Read Kambera 2 HANGANJI 21 Bible Online

2 HANGANJI 21 - Kambera bible

2 HANGANJI 21

¹Hakambulu dàmbuna na ndaungu lurina i Manahi ba nanjadi hanganji Yahunda dàngu na-pareta la Yeruhali lima kambulu lima mbua ndaungu mandaina. Na inana Hepihimba-ya na tamuna.

²Nanjala i Manahi lai MIRI ba nakiku-nja da akatu pakàli wundada da banjaru pawàngga-na i MIRI welingu la Kanaàngu ba natama-nya tau Ihirailu nuna na tana.

³Da ngia pa-lumungu marapu da pambàda patàlaru-na i Hihikia na amana na pahada belinja. Na-pahadangu ngia pawotu - ngia pawotu maraku ka lumu wànya na Mbaàlu, dàngu na-pandoi-ha da kahala hadana na marapu kawini Ahera, hama tuna na pawunda-na i Ahàpu na hanganji Ihirailu. I Manahi na-marubuku-mbunja da kandunu.

⁴Mbàda panii-naka i MIRI ba ngia pa-lumungu lai Nyunaya duna na Umana i MIRI, tàka nyuna duna i Manahi na-pahada ninja lai nu da ngia pawotu-nja maraku da marapu.

⁵La talora Umana i MIRI da madàmbu-da na-pahada-nja da ngia pawotu maraku ka rubuku-nja da kandunu.

⁶Nawotu-ya na anana ka kameti maraku patunu-ya. Naihi ulangu-mbu la ngera pa-paloku maningu murungu, manyura, kabeli mata, dàngu na paàrangu la patuna. Kanjupu njalaya nyuna lai MIRI hi lupa nawuda-ya na ma-karaü lai MIRI.

⁷Na ninu maüna na marapu kawini Ahera natuya la Umana i MIRI, tàka làti mbàda panii-naka i MIRI lai Ndautu dàngu lai Halomu anana rukuna nuna daa na Uma, “Lupangu-ma bàdi nalumu-ngga paraï banjaru-nggu daa la Umanggu yiana la Yeruhali, na pambàda lehanggu la njonga hakambulu dàmbu tana ngabada da kabihu banjaru Ihirailu.

⁸Dàngu jàka da-karadaku ndàbanja da hupu liinggu na banjaru Ihirailu dàngu ka danunju-ha da uku da pawua-nanja paraïna i Muha na atanggu, nda jia màta-anggunja pawàngga-ha welingu la tana pambàda wua-nggunja da boku la mangilu-da,” wàna.

⁹Na nyuna nda na-karadaku-a lai MIRI na tau Yahunda, dàngu na-pawiti-mbunjaipa paraïna i Manahi pawunda njala marihi pa-akatu welingu la njala pawunda-da da ba - banjaru da pawàngga-na i MIRI welingu la Kanaàngu ba natama-nya banjaru Ihirailu nuna na tana.

¹⁰Tuna nuduka hi tuna yia ba napanii i MIRI la ngaruda da wunangu-ka, da atana,

¹¹“Kanjupu akatu-ya i Hanganji Manahi. Kanjupu rihi-kihaipa da akatu pawunda-na nyuna welingu la pawunda-da da tau Kanaàngu. Tàka da marapu-na da pa-pandoi-na jiaha da ma-pawiti-nya panjala na tau Yahunda.

¹²Tuna nuduka, Nyungga, na MIRI Ala palumu-na na banjaru Ihirailu, hi ku-patàka-nya napa tàparu ma-kanjupu bokulu na Yeruhali dàngu na Yahunda hi lupa na-katàtaku ndàba napa nimbihu-na na tau na marongu-ya nuna.

¹³Napa, kuhuku-nya na Yeruhali hama tuna ba mbàda huku-nggunya na Hamaria dàngu i Ahàpu, na hanganji Ihirailu dàngu da ana umbuku-na. Napa ku-podahu pawaila-nya na Yeruhali hama tuna kawinga pabaha hi panggubulu-nya.

¹⁴Napa kumàta-nja da mangia-nya da ma-kanjepi-ipa ka nauhu limanja muhuda, da ma-kalàba-ha napa dàngu da ma-manopangu la tanada.

¹⁵Napa kuwunda ndàbaha nuda la banjaru-nggu rukuna ba danjala lai Nyungga dàngu ba dawuda-ya na ma-karaü lai Nyungga piti welingu ba daluhu da boku la mangilu-da welingu la tana Mehiru lundu lodu nàhu,” wàna.

¹⁶Hinggilu-na ba na-pawiti-nya panjala na tau Yahunda wàngu pandoi-na marapu kanjupu danguha da tau manda njala da pa-pameti-na i Manahi hi lupangu na-njànjaru la nggi - nggini na wai ria la Yeruhali.

¹⁷Hawiangu da rukuna i Hanganji Manahi dàngu rukuda da njala pawunda-na pambàda tulihu-haka la Mbuku Lii Ndai Hanganji Yahunda.

¹⁸Nameti i Manahi hi taninya la woka ngia pambawa uma hanganji nu na woka mbawa Uha. I Amungu na anana nanjadi hanganji hiluya nyuna.

¹⁹Dua kambulu dàmbuna na ndaungu lurina i Amungu ba nanjadi hanganji Yahunda dàngu na-pareta la Yeruhali dàmbu ndaungu mandaina. Na inana Mehulemitu-ya na tamuna anana i Haruhu, tau Yòtumba.

²⁰Hama tuna na amana, nanjala-mbu nyuna lai MIRI.

²¹Nakiku-nja da pawunda-na na amana, na-rubuku-mbunja da marapu parubuku-na na amana.

²²Nda naluri nunju-aya na pambuha-na i MIRI, jiapa na-dunjaku-mbunyapa i MIRI, na Ala palumu-da da boku la mangilu-na.

²³Da panggawi-na i Hanganji Amungu da-pahama kangunduhungu pa-ndubaku-ya nyuna hi da-pameti-ya la uma hanganji.

²⁴Na nyuna da-pameti-ha rayatu Yahunda da ma-pameti-ya i Hanganji Amungu hi dawotu-ya i Yuhia na anana i Amungu panjadi hanganji.

²⁵Hawiangu da rukuna i Amungu pambàda tulihu-haka la Mbuku Lii Ndai Hanganji Yahunda.

²⁶I Amungu pa-taningu-ya la reti la woka mbawa Uha. I Yuhia na anana nanjadi hanganji hiluya nyuna.