Read Kambera 2 HANGANJI 9 Bible Online

2 HANGANJI 9 - Kambera bible

2 HANGANJI 9

¹La rehi nu paau-nanyaka na haàtu welingu la honga wunangu da pa-ajaru-na i Eliha hi napanii, “Kamomatu-wa palua la Ramutu la Nggiliatu, ngàndiya yiana na boti ma-ihingu mina haitungu.

²Dàngu jàkau takaka lai nu, himbuya i Yehu anana i Yuhapàtu, umbuku-na i Nimihi. Wànda mehaya nyuna la hau kurungu,

³buriya yiana na lonahu la katiku-na, dàngu paniinya, ‘Napanii i MIRI ba wotu-nanggau nyumu panjadi hanganji Ihirailu,’ wàmunya. Hàlaka nu lu yila pa-renggangu-ma welingu la pangia lai nu,” wànanya.

⁴Laku-nanyaka la Ramutu nuna na wunangu bidi mini,

⁵hi natàka-nya i Yehu dàngu ba hapajia-ha da ngora pabera hawiangu ba talànga pa-hamangu-da lai nu. Napanii nuna na wunangu, “Umbu, ningu lii langu pangàndi-nggunggau umbu,” wànanya. Nahema i Yehu, “Nggaa ndumada?” wàna i Yehu ba nahema. “Nduma mehamu nyumua umbu,” wàna ba nanapa-ya paraïna wunangu.

⁶Tunaka nu tama-danyaka la uma nyuda pa-kadua-da, tàka hi naburi-ya na mina haitungu la katiku-na i Yehu paraïna wunangu bidi mini hi napanii, “Napanii i MIRI Ala Ihirailu, ‘Kuwotu-kau nyumu panjadi hanganji la banjaru-nggu na Ihirailu.

⁷Napa nyumu upatàlaru-ha da ihi umana na umbumu i Ahàpu. Tuna nuduka ba kuhuku-nya i Ihembilu na mambàda pameti-ha da wunangu-nggu dàngu da atanggu hawiangu.

⁸Nggubulu-da da ihi umana dàngu da ana umbuku-na i Ahàpu lupangu dameti-ma bàdi. Nimbihu-na na mini ka ma-kaweda-ya ka bidi tauya napa ku-patàlaru-ya.

⁹Napa ku-palua-nja lima da ihi umana hama tuna ba ku-palua-nja lima da ihi umana i Yerumbiamu dàngu da ihi umana i Mbaeha da hanganji Ihirailu.

¹⁰I Ihembilu nda patani-anya; napa nangaanya ahu na metina la ngabana la Yihireyilu,’ ” wànanya. Ba natiki ndàbaha-ka nuda, luhu-nanyaka hi napalai nuna na wunangu bidi mini.

¹¹Beli-nanyaka i Yehu la a-anguna, hi da-paàrangu, “Nggàra lii languya? Nggàraya na pawuku-na nuna na ma-katoba lai nyumu?” wàdanya. “Ipimanya jàka nggàra pawuku-na,” wàna ba nahema i Yehu.

¹²“Ndia-a, nda mapi-anya!” wàda ba dahema. “Màla naa, paniiya!” wàdanya. Nahema i Yehu, “Patàka-nanya na lii languna i MIRI, ba wotu-nangga i MIRI panjadi hanganji Ihirailu,” wàna.

¹³Ka kalàba parengga-danjaka da kalembi malaida da anguna i Yehu hi da-wàlahu-ha la panongu la hanggana i Yehu, hàla, hapii-danyaka taropitu hi dawara, “I Yehu hanganji-ndanya!” wàda.

¹⁴Tunaka nu pa-hamangu-nanyaka wulu aka i Yehu pa-ndubaku-ya i Hanganji Yoràmu na maninya la Yihireyilu la rehi nu. Hi nalua lai nu i Yoràmu ka tunja muru da manua-na ba pa-hànjalungu la Ramutu pa-ndubaku-ya i Hahailu na hanganji Hiria. Napanii-nja ba hapajia-ha da anguna pangora pabera i Yehu, “Jàkai pajia-duya ka kunjadi hanganji nyungga, rima pa-hàmungu àmbu jia ningudu haàtu mapeku luhu welingu la Ramutu palua papanii-nja da tau la Yihireyilu,” wàna.

¹⁶Hàlaka nu hei-nanyaka na kareta pabera-na hi nalaku la Yihireyilu. La rehi nu ndedi nahàmu-a i Yoràmu dàngu ninya i Ahahia na hanganji Yahunda lai nu ba mainanya pa-tadalu-ya nyuna.

¹⁷Na madai la lewatu paraingu naita-ya i Yehu ba nàmunya dàngu da tauna, hi nawara, “Nàmungu hajuru tau ma-hanggangu yiahu!” wàna. Nahema i Yoràmu, “Paràhangu haàtu panjuri la njara palua pa-kanuturu-ya jàka angu-ndaha jàka ndia hi muhu biaha,” wàna.

¹⁸Wàngu kaliti-na njara, lua toma-nanyaka i Yehu paraïna panjuri hi napanii, “Na-mbuhangu papinya na hanganji, na maimu nàhu jàka beri angu-dunanggau umbu,” wàna. “Nuna nda ngeramu nyumu-aya!” wàna ba nahema i Yehu. “Màla pambulu dàngga nyungga,” wànanya. Patàkangu-nanyaka kareuku na madai la lewatu ba mbàda tàka-naka la juru tau na panjuri, tàka nda nabeli-a.

¹⁹Hàla, hi paràhangu hili haàtu panjuri. Tuna numbu ba na-paàra-nya i Yehu, dàngu nahili hema i Yehu, “Nuna nda ngeramu nyumu-aya! Màla pambulu dàngga nyungga!” wànanya.

²⁰Nahili patàkangu kareuku na madai la lewatu ba mbàda tàka-naka la juru tau na papalewa, tàka nda nabeli-a. Hàla, hi napanii, “Talanga wanguna jiaya i Yehu na ngorada nida da ma-pajurungu, nadu ba na-kaliti-ya na kareta pabera-na hama tuna tau ma-katoba-ya,” wàna.

²¹“Hawanjiru-ya na kareta-nggu,” wàna ba na-wuangu pareta i Hanganji Yoràmu. Ka hawanjiru-danyaka na kareta, hi nalaku dàngu i Hanganji Ahahia palua patàbuku-ya i Yehu, maràngga la kareta wiki-madaha haàtu - haàtu. Da-hàmburu-ya i Yehu la woka manguna i Nambutu àmangu.

²²“Bau mai nàhu jia ba angu-dunda?” wàna i Yoràmu ba na-paàra-nya i Yehu. “Nggiki hama angu bianda,” wàna ba nahema i Yehu, “jàka ni manjapa da ma-kawanangu kabeli mata dàngu jàka pawunda-mayapa lai yiahu na ngera lumungu marapu pawunga-na i Ihembilu na inamu?” wàna.

²³“Katadaku-danya yiada ou Ahahia!” wàna ba nawara i Yoràmu dàngu punjilu-nanya na kareta-na hi napalai pamara wikina.

²⁴Pandàngi-nanyaka na tandai panana i Yehu ba nawàngu papuli ndàbanya na àtalu-na hi napana-ya i Yoràmu la kajia panda tomana, nalumbu làpahu la puhuna. Hanggubalu-nanyaka i Yoràmu, hi nameti la kareta-na.

²⁵Hi napanii i Yehu lai Mbitukàru na ma-karaha-ya, “Unamu-duyapa ba ta-kaliti njara pandàki-ya i Ahàpu na amana i Yoràmu? Ba mbàda panii-naka i MIRI lai Ahàpu, ‘Kupi-manya jàka nggamu ma-pameti-ya i Nambutu dàngu da anana kangeu. Dàngu ku-paràndingu pahuku-nggau nyumu napa la woka yiana-mbu,’ ” ba wànanya. “Jia ba tuna,” napanii pangalangu i Yehu la ma-karaha-ya, “Kawuka-nya na metina i Yoràmu la wokana i Nambutu, ka na-hàrangu na hukungu-na i Ala lai nyuna,” wàna.

²⁷Naita-ya nu na manjadi i Ahahia, hi napalai-nya na kareta-na hanggangu la paraingu Mbetu-Hanggangu. Nayaulu-ya paraïna i Yehu dàngu wara-nanja da tauna, “Pameti-mbuya nyuna!” wàna. Hi dapana-ya nyuna dàngu da-pamanua-ya la ànda na ma-hanggangu la Ngguru lihina na paraingu Yimbiliamu. Na nyuna na-ngalangu papalai pamara wikina lundu la Manggindu, hi nameti ningu lai nu.

²⁸Dapiti-ya na metina paraï da panggawi-na hi dangàndi beli wànya kareta la Yeruhali, hi taninya la reti hanganji la paraingu-na i Ndautu.

²⁹Ba nanjadi hanganji Yahunda i Ahahia, mbàda hakambulu hau ndaungu-naka mandaina ba na-pareta la Ihirailu i Hanganji Yoràmu anana i Ahàpu.

³⁰Tàka-nanyaka i Yehu la Yihireyilu. Ba narongu-yaka nu na manjadi i Ihembilu, hai pahàmu-nanyaka na lunggina dàngu hi naperi-nya muru pa-mariri wàda da matana, hi nangadu hu waa welingu la katonga uma hanganji.

³¹Ba natama ninguka la pindu bokulu i Yehu, wara-nanyaka i Ihembilu, “Ha Himuri,[12] mini pameti tau! Nggàra maimu yiahu?” wànanya.

³²Na-tangara la katonga i Yehu, hi napanii, “Nggamu maangu-ngga nyungga?” wàna. Ba darongu-ya nuna, da tau madua matailu panggawi uma hanganji dangadu hu waa welingu la katonga.

³³Napanii-nja nyuda i Yehu, “Kawuka-nya nyuna hu waa!” wànanja. Ka kawuka-danyaka i Ihembilu hu waa hi na-kapidihu-ya kareta hi lupa na-tapijiru na riana la kangeli dàngu la njarada da kareta.

³⁴Hi natama pangangu la uma hanganji i Yehu. Tunaka nu hi napanii, “Pa-ràtungu-ya nuna na kawini. Jiapa-kai ba tuna tani bianya duna na metina maa ba ana hanganji-ya,” wàna.

³⁵Na nyuna ba dalua-ka da tau papiti-ya na metina, jiaya na kaba katiku-anaka, da rii lima dàngu da rii wihi-anaka da patoma-da.

³⁶Ba da-patàka-nyaka nuna lai Yehu, panii-nanyaka, “Yiana-duyaka na manjadi nunjuya na paniina i MIRI la ngaruna i Elia na atana, ‘Nangaanya ahu napa na metina i Ihembilu la ngabana la Yihireyilu,

³⁷napa da-taneparu hama tai bandaha da kananda metina hi nda haàtu-a matanda-ya ba wàna,’ ” wàna.