Read Kambera 2 HANGANJI 22 Bible Online

2 HANGANJI 22 - Kambera bible

2 HANGANJI 22

¹Waluna na ndaungu lurina i Yuhia ba nanjadi hanganji Yahunda dàngu na-pareta la Yeruhali tailu kambulu hau ndaungu mandaina. Na inana Yendinda-ya na tamuna anana i Andaya welingu la Mbòhukàtu.

²Nawunda-ha da maliya na etina i MIRI i Yuhia. Nakiku-nya na huri lurina i Ndautu na boku la mangilu-na dàngu na-radaku pawingu-manja nggubulu-da da Ukuna i Ala.

³Ningu haàtu hakaratarihu uma hanganji-na i Yuhia na ma-tamungu Hapàngu anana i Ahalia, umbuku-na i Mahulàmu. La pa-hakambulu walu wàna na ndaungu pareta-na i Yuhia, na-paràha-nya la Umana i MIRI na hakaratarihu-na paraïna hanganji, “Luawa lai Ratu Bokulu Hilikia la Umana i MIRI dàngu karaiya na kaloka danguda da àmahu pambàda pauhi-da ba hapajia-ha da ratu da mapawai ngaba la pindu tama Umana i MIRI.

⁵Paràha-nya nyuna ka nawua-ha nuda da àmahu la ma - manduru da ma-hamata-ha da pa-pahàmu la Umana i MIRI. Napa nyuda da-mbayaru wànja nuda da àmahu da wundada

⁶ba hapajia ndàbaha da tukangu ai, da tukangu uma, da tukangu watu, dàngu pakei wàngu ai dàngu watu pawàngu.

⁷Da tau ma-hamata-ha nu da paràma da-padeningu langatàka-ma. Jia ba tuna nda nggàra ihi wàngua pakarai-ha da kaloka-da da àmahu welingu lai nyuda,” wàna.

⁸Na-patàka-nya lai Hilikia na liina na hanganji paraïna i Hapàngu, tàka i Hilikia napanii-nya i Hapàngu ba mbàda hunggu-nanyaka na Mbuku Ukuna i MIRI la Umana i MIRI. Nuna na mbuku nawua-ya lai Hapàngu paraïna i Hilikia, tàka hi nadiha-ya paraïna i Hapàngu.

⁹Tunaka nu beli-nanyaka i Hapàngu la hanganji hi na-patàka-nya ba mbàda piti-dahaka da àmahu pa-pahàmu la Umana i MIRI paraïda ba hapajia-ha da ata hanganji hi dawua-njaha da manduru pa-pahàmu wànya na Umana i MIRI.

¹⁰Tunaka nu napanii i Hapàngu, “Nawua-ngganya yiana na mbuku i Hilikia,” wàna. Hàla, hi nadiha-nya na hanganji nuna na mbuku.

¹¹Ba narongu-yaka nu na ihina na mbuku paraïna hanganji, bà - bàriku-nahaka da pakina paraï pa-hawina.

¹²Hi na-wuangu pareta na hanganji lai Ratu Hilikia, i Ahikàmu anana i Hapàngu, i Àkumburu anana i Mika, i Hapàngu na hakaratarihu nanggara, dàngu i Ahaya na karaha hanganji,

¹³“Luawa pa-paàrangu lai MIRI ndumanggu nyungga dàngu nduma ndàbana na rayatu nggubulu-na rukuna na ihina yiana na mbuku. Nahàngga-nda nyuta i MIRI rukuna da boku la mangilu-nda ba nda da-pahàra-nja da pareta pa-tulihu la mbuku yiana,” wànanja.

¹⁴Ka lua-danyaka i Hilikia, i Ahikàmu, i Àkumburu, i Hapàngu dàngu i Ahaya pa-paàrangu la haàtu tau kawini ma-tamungu Hulunda. Nyuna haàtu wunangu ma-ndàdiku la bidi kotaku la Yeruhali-ya. Na leina Halumu-ya na tamuna anana i Tikuwa, umbuku-na i Hàrahàhu; nyuna matanggu paloku paki lumungu-ya la Umana i MIRI. Ba narongu-yaka na kaloka-da paraïna i Hulunda,

¹⁵paràha-nanjaka pabeli la hanganji pa-patàka-nya

¹⁶yiana na paniina i MIRI, “Napa kuhuku-nya na Yeruhali dàngu na mangia-nya mbuu ndàbana, hama tuna na pa-tulihu la mbuku pabidi dihana na hanganji.

¹⁷Mbàda dunjaku-danggaka Nyungga dàngu dawotu kameti maraku la marapu - marapu. Mbuu ndàbada da pawunda-da dawuda-ya na ma-karaü lai Nyungga. Na-karaü na etinggu hanggangu la Yeruhali, dàngu nda jia pa-wadaru-aya na karaü etinggu.

¹⁸Na nyuna na manggàna-ya i Hanganji Yuhia yianaya na lii langunggu Nyungga, na MIRI Ala Ihirailu, ‘Bau rongu-yaka na pa-tulihu la mbuku nuna,

¹⁹peka-munyaka halaera tàka hiu pa-wawangu wikimu la hangganggu. Mbàda pangàdungu-ngguka la pahuku-nya na Yeruhali dàngu na mangia-nya. Napa ku-panjadi-ya pa-mangginggitu wàngu nuna na paraingu ba itaya, dàngu napa ku-panjadi-ya tamu pa-ràtungu wàngu na tamu Yeruhali. Tàka bau rongu-yaka na pangàdungu-nggu nggepi hii-ma-amunya hiu bariku-ha da pakimu tanda hawina-mu. Mbàda rongu-nggunyaka na hamayangu-mu,

²⁰rukuna nuna nda jia pahàra-anya la ngala lurimu nyumu na hukungu na pa-patàka-nggunya napa na Yeruhali. Napa nyumu umeti mandangu,’ ” wàna. Ka beli-danyaka nuda da papalewa la hanganji hi da-patàka-nya nuna na lii langu.