanya.

¹⁶Na-pahàra-nya paraïna i Uria na pareta pawua-na na hanganji.

¹⁷Tunaka nu nyànggaru-nahaka da kareta ndema welingu la parunggu da pawàngu la Uma Ala i Ahàhu, dàngu na-pukalu-ha da mbàlu welingu la kareta nuda. Na karaba parunggu na maninya la wunggu hakambulu dua ngiu hapi parunggu na-papuru-mbunya hi na-bànjalu-ya la lata watu.

¹⁸Hàla, ka nahàmu wàngu na etina na hanganji Ahuru, na-nyànggaru-ya na rowa bokulu nduma hanganji la Umana i MIRI paraïna i Ahàhu, na-ràpitu-mbuya na pindu tama nduma meha hanganji.

¹⁹Hawiangu da rukuna i Hanganji Ahàhu pambàda tulihu-haka la Mbuku Lii Ndai Hanganji Yahunda.

²⁰Nameti i Ahàhu hi taninya la reti hanganji la paraingu-na i Ndautu. I Hihikia na anana nanjadi hanganji hiluya nyuna.