Read Kambera 2 HANGANJI 25 Bible Online

2 HANGANJI 25 - Kambera bible

2 HANGANJI 25

¹Tunaka nu na-patula ngganggangu i Hendikia hangganya i Nembukatunehàru na hanganji Mbambilu. Tuna nuduka hi kiri hadangu-na i Nembukatunehàru dàngu nggubulu kanguhuru pabera-na ba namai pa-kaporuku-nya na Yeruhali la tànggalu hakambulu wulangu hakambulu la pahiwa wàna na ndaungu pareta-na i Hendikia. Da-pahadangu ngia pa-pamàtungu-da la hambeli paraingu, da-pahadangu kangeli ngia pa-nggupulu,

²hàla, hi da-nggupulu pangala-nya na paraingu lundu la pa-hakambulu hau wàna na ndaungu pareta-na i Hendikia.

³La tànggalu hiwa wulangu patu la ndaungu nu, la rehi rimba kambàtaku ba nda ningu ndoku-apa pangaana na rayatu,

⁴na-bòluhu-ya muhu na kangeli paraingu. La rudungu nu, dapalai pamara wikida la Lolangu Yorundangu mbuu ndàbana na tanatara Yahunda, jiapakai ka talànga nggupulu-nanya muhu na paraingu. Daluhu ningu la woka ngia pambawa uma hanganji hi damàngu paluhu li ningu la pindu bokulu na ma-henaku-ha da dàmbu kangeli la pangia lai nu.

⁵Na nyuna dayaulu-ya tanatara Mbambilu i Hanganji Hendikia hi dayàpa-ya la mambila Yeriku. Da taunaka mbuu ndàbada dapalai wàrunya nyuna.

⁶Tunaka nu hi ngàndiya i Hanganji Hendikia lai Hanganji Nembukatunehàru la paraingu Ripula, hi ratanya hukungu.

⁷Da anana pa-pameti-ha la hanggana. Hàlaka nu hi rukiha da wua matana i Hendikia, hi puhiya la tangga hi mangu pangàndi-ya la Mbambilu.

⁸La tànggalu pihu wulangu lima la pa-hakambulu hiwa wàna na ndaungu pareta-na i Nembukatunehàru na hanganji Mbambilu, mai-nanyaka la Yeruhali na haàtu tau na ma-tamungu Nembuharandàngu. Nyuna ma-madaü-ya dàngu mini la ngora tanatara-na i Nembukatunehàru-ya.

⁹Na Umana i MIRI, na uma hanganji, dàngu mbuu ndàbada da uma ma-pangora la Yeruhali natunu-ha paraïna i Nembuharandàngu.

¹⁰Hàla, hi da-nyungguru-ha da kangeli-na na paraingu paraï da tauna.

¹¹Hàlaka nu hi na-dundilu ndàbaha la Mbambilu paraïna i Nembuharandàngu da rayatu da mani-i-njapa la paraingu, nu ba hapajia-ha da mahupu pingu pa-pandoi[27] da ma-kanjepi, da tau mila dàngu da tau da mapalai pala papa la tau Mbambilu.

¹²Na nyuna hawiangu na rayatu da mamila halawàla da manda nggàra maningu-nja, namàta-nja la Yahunda hi na-paràha-nja paràma-ha da woka angguru dàngu da woka.

¹³Da kambaniru parunggu dàngu da kareta la Umana i MIRI papohu-nya na karaba parunggu dabera bàbaru-ha paraï tau Mbambilu, hi dangàndi ndàbaha la Mbambilu da parunggu-da.

¹⁴Dangàndi-mbuha da kanaingu yiada: da hakòpu, da kanai aü ngia pawotu maraku, da paràma wàngu palita, da maku pa-pandemangu wàngu wai ria banda pa-hambàli ka kameti maraku, da maku patunu wàngu dupa, dàngu mbuu ndàbada da banda parunggu hawiangu da pawàngu la huri kalaratu lumungu.

¹⁵Da kanaingu àmahu rara àmahu bara, papohu-nja da maku kudu dàngu da kawinga patuu wàngu wàla epi nangàndi wikiha paraïna i Nembuharandàngu.

¹⁶Da banda parunggu pa-pandoina i Hanganji Halomu nduma Umana i MIRI, nu da kambaniru da madua mbunguda, da kareta, dàngu na karaba bokulu, dira mbotuha mbuu ndàbada hi nda peku timbanja.

¹⁷Da kambaniru parunggu da madua mbunguda hama-mada; da-maràngga 8 mbua metiru janggada dàngu da maràngga hau tubuku kambaniru welingu la parunggu da ma 1,3 metiru janggada. La winggiru nimbihu-da nuda da tubuku kambaniru ningu pa-kalipangu-da dàngu pa-pamanandangu wàngu wua njalima-ha welingu la parunggu.

¹⁸Hinggilu-na nu i Ratu Bokulu Haraya, i Hapanya na ratu ma-pambapangu, da tau matailu da madai pindu Umana i MIRI, da tau malima da ma-madaü-nya na hanganji da mani-i-njapa la paraingu, na mini la ngora, na wakilu mini la ngora na ma-tanara-ha da banda malanja tanatara, dàngu da nomu kambulu tau bokulu hawiangu, nayàpa-ha paraïna i Nembuharandàngu.

²⁰Mbuu ndàbada nuda da tau nangàndi-ha lai Hanganji Nembukatunehàru, la paraingu Ripula,

²¹la ngabana la Hamàtu. Da-pajàra-ha lai nu hi pameti-ha. Tuna nuduka ba dundilu-ha da tau Yahunda welingu la tanada hi ngàndiha la ngia pa-tanawangu.

²²Tunaka nu wotu-nanyaka pa-nggumbunuru Yahunda i Nggandalia anana i Ahikàmu umbuku-na i Hapàngu, paraïna i Hanganji Nembukatunehàru ka na-pareta-ha mbuu ndàbada da tau da ma-ngiangu-ipa lai nu.

²³Ba darongu-ka da parawira dàngu da panjuri Yahunda da mandedi tamaï la hanganji Mbambilu rukuna na ngera wotu nuna, mai ndàba-danyaka lai Nggandalia la Mihipa. Nuda da parawira jiaha i Ihimailu anana i Netanya, i Yuhanàngu anana i Kariahu, i Haraya anana i Tanuhumitu welingu la paraingu Netopa, dàngu i Yahanya welingu la paraingu Maaka.

²⁴Panii-nanyaka i Nggandalia lai nyuda mbuu ndàbada, “Àmbi mangàdatu-dunja da mapawai ngaba la pareta Mbambilu. Ndàdiku biawa la tananda nyuta yiana dàngu ruduku-wa la hanganji Mbambilu. Kupi hàmu-manya duku bai mara nyimi napa,” wànanja.

²⁵Tàka la wulangu pihu la ndaungu nuna i Ihimailu anana i Netanya umbuku-na i Elihama, nyuna wai ria maràmba-mayapa, nalua kariangu tau hakambulu la Mihipa. Dahada-nya hi da-pameti-ya i Nggandalia papohu-nja da tau Yahunda dàngu da tau Mbambilu da maninja lai nu lai Nggandalia.

²⁶Ka palai-danyaka la Mehiru nggubulu-da da rayatu Yahunda, da mawulu hamangui da mamila, kariada ba hapajia ndàbaha da parawira paraï pa-mangàdatu-nja da tau Mbambilu.

²⁷La tànggalu dua kambulu pihu wulangu hakambulu dàmbu na patailu kambulu pihu ndaungu wàna la hambeli dundilu-ya la ngia pa-tanawangu i Yuyakingu, nanjadi hanganji Mbambilu i Ewilu-Marondàku. La ndaungu numa na-pajiliku-nya na paaï pa-namungu-na lai Yuyakingu, hi na-pahàla-ya welingu la uma kapàtangu,

²⁸hi nahàmu-nya eti. Na-parihi-ya na mandapu-na i Yuyakingu welingu la hanganji - hanganji hawiangu da pa-tanawangu la Mbambilu-mbu.

²⁹Nda napaki-apa paki uma kapàtangu i Yuyakingu dàngu naingu nganguna la uma hanganji dàngu pa-wuangu àmahu-ya nduma paluri wàna.