Read Kambera 2 HANGANJI 4 Bible Online

2 HANGANJI 4 - Kambera bible

2 HANGANJI 4

¹La hau na lodu lua-nanyaka lai Eliha na haàtu kawini meti lei papaha haàtu wunangu hi napanii, “Ama, nameti-ka na leinggu! Tàka pima-dumunya ama ba haàtu tau manundu lai Alaya, tàka ningu wutangu-na la haàtu tau. Nàhu, mai-nanyaka nuna na tau papiti-ha da madua da ananggu patuha ata, pa-mbayaru wànja da wutangu-na na leinggu na mambàda meti,” wàna.

²“Nggiki hama ndula-nggunggau ràmbu?” wàna ba na-paàrangu i Eliha. “Nggàra nu maningu la umamu ràmbu?” wànanya. “Nda nggàra-a maningu-ngga,” wàna ba nahema na kawini, “hinggilu-na na mina haitungu ba hau ana botina,” wàna.

³Hi napanii i Eliha, “Luawa pakarai pinjangu boti jua pira bia danguda la angu kotaku-mu.

⁴Hàlaka nu tamawa la uma, nyumu dàngu da anamu kau mangu pa-ràpitu pindu. Tunaka nu buriya na lonahu welingu la boti kudu la boti nuda, dàngu pa-hinggilu-ha da mambàda mbinu,” wànanya.

⁵Ka beli-nanyaka nuna na kawini la umana. Hàlaka nu tama-nanyaka la uma dàngu da anana hi da-ràpitu-ya na pindu uma, napiti-ya na boti kudu na ma-ihingu mina haitungu, hi naburi-ya nu na lonahu la bo - boti pawua-danya nyuna paraï da anana.

⁶Ba dambinu ndàbaka da boti, nahili karai hau boti. “Njàpu-danyaka,” wàna na haàtu anana. Ka nda na-njànjaru-apa na lonahu.

⁷Tunaka nu hili lua-nanyaka lai Wunangu Eliha nuna na ina, hi napanii i Eliha, “Dangga-njawa nuda da lonahu pa-mbayaru hàlaha da wutangu-mu, tàka da rihida da-jàmungu kai luri wàngu dàngu da anamu,” wànanya.

⁸Ninya na haàtu kawini wulu na ma-ndàdiku la Hunimu. La hau na lodu ba nalua la Hunimu i Eliha, na-ngàdalu-ya pangangu paraïna nuna na kawini. Piti welingu la rehi nu handàka lua - handàka luana la Hunimu i Eliha la umana na kawini nuna-maya nangangu ningu.

⁹Tunaka nu panii-nanyaka na leina paraïna kawini, “Kupi hàmu-manya na tau na makàli mai lai yiahu, langatàka haàtu atana i Alaya.

¹⁰Màla làti ka ta-pandoi-nya hau ana kurungu la nunggulu ditana na umanda, dàngu ka ta-pamàtu-manya ngia pa-katuda, menja, kanjàka dàngu palita ka peku todu ninguna lai nu handàka mai - handàka maina pa-tadalu-ta,” wàna.

¹¹La hau na lodu nahili mai la Hunimu i Eliha. Ba naheika pa-hangahu la kurungu-na,

¹²paràha-nanyaka i Nggahahi, na tau la lihina, palua pa-paaunya nuna na kawini. Ba namaika nuna na kawini,

¹³napanii i Eliha lai Nggahahi, “Paàra-nya jàka nggiki hama palimba-nggunya na njilina ndumanda nyuta. Raï hi na-mbuhangu bia ka kulua la hanganji jàka ndia la liku uru pabera papanii wànya na pahàmu wàna nyuna,” wàna. Nahema na kawini, “Ngiangu-nggunya la honga kalembi-manggu dàngu nda nggàra-a manjaka,” wàna.

¹⁴Ka paàrangu-nanyaka i Eliha lai Nggahahi, “Jàka tuna nu, nggàra-aka bàdi pawunda-nggunya?” wàna. Nahema i Nggahahi, “Nda ningua anana dumu umbu, tàka mbàda kaweda-manaka na leina,” wàna.

¹⁵“Paaunya nuna na kawini,” wàna i Eliha. Ka mai-nanyaka na kawini hi na-ndolaku la hangga pindu.

¹⁶Hi napanii i Eliha, “La ndaungu na manàmu-nya la rehi tungu nàhu, lunggu-munyaka haàtu anakeda mini dumu ràmbu,” wànanya. “Àmbu panii ànga na ama!” wàna na kawini. “Ba atana i Ala-madukau ni ama!” wànanya.

¹⁷Tàka deningu-mana na papanii-na i Eliha. La ndaungu ma-pa-ndutungu, ràkangu jiaya la rehi ma-hamangu habolangu-nanyaka haàtu anakeda mini nuna na kawini.

¹⁸Ba na-matua-ka nuna na anakeda, la hau mbaru la rehi muti, lua-nanyaka la woka la amana nuna na anakeda la tau da mamuti uhu nggàndumu.

¹⁹Hi jia wara bia-nanya na amana nuna na anakeda, “Ai! Na-katiu na katiku-nggu!” wàna. “Ngàndiya yiana na anakeda la inana,” wàna na amana la haàtu tau la lihina.

²⁰Ka karia-nanyaka nuna na anakeda la inana, hi nababa-ya inana. Na nyuna la malingu meti-nanyaka na anakeda.

²¹Ngàndi-nanyaka hu dita paraïna inana, la kurungu-na i Eliha, hi na-pakatuda-ya la ngia pa-katuda. Hàlaka nu luhu-nanyaka hi nabita-nya na pindu,

²²hi nalua pa-paaunya na leina. Hi napanii, “Paràhangu nàmu haàtu papalewa dàngu heu kalandai. Lupangu kulua parenggangu-ka bàdi lai Wunangu Eliha, napa kuluu belika,” wàna.

²³“Ka nggikina hiu lua nàhuma?” wàna ba na-paàrangu na leina. “Nda lodu Hangahu-aya nàhu dàngu nda lodu bokulu Wulangu Bidi[7]-mbuya,” wànanya. “Nda nggàra ehia,” wàna ba nahema.

²⁴Ba nawotu-nyaka hela na kalandai, panii-nanyaka na tau papalewa-na, “Ràmbahu-ya na kalandai ka napalai lundu dira mbangatu-na; àmbu pa-wadaru-ya na renggana jàka nda ku-paràha-nggau,” wànanya.

²⁵Ka laku-nanyaka la Palindi Kàramilu la pangia-na i Eliha nuna na kawini. Welingu la mamarau mbàda ita haha-nanyaka paraïna i Eliha ba nàmunya nuna na kawini. Ka panii-nanyaka i Eliha lai Nggahahi “Tàngaru-ya, nàmunya na kawini welingu la Hunimu!

²⁶Parenggangu palua pa-tàbuku-ya dàngu paàra-nya jàka ndiadu nggàra ehina dàngu na leina dàngu na anana,” wànanya. Napanii nuna na kawini lai Nggahahi, ba nda nggàra ehi ndàba-ada.

²⁷Na nyuna ba natàka-ka la hanggana i Eliha, marubuku-nanyaka hi narohu-ha da wihina i Eliha. Payila-nanyaka làti paraïna i Nggahahi na nyuna napanii i Eliha, “Màta bianya! Lalu hawina-maya ba itaya. Tàka nda nggàra-a papanii-nangga i MIRI!” wàna.

²⁸Napanii nuna na kawini, “Ama, nda kukarai-akau làti ana welingu lai nyumu, ama. Àmbu pa-kahewa-ya na monungu-nggu mbàda wànggu-manggauka làti, ama,” wànanya.

²⁹Mbaili-nanyaka i Nggahahi i Eliha, “Parenggangu! Pitiya na tokungu-nggu dàngu laku pangalangu-ma la umana yiana i Ràmbu. Àmbu pànjangu-du la papulu dànya jàka nggamu biaya na pa-hàmburu-mu la ànda. Jàka ningu tau mapulu dànggau, àmbu mangenahu-du la pahema-ya na pulu dànanggau. Bau tàka kika, bànjalu-ya na tokungu-nggu la ihina nuna na anakeda,” wànanya.

³⁰Napanii nuna na kawini, “Ama Eliha! Parongu-na i MIRI maluri parongu-na na ndewamu, nda jia laku wàru-anggunggau, ama!” wànanya. Tuna nuduka hi nalaku karia-nya paraïna i Eliha la umana nuna na kawini.

³¹Mbàda mangilu-nanjaka nyuda paraïna i Nggahahi patuya na tokungu la ihina na anakeda, tàka nda nggàra-a parongu malingu jàka ndia tanda hawiangu ba luri-nanya nuna na anakeda. Tuna nuduka hi nalua i Nggahahi pa-tàbuku-ya i Eliha papanii, “Ndedi na-hadangu-a na anakeda,” wàna.

³²Ba natàka-ka la umana na kawini, tama meha-nanyaka i Eliha la kurungu-na hi naita-ya na anakeda ba na-tanggunggulu la ngia pa-katuda.

³³Ràpitu-nanyaka pindu i Eliha hi na-hamayangu lai MIRI.

³⁴Hàlaka nu panggubu-nanyaka la pinuna na anakeda hi na-padambaku-nya na ngaruna, da matana dàngu da limana la ngaru la mata dàngu la limana nuna na anakeda. Ba talànga panggubu tuna nu mbana-nanyaka na ihina na anakeda.

³⁵Hàla, hadangu-nanyaka i Eliha hi na-wenangu nu la kurungu, tunaka nu hili panggubu-nanyaka la pinuna na anakeda. Ka lundu àhi-nanyaka papihu wundangu na anakeda hi na-pabula-nja da matana.

³⁶Paràha-nanyaka i Nggahahi paraïna i Eliha pa-paaunya na inana na anakeda. Ba natama-ka na inana na anakeda, panii-nanyaka i Eliha lai nyuna, “Yiana-yaka na anamu ràmbu,” wànanya.

³⁷Ka marubuku-nanyaka nuna na kawini la hanggana i Eliha hi naluhu ngàndiya la hambeli na anana.

³⁸La hau rehi tungu-nanyaka na rimba pa-nggàbalungu la nggubulu-na nuna na tana. La rehi numa beli-nanyaka la Ngginggalu i Eliha. Ba talànga pa-pekangu-na la hau kanguhuru wunangu, paràha-nanyaka na tau pa-palewa-na papiti kambelaku ka manahu-nja pangangu.

³⁹Na haàtu welingu la hongada nuda da wunangu naluhu palua pahimbu rii la woka. Na-itangu mahama tuna kamàla karobu-ya. Napàpu padangu-ma wuana, hi nangàndi-ha ba nabeli. Bundu nda pinanya jàka nggàra wuaya, da - datu-nanjaka hi naburi-ya nu la kambelaku.

⁴⁰Ba namemi-ka pabe - beri-nanjaka da wunangu. Tàka ba dakama-nyaka, wara-danyaka i Eliha, “Ai, amai, ma-maüku-ya yiana!” wàda. Ka nda dabihu-apa pangaanya.

⁴¹Ka paràhangu-nanyaka papiti hakudu kanguta i Eliha, hi natuya la kambelaku nuna. Hàlaka nu, “Hili paberi-nyawa nana na pa-manahu,” wàna. Lohangu-nanyaka ba nda paharui wàngu-ayapa nuna na pangangu.

⁴²La hili hau rehi mai-nanyaka na haàtu tau mini welingu la Mbaàlu-Haliha. Nangàndi-nya i Eliha uhu nggàndumu pabidi muti dàngumbu dua kambulu roti pa-pandoi welingu la uhu nggàndumu pa-kawunga muti la ndaungu nuna. Na-paràha-nya na tau papalewa-na nyuna i Eliha ka napabe - berinja nuda da roti da wunangu,

⁴³tàka napanii na papalewa, “Nda jia tuda-ada nduma tau hangahu!” wàna. Nahema i Eliha, “Paberi bianya ka dangangu, nadu ba napanii i MIRI ba jiangu-ma napa dangangu dàngu ba ningupa rihina jàka dahàla-ka pangangu,” wàna.

⁴⁴Ka paberi-nanjaka nyuda nuna na pangangu paraïna tau papalewa, ngangu ndàba-danyaka nyuda. Ba dahàla-ka pangangu ningupa rihina, hama tuna na papanii-na i MIRI.