Read Kambera 2 HANGANJI 20 Bible Online

2 HANGANJI 20 - Kambera bible

2 HANGANJI 20

¹La manggawa-na la rehi nu nanggàna-ya hidu manggàri pa-dàkangu i Hanganji Hihikia hi lupa hakudu-kika hi nda nameti. Nalua pa-tadalu-ya paraïna i Wunangu Yahaya anana i Amuhu hi napanii-nya, “Na-wuangu lii langu i MIRI kau pa-lànyapu ndàbaha da lii da pangguma-mu ba nda jia hàmu-amupa dumu umbu. Nda na-mandai-apa napa bau meti,” wànanya.

²Pambeli hanggangu-nanyaka la dindingu i Hihikia hi na-hamayangu,

³“MIRI, pangàda-nya, ba mbàda rajaku-ngguka lai Nyumu wàngu tuturu dàngu wàngu paweli etingu-nggu. Ku-pamukarungu mànuma duku pakiku-nya na pambuha-mu,” wàna. Hàlaka, hii-nanyaka i Hihikia ba nawàngu pamila mumuhu na etina.

⁴Màta-nanyaka i Hihikia paraïna i Yahaya, na nyuna ba ndedi naluhu-ya welingu la talora mbara dalu uma hanganji, na-paràha-nya paraïna i MIRI

⁵pabeli lai Hihikia na hanganji banjaru-na i MIRI dàngu papanii-nya yiana na lii langu, “Na hamayangu-mu mbàda rongu-nggunyaka Nyungga, na MIRI, na Ala palumu-na i Ndautu na boku la mangilu-mu, dàngu mbàda ita-nggunyaka na wai matamu. Napa ku-pahàmu-kau; napa dua modungu ulua la Umanggu.

⁶Napa kubonja-ya hakambulu lima mbua ndaungu na ndaungu lurimu. Napa ku-pahàla-kau nyumu dàngu na paraingu Yeruhali welingu la hanganji Ahuru. Napa ku-opanya yiana na paraingu lumuna na wikinggu ka tembi wàngga dàngu lumuna na pa-njanjingu-nggu dàngu i Ndautu na atanggu,” wàna.

⁷Hàla, na-paràhangu tau i Yahaya pabai wua kapilitu ka perinya na manggàri-na na hanganji ka nahàmu.[24]

⁸Na-paàrangu i Hanganji Hihikia, “Nggàraya na mbutina ba na-pahàmu-ka napa i MIRI dàngu ba peku hili luanggu la Umana i MIRI dua monungu?” wàna.

⁹Nahema i Yahaya, “Napa nawua-nggau mbuti i MIRI ba na-pahàra-nya na njanjina. Nàhu nggiya na pambuha-mu Tamu Umbu: na-ndàharungu bàdi hakambulu nggàji na maü la tanda lodu pa-pandoi-na i Hanganji Ahàhu jàka ndia na-kandulingu bàdi hakambulu nggàji?” wàna.

¹⁰Napanii i Hihikia, “Namuda-a pa-pandàharu-ya hakambulu nggàji na maü,” wàna. “Jia ba tuna pa-kanduli-nyawa hakambulu nggàji,” wàna.

¹¹Na-hamayangu lai MIRI i Yahaya, hi na-pakanduli-nya hakambulu nggàji na maü la tanda lodu paraïna i MIRI.

¹²La manggawa-na la rehi nu narongu na hanganji Mbambilu, i Marondàku-Mbalandàngu anana i Mbalandangu, ba bidi hàmuna welingu la hidu i Hanganji Hihikia. Ka palewa-nanyaka tau pangàndi huratu dàngu patàka wànya i Hihikia.

¹³Nayema-ha ba hapajia-ha nuda da papalewa i Hihikia dàngu na-paita ndàba-njaha da pawulu-na, nu da àmahu rara dàngu da àmahu bara, da mbii kati, dàngu mbuu ndàbada da pambeni wàda da tanatara-na. Nda ana haua panda paita-nanja la uma hanganji dàngu la nggubulu pa-hanganji-na welingu lai nyuda.

¹⁴Tunaka nu lua-nanyaka i Wunangu Yahaya la hanggana i Hanganji Hihikia hi na-paàrangu, “Nggi welida da tau? Nggàra wàda?” wàna. Nahema i Hihikia, “Welida la Mbambilu, na tana mamarau,” wàna.

¹⁵“Nggàra paita-da la uma hanganji?” wàna ba nahili paàrangu i Yahaya. “Mbuta biana!” wàna ba nahema i Hihikia. “Nda ana haua la kanai banda uma hanganji panda paita-nggunja nyuda,” wàna.

¹⁶Hàla, hi napanii i Yahaya la hanganji, “Napanii i MIRI ba

¹⁷natoma napa na rehina la pangàndi-ha la Mbambilu mbuu ndàbada da pawulu wàngu la umamu dàngu da pambàda kangutu-da da boku la mangilu-mu lundu lodu nàhu. Nda ningua ma-kanjepi.

¹⁸Ningu papiti napa welingu la ana umbuku-mu hi panjadi-ha panggawi uma hanganji palumu-nya na hanganji Mbambilu,” wàna.

¹⁹Nahema i Hihikia, “Nahàmu-madu na lii languna i MIRI na pa-patàka-mungga,” wàna. Hi kiri panii tuna nu, “Mili pa-daingu pekuna dàngu màndungu-na nyuna na pa-hanganji-nggu la ngala luringgu,” wàna la kanandingu-na.

²⁰Hawiangu da rukuna i Hihikia rukuna da paondu-na la kaborangu-na, dàngu nggiki hamana ba na-pandoi karaba ngia paihu dàngu londa wai palonda wànya na wai la paraingu, mbuu ndàbada pambàda tulihu-haka la Mbuku Lii Ndai Hanganji Yahunda.

²¹Nameti i Hihikia, hi nanjadi hanganji i Manahi na anana hiluya nyuna.