Read Kambera 2 HANGANJI 8 Bible Online

2 HANGANJI 8 - Kambera bible

2 HANGANJI 8

¹La hau rehi na-patàkangu rimba pa-nggàbalungu la tana Ihirailu i MIRI la ngala pihu mbua ndaungu mandaina. Ba ndedipa nu mbàda panii-nanyaka na rukuna nuna paraïna i Eliha na kawini welingu la Hunimu na pambàda paluri belina anana. Mbàda paràha-nanyaka nuna na kawini paraïna i Eliha ka na-lelingu dàngu ihi umana palua pa-ndàdiku ningu la hau paraingu.

²Na-pahàra-nya na paniina i Eliha paraïna nuna na kawini, hi dalaku la tana Pilitingu pa-ndàdiku ningu lai nu.

³Nu ba pihu mbua ndauna-ka, beli-nanyaka la Ihirailu. Lua-danyaka dàngu na anana la hangga hanganji pakarai-ya ka pabeli-nya lai nyuna na umana dàngu na wokana.

⁴La rehi nu nakarai-ya i Nggahahi tau papalewa-na i Eliha paraïna hanganji ka napeka-ha da pa-hangàtarungu pawunda-na i Eliha.

⁵Ba jiaya namaina la hanganji nu na kawini welingu la Hunimu pa-patàka-nya na pakarai-na, jia pàkuyai ba talànga paniina i Nggahahi nggiki hamana i Eliha ba na-paluri beliya na haàtu anakeda mambàda meti. Ka panii-nanyaka i Nggahahi, “Umbu ma-mangarangu, jia-mayaka yiana na kawini, tàka yiana jia-mayaka na anana na pa-paluri belina i Eliha!” wàna.

⁶Hi na-paàrangu na hanganji, ka panii-nanyaka nuna na kawini na rukuna nuna na anakeda. Hàlaka nu paaungu-nanyaka haàtu panggawi-na na hanganji hi nawua-nya pareta ka pabeli ndàbanja da manguna nuna na kawini, pa-kariangu nggubulu-da da wili ihi wokana la ngala pihu mbua ndaungu mandaina ba la tana hau paraingu-ya.

⁷La hau rehi nalua la Ndamàhiku i Eliha. Talànga hidu pàkuna i Hanganji Mbenihandàtu. Ba narongu na hanganji ba ninya la Ndamàhiku i Eliha,

⁸napanii na hanganji lai Hahailu, na haàtu panggawi-na, “Ngàndinya patàka wàmunya nuna na wunangu, hàla kau karaiya ka na-paàrangu lai MIRI napa kuhàmu-du nyungga jàka ndia,” wànanya.

⁹Piti-nanyaka patu kambulu ngiu ota i Hahailu hi na-pabuku-nja ma - màtu ihi paraï la paraingu Ndamàhiku, hi nalua lai Eliha. Ba natàka-ka la pangia-na i Eliha, panii-nanyaka i Hahailu, “Na atamu i Hanganji Mbenihandàtu na-palewa-ka pa-paàrangu, napa nahàmu-du jàka ndia,” wàna.

¹⁰Nahema i Eliha, “Mbàda panii-nanggaka i MIRI, ba nameti nyuna napa. Na nyuna panii bianya duna ba nahàmu napa nyuna,” wàna.

¹¹Tunaka nu kanàndaru-nanyaka i Hahailu paraïna i Eliha ba nawàngu pa-palandu-nya mata hi lupa nda nangudu na etina i Hahailu. Hi jia hii biana i Eliha.

¹²“Ka nggikina hiu hii umbu?” wàna ba na-paàrangu i Hahailu. “Rukuna ba kupiinya na akatu pawunda-mu napa hanggangu la tau Ihirailu,” wàna i Eliha. “Napa uhuluha da paraingu-na da maningu tindingu-da, upameti-ha da bidi tau da mahàmu halawàla, upohuha da anarara, dàngu uhàliha da kambuda da kawini mapa-anakedangu,” wàna.

¹³“Ai ha, nyungga duku yia nda nggàra-aka,” wàna ba nahema i Hahailu, “nggiki hama pekuna hi tuna numa-aka wirungu-na na kawaha-nggu!” wàna. “Mbàda paita-nanggaka i MIRI bau njadi hanganji Hiria nyumu napa,” wàna ba nahema i Eliha.

¹⁴Ba nabeli-ka la uma hanganji i Hahailu, paàrangu-nanyaka i Mbenihandàtu, “Nggikina wàna i Eliha?” wàna. “Napa nahàmu i Tamu Umbu, wàna,” wàna ba nahema i Hahailu.

¹⁵Na nyuna la haromu-na piti-nanyaka hawàla hakàla i Hahailu, nahàbu-ya la wai hi na-roduku-nya la matana na hanganji hi lupa nameti hangginangu. Dàngu njadi-nanyaka hanganji Hiria i Hahailu hiluya i Mbenihandàtu.

¹⁶I Yahoràmu anana i Yuhapàtu nanjadi hanganji Yahunda ba mbàda lima mbua ndaunaka pa-pareta la Ihirailu i Yoràmu anana i Ahàpu.[11]

¹⁷La rehi nu tailu kambulu dàmbu ndaungu-naka na ndaungu lurina i Yahoràmu dàngu walu mbua ndaungu mandaina ba na-pareta la Yeruhali.

¹⁸Na-kanoma-ya na anana i Ahàpu, dàngu hama tuna na pawunda-da da ihi umana i Ahàpu, nanjala-mbu nyuna lai MIRI hama tuda da hanganji Ihirailu.

¹⁹Na nyuna nda nabihu-a i MIRI pa-patàlaru-ya na Yahunda ba mbàda njanji-nanyaka i Ndautu na atana, ba pa-daingu hanganji-ha napa da ana umbuku-na.

²⁰La rehi pareta-na yiana i Yahoràmu, na-patula ngganggangu hangganya na Yahunda na Endumu dàngu na-làtiku pareta hanganji wikina.

²¹Tuna nuduka hi naluhu dàngu mbuu ndàbada da kareta pabera-na i Yahoràmu hanggangu la Hayiru. Lai nu na-nggupulu-ya paraï tanatara Endumu, na nyuna la rudungu, nyuna dàngu da ngora pamba tanatara kareta-na da-ngalangu papalai pamara wikida ba da-hiwaru-ya na pamba tanatara muhu, tàka da panjuri-da dapalai pamara wikida pabeli la umada haàtu - haàtu.

²²Piti welingu la rehi nu nda nanyàku-apa na Endumu hanggangu la Yahunda. La rehi nu na-patula ngganggangu-mbu na paraingu Lipuna.

²³Hawiangu da rukuna i Yahoràmu mbàda tulihu-haka la Mbuku Lii Ndai Hanganji Yahunda.

²⁴Nameti hi taninya la reti hanganji la paraingu-na i Ndautu. I Ahahia na anana nanjadi hanganji hiluya nyuna.

²⁵Ba nanjadi hanganji i Ahahia anana i Yahoràmu mbàda hakambulu dàmbu ndau-naka pa-pareta la Ihirailu i Yoràmu anana i Ahàpu.

²⁶La rehi nu dua kambulu dàmbu ndaungu-naka na ndaungu lurina i Ahahia, dàngu hau ndaungu mandaina ba na-pareta la Yeruhali. Atàluya na tamu inana, anana i Hanganji Ahàpu dàngu umbuku-na i Omuri hanganji Ihirailu.

²⁷Rukuna na leina, pa-kalembingu-danyaka da nua kalembi-na i Ahahia dàngu da nua kalembi-na i Ahàpu. Nanjala-mbu nyuna i Ahahia lai MIRI hama tuna da pawunda-da da ihi umana i Ahàpu.

²⁸Nakiku-nya la pabera i Yoràmu na hanganji Ihirailu nyuna i Hanganji Ahahia, pa-hanobaku-ya i Hahailu na hanganji Hiria. Da-pabera la Ramutu, na tana ngaba Nggiliatu. Na-manua i Yoràmu nu la pa-hànjalungu,

²⁹hi nabeli patungu muru la Yihireyilu, tàka hi nalua i Ahahia pa-tadalu-ya nyuna lai nu.