Read Kambera 2 HANGANJI 19 Bible Online

2 HANGANJI 19 - Kambera bible

2 HANGANJI 19

¹Ba narongu-ka i Hihikia na pa-patàka-da nuda da tau matailu, bàriku-nahaka da pakina hi na-kalambungu karungu tanda hawina, hi nalua la Umana i MIRI.

²Tunaka nu palewa-nahaka i Eliyakimu na ngora kuru uma hanganji, i Hepuna na hakaratarihu nanggara, dàngu ba hapajia-ha da ratu ma-kaweda, ka dalua lai Wunangu Yahaya anana i Amuhu. Da-kalambungu-mbu karungu nyuda.

³Tuna yia na lii languna i Hihikia na pa-patàkada lai Yahaya, “Lodu nàhu lodu wai mata wai wiraya; pa-hukungu dàngu pa-pawawa-ta nyuta. Beri kawini-ta matoma rehi habola-na, tàka nanjàpu-nyaka àtalu-na.

⁴Mbàda palewa-naka haàtu parawira-na na mangia dita na hanganji Ahuru pa-pawawa-ya i Ala maluri. Talànga wànguna mbàda rongu-nanyaka nu na paakangu paraïna Alamu tàka hi nahuku-nja napa da maruku ngarunya! Jia ba tuna hamayangu-wa lai Ala ndumada da taunda da maluri-ipa,” wàna.

⁵Ba nangala-nya nu na lii languna i Hihikia,

⁶pa-ngàndingu-nanyaka hemana i Yahaya, “Àmbu mangàdatu-du wàna i MIRI dumu umbu bau ronguya na papanii-da da atana nu na hanganji Ahuru ba nda na-ngalangu-a pa-pahàla-ta nyuta i MIRI ba wàdanda.

⁷Napa i MIRI na-pawiti-nya na hanganji Ahuru, parongu hau lii la ngilu hi kiri belina la tana wikina hi pameti-ya napa lai nu,” wàna.

⁸Narongu na parawira Ahuru ba mbàda yilangu-naka na hanganji-na welingu la Lakihu dàngu ba pabera-nanya la paraingu Lipuna nda namarau-a welingu lai nu. Ka lua-nanyaka lai nu na parawira pa-hàmburu-ya na hanganji-na.

⁹Mbàda rongu-daka na hanganji Ahuru ba nàmunya na pamba tanatara Mehiru pahada-nja nyuda la pairu ngàndingu nai Tiruhaka na hanganji Hundangu. Ba narongu-yaka nuna, pangàndingu-nanyaka huratu na hanganji Ahuru lai Hihikia na hanganji Yahunda.

¹⁰Tuna nu na linguna na huratu, “Àmbu na-panyonga-kau njanjina na Alamu na pamonu-mu ba nda jia yàmihu-amu la limanggu nyungga.

¹¹Hi mbàda rongu-dumuka ba pa-pakabu ailulu-maha nimbihu-da da paraingu da pahada-da da hanganji Ahuru. Àmbu jia kaka-munya ba peku maramu!

¹²Ba da-pakabu-ha da paraingu Nggohàngu, Haràngu, dàngu Renjipu paraï da boku la mangilu-nggu dàngu ba pameti-ha da tau Endingu da mangiangu la Telaharu, nda ningua marapu-da ma-pamara-ha nyuda.

¹³Nggihaka nàhu da hanganji paraingu Hamàtu, Àrapàtu, Hepàrawaïmu, Hena dàngu Iwa?” wàna.

¹⁴Nakeiya na huratu i Hihikia welingu lai nyuda nu da papalewa, hi nadiha-ya. Hàlaka nu hi nalua la Umana i MIRI hi na-wàlahu-ya na huratu la hanggana i MIRI,

¹⁵nahamayangu, “Ou MIRI, Ala Ihirailu, ma-mandapu la pinu patau awangu,[22] didi meha-akau Nyumu Ala ma-pareta ndàbaha da pa-hanganji la pinu tana. Nyumuma ma-padikangu awangu tana.

¹⁶MIRI, hamata àru-kiya na matàka-nggama nàhu. Rongu ndàbaya na paaka-nanggau Nyumu, Ala maluri paraïna i Hànaheripu!

¹⁷MIRI, mapii-manya duma nyuma mbuu ndàbama, ba mbàda dangu-maka banjaru pa-patàlaru-da da hanganji Ahuru dàngu hi da-pakabu-ha da tanada.

¹⁸Datunu dàngu da-pakabu-ha da marapu-da, ba nda ana ningua kawaha-da. Ruku lima tau pinu tana-aha nyuda, kahala hada pa-pandoi welingu la ai dàngu welingu la watu-aha.

¹⁹Ou MIRI, Alama, pahàla-kamawa welingu la tau Ahuru nuda, ka napinya paraï mbuu ndàba banjaru la pinu tana, ba didi-akau Nyumu Ala ma-pamehangu,” wàna.

²⁰Tunaka nu pa-ngàndingu-nanyaka lii langu i Yahaya lai Hanganji Hihikia, na pahema wànya na hamayangu-na na hanganji,

²¹napanii i MIRI, “Nariki-nggau dàngu na-paaka-nggau paraïna paraingu Yeruhali, ha Hànaheripu.

²²Upidunya jàka nggamuya na pa-paaka pa-iraku-mu? Nyungga, Ala Ihirailu, Ala ma-matua. Kanjupu ngànjangu-kau bau hanggangga Nyungga.

²³Uparàhangu papalewa-mu papanii abungu ba mbàda panyàku-muhaka da palindi da majangga halawàla la Limbanongu, wàngu mbuu ndàba da kareta pabera-mu da madangu. Ungànjangu wànya bau pungguha da pingi kajiuna da majangga halawàla dàngu da ma-manandangu halawàla dàngu bau lumbu làpahu-nja da omangu-na da ma-pangihingu halawàla.

²⁴Ubokulu eti wàmbunya bau àki humuru hiu unungu wai la ta - tana tau hangàdangu, dàngu ba dakali - lijaku pamihi-ya na Luku Nilu paraï da panjuri-mu.

²⁵Ndedi-mapa urongu ba mbàda welingu la handàka-manaka ba mbàda wuku-ngguhaka nuda mbuu ndàbada? Tàka nàhu pahàra-nggunjaka. Nyunggama mawua-nggau kawaha pa-pakabu-ha da paraingu da maningu tindingu-da hi lundu tanyungguru watuha.

²⁶Da tau da ma-ndàdiku lai nu nda da-payatangu-a; dawàngu pa-katàtaku dàngu da-mangàdatu-ma-a. Hama rumba matumbu la maràda-ha nyuda jàka ndia rumba matumbu la toku ndidu uma, da mamàdu ba naruru-ya ngilu timiru mambana.[23]

²⁷Na nyuna kupi ndàbanya na rukumu nyumu. Kupinya jàka nggàraya na pawunda-mu dàngu jàka nggi ulaku ningu.

²⁸Kupi-manya ba dira karaü-ya na etimu hanggangu lai Nyungga, dàngu mbàda rongu-nggunyaka rukuna na ngànjangu-mu. Nàhu ku-pakàna-nya katekaru na urumu dàngu rapa na ngarumu ka ku-ruruhu pabeli-nggau la ànda ngia palimu bau pamaingu,” wànanya.

²⁹Na-pangàndi-mbunya na lii yiana i Yahaya lai Hihikia, “Yianaya na tandana jàka nggàraya napa na manjadi. Napa ingangu uhu nggàndumu idingu la ndaungu nàhu dàngu la ndaungu na manàmu-nya. Na nyuna la hambeli-na nu peku-mika pa-tondungu uhu nggàndumu dàngu pa-pamula angguru hi ipàdanya ihina.

³⁰Da tau Yahunda da maluri-ipa napa da-mbokaru hama tuna ngara matumbu ma-tanjiku amuda hi datuu wuada.

³¹Napa ningu tau mamara la Yeruhali dàngu la pinu tandula Hiungu, nadu ba mbàda kawuku-nanyaka paraïna i MIRI ba lupangu-ma nuna nanjadi.

³²Yiana-yaka na papanii-na i MIRI rukuna na hanganji Ahuru, ‘Nda jia tama-ananya na Yeruhali jàka ndia nda ana haumbu pana papuli-na la tubana nuna na paraingu. Dàngu da panjuri maningu temingu-da, nda ana haàtu-mbu ma-ndàharu lihinya na paraingu, dàngu nda jia pahadangu-ada tindingu la winggiru-na pa-nggupulu wànya.

³³Napa na-belingu ànda ngia palina ba na-pamaingu na hanganji Ahuru, dàngu nda tama-nanya na paraingu. Nyungga yia MIRI, mambàda panii.

³⁴Napa ku-kahiri-ya dàngu ku-opanya na paraingu Yeruhali, lumuna na wikinggu ka tembi wàngga dàngu lumuna na pa-njanjingu-nggu dàngu i Ndautu na atanggu,’ ” wàna.

³⁵La rudungu nunama namaiya na papalewa-na i MIRI la kotaku maü tera tau Ahuru, hi na-pameti 185.000 panjuri. Hadangu la mbaru dawàngu pa-taneparu biaka da metida.

³⁶Ka yilangu-nanyaka i Hànaheripu na hanganji Ahuru hi nabeli la Naniwa.

³⁷La hau lodu, ba talànga lumungu-na la uma marapu Niruku, da-pameti-ya nyuna wàngu hapanda paraïda i Àndarameliku dàngu i Harehiru, da anana. Hàlaka nu palai-danyaka la tana Araràtu. Ka njadi-nanyaka hanganji i Ehàruhandungu na ana haàtu-na hiluya nyuna.