Read Kambera 2 HANGANJI 18 Bible Online

2 HANGANJI 18 - Kambera bible

2 HANGANJI 18

¹La patailu wàna na ndaungu pareta-nanya na Ihirailu i Hohia anana i Ela, nanjadi hanganji Yahunda i Hihikia anana i Ahàhu.

²La rehi nu dua kambulu limana na ndaungu lurina hi na-pareta la Yeruhali dua kambulu hiwa ndaungu mandaina. Na inana Ambia-ya na tamuna anana i Hakaria-ya.

³Nawunda-ya na maliya na etina i MIRI nyuna i Hihikia kikunya na hurina i Hanganji Ndautu na boku la mangilu-na.

⁴Na-pakabu-ha da ngia palumu - ngia palumungu marapu; napàpa-ha da katoda marapu, dàngu na-paruha-ha da kahala hadana na marapu kawini Ahera. Na-pakabu-mbuya na kataru parunggu pa-pandoi-na i Muha, Nehutàngu ba wàdanya. Nadu lundu la rehi nu ba datunu-du dupa da tau Ihirailu patembi wànya nu na kataru parunggu.

⁵Welingu la mbuu ndàbada da hanganji Yahunda, ba ndedipa nyuna hamangui ba taliuna nyuna, nda ningua mahama-nya i Hihikia. Napawai nyuna lai MIRI, na Ala Ihirailu,

⁶dàngu na-tuturu lai Nyuna. Ndedima duna na-ndubaku-ya i MIRI. Mbuu ndàbada da hupu liina i MIRI da pawua-na lai Muha na-karadaku weli etinja paraïna i Hihikia.

⁷Tuna nuduka hi pa-daingu ndula-nanya paraïna i MIRI hi na-madàpangu la mbuu ndàba paraïna. Na-patula ngganggangu hangganya na hanganji Ahuru, dàngu nda nabihu-a pa-hurutu nyàku lai nyuna.

⁸Na-pakàku-ya na tau Pilitingu hi naramba-nja da ngia pa-ngiangu-da, piti welingu la ndeha makudu halawàla lundu la paraingu ma-bokulu halawàla, papohu-nya na Nggaha dàngu la ngaba winggiru-na.

⁹La papatu wàna na ndaungu pareta-na i Hihikia, nu na papihu wàna na ndaungu pareta-nanya na Ihirailu i Hohia, nahada-nya na Ihirailu dàngu na-nggupulu-ya na Hamaria, paraïna i Hàlamanehiru na hanganji Ahuru.

¹⁰Ba tailu mbua ndaunaka mandaina na-nggupulu-ya, mbera-nanyaka na Hamaria. Nuna nu nanjadi la panomu wàna na ndaungu pareta-na i Hihikia, dàngu la pahiwa wàna na ndaungu pareta-na i Hohia.

¹¹Tunaka nu dundilu-nanyaka na tau Ihirailu pa-tanawa-nya la Ahuru paraïna hanganji Ahuru; hawiangu welingu lai nyuda da-bànjalu-ha la paraingu Hala, hawiangu la lihi Luku Hamburu la ngabana na Nggohàngu, tàka hawiangu la parai - paraingu la tana Mandai.

¹²Nambera na Hamaria rukuna ba nda da-karadaku da tau Ihirailu lai MIRI, na Alada, da-hinggilu-nya na pa-njanjingu patura-na i MIRI dàngu nyuda, dàngu dapangga-ha mbuu ndàbada da hupu liina i Muha na atana Nyuna. Nda dabihu-a parongu dàngu nda dabihu-a pa-kikungu.

¹³La pa-hakambulu patu wàna na ndaungu pareta-na i Hihikia hanganji Yahunda, nahada-nja hi na-pakàku-ha da paraingu Yahunda da maningu tindingu-da paraïna i Hànaheripu, na hanganji Ahuru.

¹⁴Ka pangàndi-nanyaka langu tungu yia i Hànaheripu na maninya la Lakihu paraïna i Hihikia, “Njala-manggu-nyaka. Jia ba tuna ku-kamahi-nggau màla àruki làti umbu kau jiaka pahada-nggama nyuma; nggàra bia pakarai-mu umbu, napa kuwua-manggau duku,” wàna. Nahema i Hànaheripu ba lupangu-ma bàdi na-pangàndi-nya nyuna paraïna i Hihikia 10.000 kilu àmahu bara, dàngu 1.000 kilu àmahu rara.

¹⁵Tuna nuduka hi na-pangàndi ndàbanja lai Hànaheripu da àmahu bara da maninja la Umana i MIRI dàngu la kanai àmahu la uma hanganji paraïna i Hihikia.

¹⁶Napiti-ha da àmahu rara la pi - pindu Umana i MIRI dàngu da pambàda tuu wikina i Hihikia la patenga - patenga pindu, hi na-pangàndi-mbunja lai Hànaheripu.

¹⁷Na nyuna na hanganji Ahuru na-pangàndingu hapamba bokulu tanatara welingu la Lakihu pa-kapipi tau matailu ngora tanatara mangia dita, jia-duhaka: haàtu liku uru, haàtu ma-tanara pa-ngunungu[21] dàngu haàtu ngora manggangu hanganji, la pahada-nya na Yeruhali. Datàka la paraingu nuna hi da-mandapu-nya na ànda la hau pangia, Woka Matanggu Baha ba wàdanya la lihi londa wai na malonda-ya na wai welingu la karaba mbara dita.

¹⁸Tunaka nu wara-danyaka papaau-nya i Hihikia. Ka lua-danyaka da tau matailu panggawi-na Hihikia pa-hàmburu-ha nyuda. Nu da tau matailu panggawi jiaha i Eliyakimu anana i Hilikia, na ngora kuru uma hanganji, i Hepuna na hakaratarihu nanggara, dàngu i Yowàhu anana i Ahawàpu, na ma-paloku banda nanggara.

¹⁹Na haàtu welingu la ngora tanatara Ahuru napanii-nja nyuda, “Patàka-nya yiana lai Hihikia na paniina na hanganji Ahuru, ‘Ka nggikina ku-kapingatu-ma duku hi wàmu?

²⁰Toma-mana-nyaka ba wàngu pa-kareuku jua-a, ka hiluya na wulu aka dàngu na kapingatu tanatara, wàmu la pakaka-mu? Nggamuya na pamonu-mu hiu toru mbeni pa-ndubaku-ya na hanganji Ahuru?

²¹Umonunya na pa-ndulangu-na na Mehiru, tàka hama biana nu ba tokungu wàngu pola ilahu; napa nambata nuna na tokungu hi nahàka-ya na limamu. Tuna numaka na hanganji Mehiru la mbuu ndàbana na tau mamonu-nya nyuna,’ wàna” wàminya.

²²Na pangalangu-na napanii nuna na parawira Ahuru, “Jàka ndia talànga wanguna ipanii ba monu-minya i MIRI na Alami? Ba na-wuangu pareta i Hihikia, ka mbulungu la hangga ngia pawotu maraku la Yeruhali-a na-lumungu ningu na tau Yahunda dàngu Yeruhali, ka nu da pa-patàlaru-na nyuna da ngia pawotu maraku dàngu da ngia pa-lumungu, ka nda mangu wikina i MIRI-aha?

²³Nàhu la tamuna na hanganji Ahuru kutoru mbeni nyungga ka ta-pahewangu, jàka wuanggai 2.000 njara jiangu-ma ba nda ningu-ami tau dangu tungu nu ma-kaliti-ha!

²⁴Jiapa la pa-hanobaku-ha da parawira-ma nyuma da mangia wawa halawàla-mbu, nda ràka papa-adanggai. Tàka ba tuna monu-minya na Mehiru-ma-a ka na-pangàndingu kareta pabera dàngu pamba li la njara!

²⁵Bai kakaya ka nda wàngu pa-ndulangu-na i MIRI-a ba mahada-nya dàngu ba ma-pakàku-ya na tanami? I MIRI wikima duna na ma-paràha-nggama nyuma pahada-nya dàngu pa-pakabu-ya!” wàna.

²⁶Hi napanii i Eliyakimu, i Hepuna, dàngu i Yowàhu nu la parawira, “Panii-nggama wàngu hilu Aràmu bia làti, umbu. Àmbu wàngudu hilu Imbarani, napa dapi-dunya da rayatu ne dita la pinu kangeli paraingu,” wàda.

²⁷Nahema nuna na parawira, “Àmbi jia kaka diminya, ba mbulungu lai nyimi dàngu la hanganji-ami na ngia papalewa-nangga na hanganji Ahuru, pa-patàka-nja yiada mbuu ndàbada. Panii-mbunggunya la rayatu ma-ngiangu ne dita la pinu kangeli, da mangangu pa-hambeli wikida, dàngu da ma-unungu wai paburi wikida angumi nyimi napa,” wàna.

²⁸Tunaka nu ndolaku-nanyaka nuna na parawira hi nawara wàngu hilu Imbarani, “Patingingu-wa! Tuna yia napanii-na na hanganji Ahuru,

²⁹‘Ambi bihudu ba na-kahili-kai paraïna i Hihikia; nda jia ngalangu-ana nyuna pa-pamara-kai nyimi.

³⁰Àmbi patingi-dunya na-pamanda-nanggai la pamonu-nya i MIRI. Àmbi jia kaka diminya ba na-pamara-kai napa paraïna i MIRI jàka ndia ba na-pabeta-nya na tanatara Ahuru, la pawàhi-ya na paraingu-mi.

³¹Àmbi patingi-dunya i Hihikia. Kuwua-nggai pareta nyungga hanganji Ahuru kai luhu welingu la paraingu-mi dàngu kai pajàmangu wikimi. Napa peku ngaa-minja da wua angguru la woka wikimi, peku pàda-minja da wua kapilitu la pingi ai wikimi, dàngu peku unungu-mi wai welingu la humuru wikimi,

³²lundu ku-pabeli-nggai la hau tana maeru-ya na tana wikimi. Lai nu ningu woka angguru ngia pa-ngalangu-mi angguru ndumami, ningu woka uhu nggàndumu ngia pa-ngalangu-mi kanguta pangaami. Dàngu pingi haitungu, mina haitungu dàngu manggaluangu, ninguma la tana nuna. Jàkai kikunya na pareta-nggu, napa iluri, ndai metia. Àmbi patingi-dunya i Hihikia! Panyonga-ma-ananggai kai ngàdaya ba na-pamara-kai napa paraïna i MIRI.

³³Màla mbàda ninguka nu marapu banjaru hawiangu ma-pamara-ya na tanada welingu la kawaha-nggu nyungga?

³⁴Nggihaka nu da marapu-na na Hamàtu dàngu na Àrapàtu? Nggiha da marapu-na na Hepàrawaïmu, na Hena dàngu na Iwa? Ningu nu mamai pa-pamara-ya na Hamaria?

³⁵Nggi marapu-ya na mambàda pamara-ya na tanana welingu la kawaha-nggu nyungga? Nggiki pekuna-kaka i MIRI pa-pamara-ya na Yeruhali?’ wàna,” wànanggai.

³⁶Ba darongu-ya na panii nuna, nda ana nggàra-a papanii-da da ma-ngiangu la Yeruhali, ba mbàda wuangu-dunaka pareta i Hanganji Hihikia ka dakandii bia.

³⁷Ka bàriku-dahaka da pakida tanda handuka-da nyuda, i Eliyakimu, i Hepuna dàngu i Yowàhu. Hi dalua pa-patàka-nya na hanganji, jàka nggàraya na pambàda paniina nuna na parawira tanatara Ahuru.