Read Kambera 2 HANGANJI 7 Bible Online

2 HANGANJI 7 - Kambera bible

2 HANGANJI 7

¹Nahema i Eliha, “Patingi-nya jàka nggàraya na papanii-na i MIRI! Haromu, ràkangu la rehi tuna nàhu, peku keinaka na tau tailu kilu uhu nggàndumu mahàmu halawàla jàka ndia nomu kilu uhu nggàndumu hawiangu wàngu hau àmahu bara-a,” wàna.

²Nanapa-ya paraïna karaha wikina na hanganji, “Nggiki hama peku biana nu! Palili ka nanjadi nuna, jiapa-kai ka la lodu nàhuma ba na-papurungu ura kawalu welingu la awangu i MIRI!” wàna. “Napa uitaya nuna ba nanjadi, na nyuna mili ana hakudu-a nda jia kapaliku-amunja nuda da pangangu,” wàna ba nahema i Eliha.

³La lodu nu da tau mapatu da mahidu tàda ihi pa-mangginggitungu ninja la hambeli pindu paraingu Hamaria. Dapanii dua wikida, “Nggàra linguna ba tamanda - ndapu patiangu meti lai yiahu?

⁴Jàka tatama la paraingu, napa tameti rimbangu; tàka jàka ta-paengangu lai yiahu jiangu-mbu napa tameti. Nahàmu-kipa ka talua la kalibaru uma tera tau Hiria. Dira-manaka ba dawàngu pa-pameti-ta. Na nyuna peku-mbuna ba nda nggi - nggiki-danda,” wàda.

⁵Ba na-kapàtangu-ka laku-danyaka la kalibaru uma tera tau Hiria, tàka nda haàtu-a paita-da lai nu.

⁶Nadu, ba mbàda parongu-nanjaka malingu da tau Hiria paraïna i MIRI hama tuna nanjungu-na na pamba bokulu li la njara dàngu la kareta. Hi dakaka-ya paraï da tau Hiria ba mbàda hewa-nahaka da hanganji Heti dàngu Mehiru paraïna hanganji Ihirailu pa-kariangu tanatara-da pahada-nja nyuda.

⁷Tuna nuduka hi dapalai pa-pamara wikida la rudungu nu da tau Hiria. Da-dunjaku tudanja nu bia da maü terada, da njarada, dàngu da kalandai-da la kotaku uma tera.

⁸Ba datàka-ka nuda da tau mapatu da mahidu tàda ihida nu la hingi kotaku uma tera, tama-danyaka la hau uma tera. Ngangu ngunungu-danyaka lai nu, dàngu hi dapiti àmahu rara, àmahu bara dàngu paki hi dalua pa-kawini-nja. Hàlaka nu hili beli-danyai hi datama la uma tera hawiangu, hi hili tumadai nu.

⁹Tunaka nu panii-danyaka dàngga anguda, “Nda nahàmu-a yia na pawunda-nda. Yiana yia pulu hàmuya! Jàka ta-patiangu lundu haromu-maipa la mbaru, jiangu-maka ba hukunda. Màla ka ta-patàka-nya yiana la uma hanganji,” wàda.

¹⁰Tuna nuduka hi dabeli la Hamaria hi dawara-nya na madai pindu bokulu paraingu, “Mbàda lua-maka la kotaku maü terada da tau Hiria, tàka nda ningua tau lai nu. Da njara dàngu da kalandai-da jiapa biaha la honduda, tàka da maü tera àtalu dunjaku bia-danja,” wàda.

¹¹Bobaru-danyaka nuna na lii langu paraï da madai hi lupa narongu la uma hanganji.

¹²La rehi nu rudungu-i-nanyapa, na nyuna luhu-mananya na hanganji welingu la kurungu ngia pa-katuda-na hi napanii-nja da panggawi-na, “Patingi-ngu! Kupiinya na pawuku-da da tau Hiria! Dapinda ba rimbangu-ndanya nyuta, tuna nuduka hi da-dunjaku-nya na kotaku maü tera hi dalua pa-kawiningu la maràda pa-kahili-ta nyuta ka taluhu pahimbu pangangu. Hàlaka nu handàka nggupulu-dandaka hi da-mandapu-nya na paraingu,” wàna.

¹³Panii-nanyaka na haàtu panggawi hanganji, “Tamu Umbu, nyuta yia maninda la paraingu hama-ma-ana na ngeranda dàngu da mambàda meti. Jia ba tuna màla ka ta-palewa tau ana mapira palua lai nu patàru-ya jàka nggàraya na mambàda njadi. Màta ka da-kaliti-ha da njara lima ngiu da maninja-pa,” wàna.

¹⁴Ka pindi-nanyaka ana mapira tau, hi na-palewa-ha paraïna hanganji, dahei dàmbu kareta pabera palua pa-kanuturu-ya jàka nggàraya na mambàda njadi la tanatara Hiria.

¹⁵Dalaku-ha lundu la Luku Yorundangu. Nàhu la ànda da-itangu paki dàngu kanaingu ma-taneparu. Mbuu ndàbada nuda ailulu tòku biada-nja paraï da tau Hiria ba dapalai pa-pamara wikida. Beli-danyaka da papalewa hi da-patàka-nya la hanganji.

¹⁶Ka talanjiru-danyaka la hambeli paraingu da tau Hamaria hi da-pariba-nya na kotaku maü tera tau Hiria. Nunjuya na papanii-na i MIRI, hàrangu-nanyaka ba hau àmahu bara-a wili tailu kilu uhu nggàndumu mahàmu halawàla jàka ndia nomu kilu uhu nggàndumu hawiangu.

¹⁷Talànga jia pàkuya la rehi nu ba pa-wuangu wai ngabaya na karaha wikina na hanganji la pa-hamata-ya na pindu bokulu paraingu. Nameti nyuna lai nu ba na-tarohaku-ya rayatu. Nanjadi nuna nunjuya na pambàda paniina la hanganji i Eliha ba nalua lai nyuna na hanganji.

¹⁸Mbàda panii-naka i Eliha, “Haromu ràkangu la rehi tungu nu ba hau àmahu bara-a wili tailu kilu uhu nggàndumu mahàmu halawàla jàka ndia nomu kilu uhu nggàndumu hawiangu ba danggangu la Hamaria,” wàna.

¹⁹Tàka la rehi nu, mbàda panii-naka na karaha wikina na hanganji, “Nggiki hama peku biana nu! Palili ka nanjadi nuna, jiapa-kai ka la lodu nàhuma ba na-papurungu ura kawalu welingu la awangu i MIRI!” ba wàna. Hi nahema-ya paraïna i Eliha, “Napa uitaya nuna ba nanjadi, na nyuna mili ana hakudu-a nda jia kapàliku-amunja nuda da pangangu,” ba wànanya.

²⁰Tuna nuduka na manggànaya na tau nuna — nameti ba na-tarohaku-ya rayatu la pindu bokulu.