Read Kambera 2 HANGANJI 2 Bible Online

2 HANGANJI 2 - Kambera bible

2 HANGANJI 2

¹Toma-nanyaka na rehina ka padita-ya wàngu làpuru la awangu i Elia ba wàna i MIRI. La rehi nu mbàda hadangu-naka i Elia welingu la Ngginggalu dàngu i Eliha,

²nàhu la ngarangia panii-nanyaka i Elia lai Eliha, “Ndàdiku-wa yiahu; palewa-nangga la Mbetilu i MIRI,” wànanya. Na nyuna nahema i Eliha, “Parongu-na i MIRI maluri dàngu parongu-na na ndewamu ama, nda jia màta-anggunggau ama,” wànanya. Ba tuna pa-kariangu-danyaka ba dalaku pangalangu la Mbetilu.

³Da ha-kanguhuru wunangu da ma-ndàdiku lai nu dalua pa-tàbuku-ya i Eliha hi da-paàrangu, “Upii-dunya dumu ba piti-nanyaka la lodu nàhu i MIRI na umbumu hi màtanggau nyumu?” wàdanya. “Deningu-na kupii-manya,” wàna ba nahema i Eliha. “Na nyuna màlawa nyuna, nggàra hi tapanii wànya nuna,” wànanja.

⁴Tunaka nu panii-nanyaka i Elia lai Eliha, “Ndàdiku-wa yiahu; palewa-nangga la Yeriku i MIRI,” wànanya. Na nyuna nahema i Eliha, “Parongu-na i MIRI maluri dàngu parongu-na na ndewamu ama, nda jia màta-anggunggau ama,” wànanya. Ba tuna lua-danyaka pa-kadua-da la Yeriku.

⁵Da ha-kanguhuru wunangu da ma-ndàdiku lai nu, dalua pa-tàbuku-ya i Eliha hi da-paàrangu, “Upii-dunya dumu ba piti-nanyaka la lodu nàhu i MIRI na umbumu hi màtanggau nyumu?” wàdanya. “Deningu-na kupii-manya,” wàna ba nahema i Eliha. “Na nyuna màlawa nyuna, nggàra hi tapanii wànya nuna,” wànanja.

⁶Tunaka nu panii-nanyaka i Elia lai Eliha, “Ndàdiku-wa yiahu; palewa-nangga la Luku Yorundangu i MIRI,” wànanya. Na nyuna nahema i Eliha, “Parongu-na i MIRI maluri dàngu parongu-na ndewamu ama, nda jia màta-anggunggau ama,” wànanya. Ka laku-danyaka la Luku Yorundangu,

⁷dàngu ndàki-danja paraï lima kambulu wunangu. Hàla, pànjangu-danyaka la hingi luku i Elia dàngu i Eliha, tàka da wunangu da malima kambulu-da da-ndolaku nda nggi tuana marauna welingu lai nu.

⁸Àli-nanyaka na kalembi malaina i Elia hi na-kuluru-nya hi napalu wànya na wai luku. Ka pabiwa kadua ngiangu-nanyaka na wai luku, hi peku linanya na lukuna na mamàdu nyuna dàngu i Eliha.

⁹Tàka la hapapa paàra-nanyaka i Eliha paraïna i Elia, “Nggàra pambuha-mu pawunda-nggunggau ba ndedipa napiti-ka i MIRI dàngu ba ndedi màta mehanggau nyumu?” wànanya. Nahema i Eliha, “Pa-kangeha-ngganyawa lai nyungga na kawaha-mu ama, ka peku hilu-nggunggau nyumu ama,”[2] wànanya.

¹⁰“Aiha, ma-kanjupu kalutu-ya yiana,” wàna ba nahema i Elia. “Na nyuna jàkau itaka nyungga la rehi piti-nangga i MIRI, pa-kataku-ya na pakarai-mu. Jàka ndau itaka pa-tebuku-ya na pakarai-mu,” wànanya.

¹¹Ba talànga lakuda pa-banjaru pangalangu-madanya. Hi jia tàka biana na hau kareta maningu epingu payila njara maningu epingu na mamai pa-pahewa-nja nyuda pa-kadua-da hi na-padita-ya kaputi ahu la awangu i Elia.

¹²Naita-ya paraïna i Eliha hi nawara, “I Elia, na amanggu! Na amanggu! Na mini kaborangu rihi talu na ma-kahiri-ya na Ihirailu! Nda ni-anggaupa ama!” wàna. Ka munangu-nanyaka i Elia welingu la matana i Eliha. Paraï pa-hawina nahira kadua ngianya na kalembi malaina i Eliha,

¹³hàlaka nu hi naputu-ya na kalembi malaina i Elia na ma-kanabu, hi nabeli dàngu na-ndolaku la hingi Luku Yorundangu,

¹⁴tunaka nu palu wànanya-ka kalembi malaina i Elia na wai dàngu paniina, “Ngginiya i MIRI, na Alana i Elia?” wàna. Ba napalu-yaka, pabiwa kadua-ngiangu-nanyaka na wai hi nalaku la hapapa.

¹⁵Daita-ya paraï da lima kambulu wunangu welingu la Yeriku, hi dapanii, “Na kawaha-na i Elia na-haleli-ka lai Eliha!” wàda. Lua-danyaka pa-tàbuku-ya hi da-marubuku la hanggana

¹⁶hi dapanii, “Nyuma yia tau lima kambulu kama ma-àtalu ndàbama. Ba tuna, màlawa ka talua pahimbu-ya i Elia na umbumu. Talànga wanguna mbàda ngàndi-nanyaka Ngahuna i MIRI la palindi jàka ndia la lolangu, hi namàta-nya lai nu,” wàda. “Màtangu!” wàna ba nahema i Eliha.

¹⁷Na nyuna paruji pangalangu-madanya hi lupa na-pajia-ya. Ka laku-danyaka nuda da lima kambulu wunangu pahimbu-ya i Elia tailu mbua lodu mandaina, tàka nda dahunggu-aya.

¹⁸Hàlaka nu beli-danyaka lai Eliha na ma-patiangu la Yeriku. “Ka ni àmbi luadu, hi mbàda wànggu-madu-nggaika?” wànanja paraïna i Eliha.

¹⁹Damai papanii lai Eliha da manda pirada da tau welingu la Yeriku, “Ama, ita wiki-mamunya hàmuna yiana na paraingu, na nyuna nda nahàmu-a na waina hi kiri hungguda pamunju wàla wàngu da kawini woru ihi,” wàdanya.

²⁰“Pitinda maku mabidi,” wàna i Eliha, “dàngu paihi-nya mehi,” wàna. Ka ngàndi-danyaka lai nyuna nu na pakarai-na.

²¹Hàla lua-nanyaka la mata wai i Eliha hi nandauha-ya na mehi la wai dàngu paniina, “Yianaya na papanii-na i MIRI, ‘Ku-paili-ya yiana na wai ka àmbu nahili pawiti-nya na meti jàka ndia na munju wàla!’ ” wàna.

²²Piti welingu la rehi nu ili-nanyaka nu na wai hama tuna na kareuku-na i Eliha.

²³Hàlaka nu laku-nanyaka la Mbetilu welingu la Yeriku i Eliha. Nàhu la ngara ngia daluhu welingu la paraingu da ha-kanguhuru anakeda hi da-paakanya nyuna, “Ha bulu katiku, bulu katiku, yilangu-kau welingu lai yiahu!” wàda ba dawara.

²⁴Na-nggilaku i Eliha dàngu tàngaru-naha nyuda hi naràtu wànja tamuna i MIRI. La rehi numa ba daluhu welingu la omangu da dua ngiu bai mbaruangu hi dahi - hiraha da patu kambulu madua da anakeda la hongada nyuda.

²⁵Laku pangalangu-nanyaka la Palindi Kàramilu i Eliha, tunaka nu beli-nanyaka la Hamaria.