Read Kambera 2 HANGANJI 3 Bible Online

2 HANGANJI 3 - Kambera bible

2 HANGANJI 3

¹La pa-hakambulu walu wàna na ndaungu pareta-na i Yuhapàtu na hanganji Yahunda, nanjadi hanganji Ihirailu i Yoràmu anana i Ahàpu, hi na-pareta la Hamaria hakambulu dàmbu ndaungu mandaina.

²Nanjala nyuna lai MIRI, na nyuna nda hama akatu pàkuna i Ahàpu dàngu i Ihembilu, da ina amana. Da kahala hada pa-pandoi-na na amana ka hamayangu wàngu la Mbaàlu mbàda nyungguru-nahaka.

³Na nyuna ba tuna hama tuna i Yerumbiamu anana i Nembàtu na-ma-pareta ba ndedipa nyuna, tuna numbu nyuna ba na-pawiti-nya panjala na tau Ihirailu, dàngu nutakungu-mananya pawunda-ya nuna.

⁴I Meha na hanganji Muapu, ningu ngia pa-kabua-na mbimbi. Nimbihu ndaungu na-wuangu hilu katiku la hanganji Ihirailu 100.000 ana mbimbi dàngumbu wulu mbimbi welingu la 100.000 mbimbi bumbu.

⁵Tàka ba nameti-ka i Hanganji Ahàpu, patula nganggangu-nanyaka i Meha hangganya na Ihirailu.

⁶Tuna nuduka hi na-hadangu welingu la Hamaria i Hanganji Yoràmu palua pa-hawanjiru-ha nggubulu-da da kanguhuru pabera-na.

⁷Na-pangàndi-nya langu i Yuhapàtu na hanganji Yahunda, “Patula ngganggangu-nanya na hanganji Muapu hanggangga nyungga; ubihudu pa-karia-ngga nyungga la pabera pa-hanobaku-ya nyuna, umbu?” wànanya. “Tu biana duna,” wàna ba nahema i Hanganji Yuhapàtu. “Napa ku-kikungu karia-nja da taunggu dàngu da pamba li la njaranggu.

⁸Nggi tali ningu napa ba tanjungu?” wàna. “Taliya na ànda na mapala la maràda telangu Endumu,” wàna ba nahema i Yoràmu.

⁹Ka laku-danyaka i Hanganji Yoràmu kariada na hanganji Yahunda dàngu na hanganji Endumu. Ba pihu mbua lodu-naka mandaina ba dalaku, njàpu-nanjaka wai, hi nda peku unuda da pamba tanatara dàngu da banda pa-bukungu.

¹⁰“Manjurangu-ndanyaka!” wàna ba nawara i Hanganji Yoràmu. “Mbàda wuku-nanyaka i MIRI pa-pajàma-nda nyuta pa-katailu-nda la hanganji Muapu!” wàna.

¹¹Na-paàrangu i Hanganji Yuhapàtu, “Ka nda ningua nàhu yiahu haàtu wunangu ma-ngalangu pa-paàrangu lai MIRI ndumanda nyuta?” wàna. Nahema na haàtu parawira-na i Hanganji Yoràmu, “Ninya yiahu i Eliha anana i Hapàtu! Àmangu na-pambapa dànya i Elia,” wàna.

¹²“Deningu-mana, ba napanii langatàka-ma i MIRI la ngaruna nyuna!” wàna i Hanganji Yuhapàtu. Ka laku-danyaka pa-katailu-da nuda da hanganji lai Eliha.

¹³“Ka nggikina hiu karai ningu pa-ndulangu lai nyungga?” wàna i Eliha la hanganji Ihirailu. “Lua ningu bia la wunangu - wunangu-da da ina amamu!” wànanya. “Ndia-a!” wàna ba nahema i Yoràmu. “Bai MIRI-maka na mawuku-ya la pawua-kama nyuma pa-katailu-ma la hanganji Muapu,” wàna.

¹⁴Nahema i Eliha, “Parongu-na i MIRI maluri, na palumu-nggu, kupanii pa-tànjingu ba nda ku-kapihi karia-anggau nyumu, jàka nda jiaya i Hanganji Yuhapàtu na patembi-nggu.

¹⁵Nàhu ngàndi-nggawa nàmu haàtu mini jungga,” wàna. Tunaka nu ba talànga jungga-nanya na junggana nuna na tau, tunggulu-nanyaka Ngahuna i MIRI i Eliha,

¹⁶hi napanii, “Yianaya na papanii-na i MIRI, ‘Pandoi-wa londa wai - londa wai la luku mihi[3] yiana.

¹⁷Jiapa-kai ka ndai itaya puruna na urangu jàka ndia hapuputu-na na ngilu, na nyuna ba tuna napa nabundu làndangu na wai la luku mihi yiana. Napa ingalangu wai tuda unungu-mi nyimi dàngu da banda pa-bukungu,’ ” wàna.

¹⁸Hi nahili panii pangalangu i Eliha, “Na nyuna nuna mamuda-aya duna lai MIRI. Napa Nyuna nawua-mbunggai talu la tau Muapu.

¹⁹Napa inyungguru ndàbaha da paraingu da maningu tindingu dàngu da mamana - nandangu; napa ipunggu ndàbaha da pingi wua ai pangangu; napa ihungguru ndàbanja da mata wai, dàngu napa ihauraku-nja watu mbuu ndàba da wokada da makambo - mboka hi lundu daruha halawàla,” wàna.

²⁰Hadangu harii la rehi wotu maraku la mbaru, lulungu-nanyaka na wai welingu la Endumu hi lupangu na-lumburu-nya nuna na luku mihi.[4]

²¹Ba darongu-ka da tau Muapu ba mai-danyaka pahada-nja paraï da hanganji tau matailu, ka dundilu ndàba-dahaka la padira tana da tau da mapeku pa-kawanangu pambeni wàngu — piti welingu la marihi pa-katuangu lupa la marihi pa-kanguraku — .

²²Hadangu harii, ba dahada mbarungu-ka handaraku-nanyaka lodu na pinu wai hi na-parara wai riangu ba itaya.

²³Kaladaku-danyaka, “Na wai ria! Jiangu-maka ba mbàda pahada ngàndingu-da hi da-maràngga pameti dua wikida da panjuri welingu la matailu-da da pamba muhu! Màla ka talua pa-rambangu la kalibaru maü terada!” wàda.

²⁴Tàka ba datàka-ka nuda da tau Muapu la kalibaru uma tera, da-nàhaku pa-kanduli-nja paraï tau Ihirailu da ma-ndàharu pangalangu pa-kaluluku-nja ba pameti-ha

²⁵dàngu ba nyungguru-ha da paraingu-da. Nimbihu-da da woka ma-kamboka ngia palida, da-hauraku-nja watu. Lundu mbinu ndàba-danjaka watu da woka. Da-hungguru ndàba-mbunja da mata wai paraï da tau Ihirailu dàngu dapunggu ndàbaha da pingi wua ai pangangu. Na ma-daingu didi-ayaka na paraingu Kiri-Harehitu na parai puhu pareta Muapu. Hupu hàla luana lundu nggupulu-mbuya nuna na paraingu hi da-hauraku-nya watu paraï da mini kawanangu kapitu.[5]

²⁶Ba napàda-nyaka ba nda peku torungu-anapa, kariangu-nanyaka pihu ngahu panjuri mamàhi pa-kawanangu hapanda, na hanganji Muapu hi na-kukutungu pa-boluhu-ya na ngia patorungu-na na hanganji Endumu, tàka nda na-duluku-a.

²⁷Tuna nuduka hi napiti-ya na anana na mahilu-ya làti hi na-mangeji-nya la pinu kangeli paraingu ka kameti maraku-ya nduma marapu Muapu. Ka mangàdatu[6]-danyaka da tau Ihirailu, hi da-kameni beliha da pamba tanatara-da welingu la paraingu nuna hi dabeli la tanada.