Read Kambera 2 HANGANJI 5 Bible Online

2 HANGANJI 5 - Kambera bible

2 HANGANJI 5

¹I Naamàngu ngora pabera Hiria-ya kanjupu mbuha dàngu mahumbaru-nanya paraïna hanganji Hiria. Nadu, ba wàngu limana i Naamàngu, ba nawua-nya talu i MIRI na tanatara Hiria. I Naamàngu haàtu mini la ngora ma-kaborangu-ya, tàka na nyuna nanggàna-ya kanyaki tàda ihi pamangginggitungu.

²La hau na rehi nanjungu-nya na tau Ihirailu paraïna tau Hiria. Nu la njunguda dayàpa-ya na haàtu anakeda kawini tau Ihirailu hi dangàndi-ya pa-tanawa-nya. Tunaka nu njadi-nanyaka tau papalewa la papaha-na i Naamàngu.

³La hau na lodu panii-nanyaka nu na tau papalewa la ràmbuna, “Ràmbu, jàka nalua toma làti i umbu la wunangu la Hamaria, jiangu-ma duna na-pahàmu-ya i umbu paraïna wunangu,” wàna.

⁴Ba narongu-yaka nuna i Naamàngu, lua-nanyaka la hanganji hi napanii-nya na papanii-na nuna na anakeda kawini.

⁵Ka panii-nanyaka na hanganji, “Hàmudu, luawa la hanganji Ihirailu, napa nyungga ku-pangàndi-nya huratu,” wàna. Ka laku-nanyaka i Naamàngu dàngu ngàndina 30.000 àmahu bara, 6.000 àmahu rara dàngu hakambulu mawa paki ma-manandangu.

⁶Nu na huratu pangàndi-na tuna nu na linguna, “Ku-pangàndi-nggaunya yiana na huratu umbu, ka natanda-ya na parawira-nggu i Naamàngu wànggunggau, kau pahàmu-ya umbu welingu la hiduna,” wàna.

⁷Ba nadiha-yaka nuna na huratu paraïna hanganji Ihirailu, ba - bàriku-nahaka da pakina paraï pa-kadukungu na etina, hi napanii, “Hanggàmaru-yaka, ka nggikina na hanganji Hiria hi na-karaika pa-pahàmu-ya na tau yiana? Ba nda Ala-kika làti maningu kawahangu pa-paluri jàka ndia pa-pameti tau! Jiangu-maka ba himbu-nanya wihu na hanganji Hiria pa-pahili dàngga nyungga!” wàna.

⁸Narongu-ya nuna i Wunangu Eliha, ka pangàndi-nanyaka na lii langu yiana la hanganji Ihirailu, “Ka nggikina hiu kadukungu etimu? Paràha-nya na tau nuna ka namai lai nyungga ka napinya ba ningu haàtu wunangu yia la Ihirailu!” wàna.

⁹Tuna nuduka hi nalaku i Naamàngu dàngu kareta njarana la umana i Eliha hi na-pànjangu la hangga pindu.

¹⁰Hi na-paràhangu haàtu tau papalewa i Eliha papanii tunanya yia i Naamàngu, “Luawa paihu papihu wundangu la Luku Yorundangu umbu, napa uhàmu ailulu-ma duna umbu,” wànanya.

¹¹Ba narongu-yaka nuna, mbeni-nanyaka i Naamàngu hi napanii, “Ba kukaka-ya nyuna wikima ihu na mamai patàbuku ka dàngu hi na-hamayangu lai MIRI, na Alana, pa-kariangu odahu-naha wàngu limana da mahidu la ihinggu hi kuhàmu, wànggu pàku-aka làti, wàna.

¹²Na Luku Ambana dàngu na Pàrapàru la Ndamàhiku darihi-pa pahàmu welingu la nggi luku bia la Ihirailu! Peku ihu-mbunggu lai nu ka kuhàmu!” wàna.

¹³Ka ndàharu-danyaka palihi-nya paraï da tau papalewa-na, “Umbu, ngera hama tuna jàka na-paràha-nggau làti pawunda ma-kalutu, jiangu-ma bau wundaya umbu. Tàka paràha-nanggau paihu pàkua làti kau hàmu umbu!” wàdanya.

¹⁴Tuna nuduka hi nalaku la Luku Yorundangu i Naamàngu, hi natama la luku pa-talumburu papihu wundangu hama tuna na paràha-nanya paraïna i Eliha. Ka hàmu-nanyaka i Naamàngu. Hayandalu beli-nanyaka na ihina hama tuna ihi bidi mini.

¹⁵Beli pa-kariangu-danyaka lai Eliha dàngu da karia-na, hi napanii, “Nàhu pi-nggunyaka ba haàtu-ana na Ala la pa-nggubulu awangu, nu na Ala na palumu-na na banjaru Ihirailu. Jia ba tuna, màla àru làti umbu kau keiha da pawua-nggu nyungga,” wàna.

¹⁶Nahema i Eliha, “Parongu-na i MIRI maluri na palumu-nggu, nda jia nggàra pa-wuangu-a pakeinggu,” wàna. Na-pambana-ya paraïna i Naamàngu ka na-mbuhangu i Eliha pakeiha da pawua-na, tàka pa-daingu nda bihu-mana i Eliha.

¹⁷Hi napanii i Naamàngu, “Jàka ndau bihuma pakeiha da pawua-nggu umbu, pahia-ngga làti ka kungàndi tana ba kubeli[8] ràka ngàndi hamawa mbanggalu. Nadu, piti welingu nàhu duku na pawotu-nggu kameti maraku mbulungu ndumana i MIRI-a, tàka nduma hawiangu da pa-alangu, ndia-a.

¹⁸Napa jàka nalua pa-hamayangu na hanganji-nggu la umana na Rimungu na marapu Hiria ba lupangu-ma ku-karaha-ya, màla àruki ka najàma-ngga i MIRI,” wàna.

¹⁹“Laku mambiru-wa duna,” wàna i Eliha. Ka laku-nanyaka i Naamàngu. Ndedi namandai-a ba taliuna i Naamàngu,

²⁰“Yi ha, ka nggikina hi puli bianya palaku dàngu nda mbayaru-na?” wàna la etina i Nggahahi, na tau papalewa-na i Eliha. “Lupangu-ma bàdi làti na umbunggu nakeiha nuda da pawua-na na tau Hiria! Parongu-na i MIRI maluri, lupangu kundutu-maya bàdi ka ku-ngalangu ana nggàra welingu lai nyuna!” wàna.

²¹Hàla, ka ndutu-nanyaka i Naamàngu paraïna i Nggahahi. Ba naita-yaka paraïna i Naamàngu ba nàmungu tau, puru-nanyaka welingu la kareta-na hi na-paàrangu, “Ndiadu nggàra ehina?” wàna.

²²Nahema i Nggahahi, “Malangumu umbu, pa-paràhangu-ka papanii-nggau umbu ba hinama-a datàka da tau madua da wunangu welingu la ma-palindingu la Epuraïmu. Tàka nakarai na umbunggu kau wuanja nuda da wunangu da madua umbu 3.000 àmahu bara dàngu dua mawa paki ma-manandangu,” wàna.

²³“Tu-manaka duna!” wàna i Naamàngu, dàngu hi na-ruwatu-ya i Nggahahi ka nangàndi 6.000 àmahu bara. Na-kawuhuku-ha la dàmbu haku nuda da àmahu i Naamàngu, hi napiti dua mawa paki ma-manandangu. Nawua-ha nuda mbuu ndàbada la tau madua tau papalewa-na da pa-paràha-na pa-mangilu-nya i Nggahahi.

²⁴Ba tàkaka la tandula ngia pa-ngiangu-na i Eliha, piti-nahaka da àmahu dàngu da paki i Nggahahi welingu la papalewa-na i Naamàngu hi nalua pa-pahàmu-ha la uma. Paràha-nanjaka pabeli da tau papalewa-na i Naamàngu,

²⁵hi natama beli la uma. Ka paàrangu-nanyaka i Eliha, “Nggi welimu?” wànanya. “Nda nggi weli-anggu umbu!” wàna ba nahema.

²⁶Na nyuna napanii i Eliha, “Na etinggu ninya lai nu ba napuru i Naamàngu welingu la kareta-na pa-hàmburu-kau nyumu. Nàhu nda rehi-ananya ka ngalangu àmahu dàngu ka kei woka haitungu, woka angguru, mbimbi dàngu hapi dàngu ata - ata!

²⁷Bau keiha nuda da pa-wuangu, napa ukei-mbuya na kanyaki-na i Naamàngu. Jiapa lundu nu - numbu dangala-mbunya na kanyaki nuna da ana umbuku-mu!” wànanya. Ba naluhu-yaka welingu lai nu i Nggahahi, ngala-madua-nanyaka nuna na kanyaki — dira baraya na ihina.