Read Kambera 2 HANGANJI 6 Bible Online

2 HANGANJI 6 - Kambera bible

2 HANGANJI 6

¹La hau na lodu dahali ura milada lai Eliha da wunangu pa-hamata-na i Eliha. Dapanii, “Lalu kujuru-na na ngia pa-ndàdiku-nda!

²Ba tuna puli nggama làti ka malua papunggu ai la lihi Luku Yorundangu, dàngu ka mawulu ngia pa-ndàdiku-nda lai nu,” wàda. “Hàmudu,” wàna i Eliha.

³Na haàtu welingu la hongada na-pambanangu ka nalua karia-nja nyuda i Eliha. Na-patunju i Eliha,

⁴hi dalaku kariangu. Ba datàka-ka la hingi Luku Yorundangu, pa-kiringu-danyaka papunggu ai.

⁵Hi jia kanabu biana la wai na ihi kataka-na na haàtu welingu la hongada nyuda, “Ai, inai ama!” wàna ba nawara-nya i Eliha. “Kataka pinjangu-ya nuna!” wàna.

⁶“Nggiya na-kanabu ningu?” wàna ba na-paàrangu i Eliha. Paita-nanyaka na pangia-na paraïna nuna na tau, hi na-kadipu ha-kadipu ai i Eliha hi nandauha-ya lai nu la wai. Ka halindingu-nanyaka na ihi kataka la pinu wai.

⁷“Pitiya!” wàna i Eliha. Pa-jolangu-nanyaka limana nuna na tau hi napiti-ya na ihi kataka.

⁸La hau rehi, pabera-danya na Hiria dàngu na Ihirailu. Ba da-pahamangu-ka dàngu ba ha-pajia-ha da parawira-na, bota-nanyaka paraïna hanganji Hiria jàka nggiya bàdi na ngia pawulu-da maü tera.

⁹Na nyuna na-pangàndingu langu i Eliha la hanganji Ihirailu ka panamu-nya ka àmbu lua lai nu, ba dakàli li ningu da tau Hiria lai nu.

¹⁰Ba tuna na-panamu-nja da tau da ma-ndàdiku lihinya lai nu paraïna hanganji Ihirailu ka da-rimangu mànu padua. Tuna nuduka nda pira wundangu bia ba na-panamu-nya na hanganji paraïna i Eliha.

¹¹Nuna nu kanjupu yawaru-nanya na-makaraü la hanganji Hiria, hi lupa napaau ndàbanja ba ha-pajia-ha da parawira-na hi na-paàrangu, “Lupangu-ma ningu ma-kaleka la honganda. Nggamuya nu? Màla paniiya!” wàna.

¹²Nahema na haàtu welingu la hongada da parawira, “Nda haàtu-a dumu, Tamu Umbu. Jiaya i Wunangu Eliha na mangu mulangu! Nyunama na ma-patàka-nya na hanganji Ihirailu jàka nggàraya na patiki-mu dumu Tamu Umbu, jiapakai ka papanii la kurungu ngia pa-katuda-ya,” wàna.

¹³“Paàra-nya jàka nggiya nyuna,” wàna na hanganji, “ka peku luanggu payàpa-ya,” wàna. Napanii-nya tau ba la Ndotàngu-ya i Eliha.

¹⁴Ka pa-ngàndingu-nanyaka lai nu hapamba bokulu pa-kariangu njara dàngu kareta pabera. Rudungu-ya ba datàka la paraingu lai nu hi da-nggupulu-ya.

¹⁵Hadangu harii la mba - mbaru ba na-hadangu-ka na tau papalewa-na i Eliha dàngu ba naluhu la hambeli, ita-nanyaka na tau Hiria ba na-nggupulu-ya nuna na paraingu, màtu njara dàngu kareta pabera-mada. Ba tuna, beli-nanyaka lai Eliha hi napanii, “Hanggàmaru-ndanyaka Umbu! Nggikina wànda-aka?” wàna.

¹⁶“Àmbu mangàdatu-du,” wàna ba nahema i Eliha. “Darihi dangupa da madaita nyuta welingu lai nyuda,” wàna.

¹⁷Hàlaka nu hamayangu-nanyaka i Eliha, “Ou MIRI, pabula àru-kinja da matana na tau papalewa-nggu ka naita!” wàna. I MIRI na-kataku-ya na hamayangu-na i Eliha hi lupa ba na-tàngaru-ka nu na tau papalewa-na, ita-nanyaka ba nambinu-nya njara dàngu kareta maningu epingu na palindi ma-winggiru-nya i Eliha.

¹⁸Tàka ba da-hadangu-ka da tau Hiria, hamayangu-nanyaka i Eliha, “Ou MIRI, papoki àru-kiha da tau yiada!” wàna. I MIRI na-kataku-ya na hamayangu-na i Eliha, hi dapoki ndàba.

¹⁹Tunaka nu lua-nanyaka i Eliha lai nyuda hi napanii-nja, “Njàrangu-minya. Nda jia-aya yiana na paraingu pahimbu-mi. Mai kai kikungga nyungga, ka kulua patukai la tau na pahimbu-mi,” wànanja. Hàla lua-nanyaka i Eliha patuha la Hamaria.

²⁰Ba datama-nyaka nuna na paraingu, hamayangu-nanyaka i Eliha, “Ou MIRI, pabula àru-kinja da matada ka daita,” wàna. I MIRI na-kataku-ya na-hamayangu-na i Eliha; na-pabula-nja da matada da tau nuda, hi lupa dapinya ba la padua paraingu Hamaria-ha.

²¹Ba naita-haka da tau Hiria paraïna hanganji Ihirailu, paàrangu-nanyaka, “Màla Eliha, ku-pameti-haka bàdi da tau yiada?” wàna.

²²“Màtangu,” wàna ba nahema i Eliha. “Jiapa-kingu da tanatara payàpa-mu la pa-hànjalungu nda jia pameti-amuha Tamu Umbu, ri - rihi-amaka yiada. Wuanja pangangu dàngu pa-ngunungu, hàla, pulinja ka dabeli la hanganji-da,” wàna.

²³Ka paloku-nanjaka remi bokulu paraïna hanganji Ihirailu; ba dahàla-ka pangangu pa-ngunungu, puli-nanjaka pabeli la hanganji Hiria. Piti welingu la rehi nu pànjangu-danyaka da tau Hiria pahada-nya na tau Ihirailu.

²⁴Ndedi nggi tuna mandaina la rehi malamiri, ngàndi ndàba-nahaka da tanatara-na i Mbenihandàtu na hanganji Hiria ka hadanya na Ihirailu. Da-nggupulu-ya na paraingu Hamaria,

²⁵hi kiri rimba pa-dàkangu-na la paraingu, hi lupa walu kambulu àmahu barama wili hau katiku kalandai, dàngu lima mbua àmahu bara dàmbu ònuhu tai kulundiha.[9]

²⁶Handàkangu ba talànga wenangu-na na hanganji la pinu kangeli paraingu, nawara na haàtu tau kawini, “Pa-ndulangu, ou Tamu Umbu!” wàna.

²⁷Nahema na hanganji, “Jàka nda nandula-kau i MIRI, nggiki peku bianggu nyungga pandula-kau nyumu? Nda ningua uhu nggàndumu jàka ndia wai angguru-nggu!

²⁸Nggàra ma-handuka-nggau?” wànanya. Nahema nuna na kawini, “Yiana na angunggu na-pamanda-ngga ka mangaa mangilu-nya kàdi na ananggu nyungga, hàla, la haromu-na ka mamangu pangaa-nya na anana nyuna.

²⁹Tuna nuduka hi ma-manahu-ya na ananggu nyungga hi mangaanya. La haromu-na ba kukarai-ya ka manahu-ya na anana, kawini-nanyai na anana!” wàna.

³⁰Ba narongu-ya nuna, bàriku-nahaka da pakina na hanganji paraï pa-hawina. Da tau da ma-ndolaku la lihina nuna na kangeli peku ita-danya ba karungu pahauna na kalembi daluna tanda handuka-na.

³¹Wara-nanyaka na hanganji, “La lodu nàhuma lupangu nameti-ma bàdi i Eliha. Màla àruki ka na-pambotu halawàla-ya na hukungu-nggu i Ala jàka nda ku-pameti-maya i Eliha!” wàna.

³²Ka palewa-nanyaka haàtu tau paraïna hanganji pa-mangilu-nya nyuna la umana i Eliha. La rehi nu ninya la uma i Eliha, dàngu da ngora panggolu da manda pirada ba talànga maida pa-ariyaa. Ba ndedi natàka lai nu na papalewa hanganji, panii-nanjaka da ngora panggolu i Eliha, “Hamata-maya! Paràhangu-nanya tau pa-pameti-ka nyungga i Mini Pameti tau. Napa jàka natàka nuna na tau, ràpitu-ya na pindu àmbu pahia-dunya patama. Napa la malamiri-na nyuna nàmu wiki-manya na hanganji,” wàna.

³³Ndedi na-lundungu-a pa-kareuku i Eliha, tàka-nanyaka lai nu na hanganji[10] hi napanii, “I MIRI-ma na ma-pabuku-ndanya yiana na handuka lai nyuta! Ba tuna nggàra lingu-naipa ba kumonu-nya na pandulangu-na?” wàna.