Read Kambera 2 HANGANJI 24 Bible Online

2 HANGANJI 24 - Kambera bible

2 HANGANJI 24

¹La rehi pareta-na i Hanganji Yuyakimu, na-kaporuku-nya hi na-panyàku-ya na Yahunda paraïna i Nembukatunehàru na hanganji Mbambilu. Tailu mbua ndaungu mandaina i Yuyakimu ba na-karuduku lai Nembukatunehàru, tàka la malamiri-na na-patula ngganggangu.

²Na-pangàndi-nja da kalibaru mambinu madàka-da paraïna i MIRI welingu la banjaru Mbambilu, Hiria, Muapu dàngu Amungu pa-ndubaku-ya i Yuyakimu hi na-patàlaru-ya na Yahunda, hama tuna na pambàda paniina i MIRI la ngaruda da wunangu ba hapajia-ha da atana.

³Hi lupangu nanjadi nuna jiaya ba mbàda panii-naka i MIRI ba pa-wàrungu-ya napa na banjaru Yahunda welingu la tana pawua-nanja nyuda i MIRI. Hi wàrunja rukuna mbuu ndàbada da njala pawunda-na i Hanganji Manahi;

⁴ri - rihi rukuna mbuu ndàba da pawunda-na ba na-pameti-ha da tau manda ningu njalangu. Nda nabihu-a i MIRI pajàma-nya i Manahi rukuda nuda da pawunda-na.

⁵Nggubulu-na na ngaba tana, piti welingu la Luku Epuràtu lundu tàka la padira Mehiru mbara dia, na pahanggau ngaba tana pareta hanganji Mehiru, na-kawaha-ya paraïna hanganji Mbambilu. Tuna nuduka hi nda naluhu-apa welingu la tanana palua pa-pabera na hanganji Mehiru. Hawiangu da rukuna i Yuyakimu pambàda tulihu-haka la Mbuku Lii Ndai Hanganji Yahunda. Ba nameti-ka i Yuyakimu, nanjadi hanganji na anana na ma-tamungu Yuyakingu hiluya nyuna.

⁸Hakambulu waluna na ndaungu lurina i Yuyakingu ba nanjadi hanganji Yahunda dàngu na-pareta la Yeruhali tailu mbua wulangu mandaina. Na inana Nehuta-ya na tamuna anana i Elinatàngu welingu la Yeruhali.

⁹Hama tuna na amana, nanjala-mbu lai MIRI i Yuyakingu.

¹⁰La rehi pareta-na i Yuyakingu, na-hadangu na pamba tanatara Mbambilu pairu ngàndida da parawira-na i Nembukatunehàru, pa-kaporuku-nya na Yeruhali, hi da-nggupulu-ya nuna na paraingu.

¹¹Nu ba talànga nggupulu-ya na paraingu namai wikina la Yeruhali i Nembukatunehàru,

¹²tàka hi da-tamaï lai Nembukatunehàru i Hanganji Yuyakingu dàngu inana, da anana, da ngora tanatara-na dàngu da panggawi la umana. Hàla hi tanawa-nya i Yuyakingu. Nuna nu nanjadi la pawalu wàna na ndaungu pareta-na i Nembukatunehàru.

¹³Na-paruha ndàbaha paraïna i Nembukatunehàru da kanaingu àmahu rara pa-pandoi-na i Hanganji Halomu nduma Umana i MIRI. Hi nangàndi-ha la Mbambilu mbuu ndàbada da banda pa-wilingu da maninja la Umana i MIRI dàngu la uma hanganji. Nuna nu nanjadi hama tuna na-panyura-na i MIRI la mangilu-na.

¹⁴I Hanganji Yuyakingu, na inana da papaha-na, dàngu da panggawi-na dàngu da ngora Yahunda — nggubulu-da 7.000 tau ma-pangora-ha — na-tanawa-nja paraïna i Nembukatuneharu hi dundilu-ha la Mbambilu. Dàngumbu 1.000 mahupu pingu la paràma papohu-nja da matuku bàhi nalaku ngàndiha; mbuu ndàbada nyuda nu mini makapa - pàru-maha dàngu matara la pabera-maha. Mbuu ndàbada da pa-dundilu la ngia pa-tanawangu, papohu ndàbanja da tau bokulu dàngu da tau pangora, — nggubulu-da ràkangu tau 10.000-ha. Tika pambuu ndàbana-ka-amangu na mangia-nya la Yeruhali da pa-dundilu la ngia pa-tanawangu. Dama-kanjepi jia-ahaka da rayatu mamila halawàla.

¹⁷Tunaka nu nawotu-ya i Matanya na ama kuduna i Yuyakingu panjadi hanganji Yahunda paraïna i Nembukatunehàru; hi na-pahilu-nya na tamuna hi Hendikia-ya.

¹⁸Dua kambulu hauna na ndaungu lurina i Hendikia ba nanjadi hanganji Yahunda. Na-pareta la Yeruhali hakambulu hau ndaungu mandaina. Na inana Hamutàlu-ya na tamuna, anana i Yerimia welingu la paraingu Lipuna.

¹⁹Hama tuna i Hanganji Yuyakimu, nanjala-mbu lai MIRI i Hanganji Hendikia.

²⁰Kanjupu hànggaya i MIRI hanggangu la mangia-nya na Yeruhali dàngu na tau Yahunda hi lupa nda na-ihili-anjapa nyuda.