Read Kambera 2 HANGANJI 17 Bible Online

2 HANGANJI 17 - Kambera bible

2 HANGANJI 17

¹La pa-hakambulu dàmbu wàna na ndaungu pareta-nanya na Yahunda i Hanganji Ahàhu, nanjadi hanganji Ihirailu i Hohia anana i Ela, hi na-pareta la Hamaria hiwa mbua ndaungu mandaina.

²Nanjala nyuna lai MIRI; na nyuna da njalana nda hama dangu pàkuda da njalada da hanganji Ihirailu da ma-pareta ba ndedipa nyuna.

³Nabera-ya dàngu na-panyàku-ya nyuna paraïna i Hàlamanehiru na hanganji Ahuru, hi lupa nimbihu ndaungu ba na-mbayaru hilu katiku lai nyuna.

⁴Na nyuna la hau rehi na-paràhangu papalewa-na i Hohia pa-karai pa-ndulangu lai Hou na hanganji Mehiru. Hàla, pànjangu-nanyaka i Hohia pa-mbayaru hilu katiku nimbihu ndaungu la hanganji Ahuru. Ba napi-nyaka paraïna i Hàlamanehiru na rukuna nuna na pawunda-na i Hohia, yàpa-nanyaka i Hohia hi na-panàngga-nya la uma kapàtangu.

⁵Tunaka nu hada-nanyaka na Ihirailu hi na-nggupulu-ya na Hamaria paraïna i Hàlamanehiru na hanganji Ahuru.[19] La patailu wàna na ndaungu nggupulu-nanya,

⁶— nu na pahiwa wàna na ndaungu pareta-na i Hohia — wàhi-nanyaka na Hamaria paraïna i Hàlamanehiru. Hi na-dundilu-ya na tau Ihirailu pa-tanawa-nya la Ahuru. Hawiangu welingu lai nyuda na-bànjalu-ha la paraingu Hala, hawiangu la lihi Luku Hamburu la ngabana la Nggohàngu, tàka da hawiangui la parai - paraingu la tana Mandai.

⁷Nambera na Hamaria rukuna ba nanjala na tau Ihirailu lai MIRI, na Alada, na mambàda pahàla-ha nyuda welingu la hanganji Mehiru, hi naluhu ngàndiha nyuda welingu la tana nuna. Nyuda da-hamayangu la marapu - marapu

⁸dàngu dakiku-nya na hurida da banjaru pambàda wànggana i MIRI ba na-ndàharungu na banjaru Ihirailu pahada-nja nuda da banjaru. Dakiku-nya na huri na kalaratu pa-kawuku-da da hanganji Ihirailu,

⁹dàngu dawunda-ha da panda mbuhana i MIRI na Alada nyuda. Da-pahadangu ngia palumu - ngia palumungu marapu la mbuu ndàbada da paraingu-da, da makudu hamangui da ma-bokulu.

¹⁰La nimbihu pinu tandula, dàngu la nimbihu pingi ai ma-marumbingu, da-pahadangu katoda marapu dàngu kahala hadana na marapu kawini Ahera.

¹¹Datunu-mbu dupa la mbuu ndàba ngia pawotu maraku la marapu, hama tuna na hurida da banjaru pambàda wànggana i MIRI welingu la tana Kanaàngu. Da-lumungu marapu, jiapakai ka mbàda hiri-nanja i MIRI. Mbuu ndàbana na akatu pawunda-da nawuda-ya na ma-karaü lai MIRI.

¹²

¹³I MIRI na-paràha-nja da papalewa-na dàngu da wunangu-na la tau Ihirailu dàngu Yahunda pa-patàka-nya yiana na panamu-nanja, “Jiakawa pawunda ma-akatu dàngu karadaku ndàba-njawa da hupu liinggu dàngu da ukunggu da pambàda wua-nggunja da boku la mangilu-mi dàngu da pa-patàka-nggunggai nyimi la ngaruda da wunangu da atanggu,” wàna.

¹⁴Tàka nda dabihu-a parongu da tau Ihirailu dàngu Yahunda; da-katiku watu hama tuna da boku la mangilu-da da manda pawai lai MIRI na Alada nyuda.

¹⁵Nda da-karadaku-a da tau Ihirailu dàngu Yahunda la hupu liina i MIRI dàngu nda da-tuturu-a la pa-njanjingu pambàda turana dàngu da boku la mangilu-da. Nda da-wàrihu-aha da lii kanyàngi-na, tàka dalumu-nja da marapu manda ningu linguda, hi lupangu nyuda wiki nda ningu linguda. Dakiku-nya na hurida da banjaru la winggiru-da, jiapa-kai ka mbàda hiri-nanja paraïna i MIRI.

¹⁶Dapangga-ha mbuu ndàbada da Ukuna i MIRI, na Alada, dàngu da-pandoi dua ngiu hapi patuku ka marubuku-nja. Dapandoi-nya kahala hadana na marapu kawini Ahera, da-marubuku-nja da kandunu dàngu dalumu-nya na marapu Mbaàlu.

¹⁷Dawotu-ha da anada ka kameti maraku patunu-ha la marapu. Da-kawanangu boharu dàngu da-paàrangu la mapingu kabeli mata da matama la patuna. Kanjupu karinggatu-ha pawunda panda mbuhana i MIRI,

¹⁸hi kanjupu mbeniya Nyuna lai nyuda dàngu nda nainga-ahapa. Tàka hi nawàru-nja welingu la tana pawua-nanja nyuda i MIRI. Jiaya na pa-hanganji Yahunda-makika na mapeka.

¹⁹Tàka da tau Yahunda-mbu nda da-karadaku-anja da Ukuna i MIRI na Alada. Dakiku-nja da pawunda pakàli wundada da tau Ihirailu,

²⁰na-tulaku-ya nggubulu-na na banjaru Ihirailu paraïna i MIRI. Nahuku-nja dàngu nawua-ha la mu - muhuda da mambana etida. Lundu nda nainga-ahapa, tàka nawàru-nja welingu la tana na pawua-nanja nyuda.

²¹Ba na-kahika-yaka na Ihirailu welingu la Yahunda i MIRI, dawotu-ya tau Ihirailu panjadi hanganji i Yerumbiamu anana i Nembàtu. Hàla, pawiti-nanjaka paraïna i Yerumbiamu pa-dunjaku-nya i MIRI dàngu pawunda nja - njala ma-bokulu.

²²Dakiku-nya na hurina i Yerumbiamu dàngu pa-daingu wunda-daha mbuu ndàbada da njala pawunda-na nyuna,

²³lundu hupu hàla luana nda nahili inga-ahapa nyuda paraïna i MIRI, tàka nawàru-nja welingu la tana na pawua-nanja nyuda. Nuda nu danjadi, hama tuna na panamu-nanja paraïna i MIRI la ngaruda da atana, da wunangu-ka. Tuna nuduka hi dundilu-ha da tau Ihirailu la ngia pa-tanawangu la Ahuru, dàngu lai nu-duhaka da-ndàdiku ningu lundu lodu nàhu.

²⁴Hiluda da tau Ihirailu da pambàda dundilu la ngia pa-tanawangu, na-bànjalu-ha la parai - paraingu-na na Hamaria[20] paraïna hanganji Ahuru da tau welingu la Mbambilu, la Kuta, la Awa, la Hamàtu dàngu la Hepàrawaïmu. Da tau nuda da-mandapu-nja nuda da paraingu hi da-paengangu lai nu.

²⁵La kawunga ndàdiku-da nyuda lai nu nda datembi-aya i MIRI; tuna nuduka hi na-patàka-nja hinga paraïna i MIRI pa-njàkilu-ha hawiangu welingu lai nyuda.

²⁶Ka peka-danyaka na hanganji Ahuru, paraï da tau pa-bànjalu-na la parai - paraingu-na na Hamaria ba nda dapi-anja da uku marapu-na nuna na tana. Tuna nuduka hi na-patàka-nja hinga paraïna nuna na marapu panjàkilu-ha nyuda.

²⁷Jia ba tuna wuangu-nanyaka pareta na hanganji Ahuru ka pangàndi belingu haàtu ratu la Hamaria welingu la hongada da tau pambàda tanawangu la Ahuru. “Paràha-nya nyuna ka nabeli dàngu ka na-ndàdiku lai nu ka peku papeka-nanja nuda da tau, da uku marapu-na nuna na tana,” wàna na hanganji.

²⁸Ka beli-nanyaka na haàtu ratu Ihirailu, na pambàda dundilu la Ahuru welingu la Hamaria, hi na-ndàdiku la Mbetilu. Lai nu na papeka-nya na rayatu nggiki hamana bàdi ba lumunya i MIRI.

²⁹Na nyuna nuda da tau ma-ndàdiku la Hamaria pa-daingu pandoi-mada marapu wikida hi datuha la uma lumu - uma lumungu pa-pahada tau Ihirailu da ma-ngiangu la paraingu nuna amangu. Nimbihu kalibaru pando - ndoi-madanya marapu wikida la paraingu ngia pangiangu-da:

³⁰Na tau Mbambilu na-pandoi kahala hada Marapu Hukutu-Mbenutu, na tau Kuta na-pandoi kahala hadana na Neringgàlu, na tau Hamàtu kahala hadana na Ahima,

³¹na tau Awa kahala hadana na Nipuha dàngu Tàratàku; tàka na tau Hepàrawaïmu dawotu-ha da anada ka kameti maraku-ha la Marapu Àndarameliku dàngu Anameliku.

³²Hinggilu-na na lumu-danja nuda da marapu, dalumu-mbunya i MIRI. Welingu la hongada nyuda dapindi mà - màtu tau ka da-lumungu ba ratuha dàngu la pawotu kameti maraku la uma lumu - uma lumungu marapu.

³³Jia ba tuna, nyuda dalumu-nya i MIRI, tàka lumu-madanjai da marapu wikida, nunjuya na huri lawiti tana ngia paweli-da.

³⁴Lundu lodu nàhu wunda-mada-nyapa na huri lawiti-da nyuda. Nda dalumu-anya i MIRI dàngu nda da-karadaku-anja da ukuna dàngu da hupu liina na pawua-nanja da ana umbuku-na i Yakupu, na pa-patamu-na Ihirailu-mbu.

³⁵Mbàda tura-nanyaka i MIRI yiana na pa-njanjingu dàngu banjaru Ihirailu, “Àmbu lumungu marapu; àmbu marubuku-nja jàka ndia àmbu lumunja, jàka ndia àmbu wotunja kameti maraku.

³⁶Tembika Nyungga, na MIRI, mambàda luhu ngàndikai wàngu kawaha bokulu welingu la Mehiru; marubuku-nggawa Nyungga dàngu wotuwa maraku lai Nyungga.

³⁷Karadaku mànunja da uku dàngu da hupu liinggu da pambàda tulihu-nggu ndumami nyimi. Àmbu lumunja da marapu,

³⁸dàngu àmbu maromba-nja da pa-njanjingu-nggu dàngu nyimi.

³⁹Karadaku-ngga Nyungga, MIRI Alami, napa ku-pahàla-kai welingu la mu - muhumi,” wàna.

⁴⁰Tàka nda dabihu-a parongu da mangia-nya na Hamaria; pa-daingu kata undu-madanya na huri lawiti-da.

⁴¹Nu ba tuna, dalumu-nya i MIRI, tàka dalumu-mbunja da marapu-da. Lundu lodu nàhu tuda nu-mapa da ana umbuku-da.