Read Kambera 1 LII NDAI 10 Bible Online

1 LII NDAI 10 - Kambera bible

1 LII NDAI 10

¹La rehi nu pabera-nanya na tau Pilitingu dàngu na tau Ihirailu la Palindi Nggilimbua. Dangu tau Ihirailu mameti lai nu, hawiangu dapalai, jia-mbuya na Hanganji Haulu dàngu da anana.

²Ba tuna ndutu-madanya paraï tau Pilitingu, nu ka pameti-danjaka da anana i Haulu i Yunatàngu, i Ambinandapu dàngu i Màlikihua.

³Mahawiru ailulu-ya na pa-kangaburungu-da la weli winggiru-na i Haulu, ka nggàna-nanyaka pana muhu, hi lupa na-mandàkangu na manua-na.

⁴Hàla i Haulu hi napanii-nya na bidi mini na mangàndi-ha da madàka-na, “Butuhu-ya na hapanda-mu! Tanjuka! Napa datoma-du pa-pajulu wàngga da tau Pilitingu da manda tandaya i MIRI,” wànanya. Tàka nuna na bidi mini nda natoru mbeni-a patanju-nya i Haulu nadu ba lalu mbana mangàdatu-ya. Jia-duyaka i Haulu hi napiti-ya na hapanda wikina, hi na-panjoru wikina la hapanda-na.

⁵Nuna na bidi mini ba naita-yaka i Haulu ba njàpu-nanyaka, ka panjoru-mbuna-nyaka wikina la hapanda-na, hi nameti.

⁶Ka meti-nanyaka i Haulu lupa da anana ba dadua haàtu, nu ka njàpu wàngu-nanyaka na pa-hanganji wàna.

⁷Ba darongu-ka da tau Ihirailu da ma-ngiangu la lolangu Yihireyilu, ba dapalai-ka da tanatara Ihirailu, dàngu ba mbàda meti-daka i Haulu dàngu da anana, palai dunjaku-madua-danjaka da paraingu-da. Ka mai-madua-danyaka da tau Pilitingu hi da-mandapu-nja nuda da paraingu.

⁸La haromu-na ba damaika da tau Pilitingu paramba-nja da maninja la mameti - mametika, ka hunggu-danyaka na metina i Haulu dàngu da anana ba dua haàtu-da da matawàlahu la palindi Nggilimbua.

⁹Kalàba-danyaka na kalembi pabera-na i Haulu, tàka hi da-katiku-ya, hi dalaku ngàndiya. Tunaka nu paràhangu-danyaka papalewa la nggubulu tana Pilitingu pa-patàka-nya nuna na lii nggaüru eti la banjaru-da dàngu la marapu-da.

¹⁰Na kalembi pabera-na i Haulu da-bànjalu-ya la hau uma marapu-da, tàka na katiku-na hi da-tiwalu-nya la umana i Ndanggungu, na marapu-da.

¹¹Ba narongu-ka na tau na mangia-nya la Yambihu la Nggiliatu jàka nggi - nggiki-danya i Haulu paraï tau Pilitingu,

¹²da tau da marihi kaborangu la ho-ngada nyuda lua-danyaka papiti-ya na metina i Haulu dàngu da anana. Dangàndi-ya la Yambihu hi datani-nya la lumbu pingi ai bokulu. Hàla puaha-danyaka pihu mbua lodu.

¹³I Haulu nameti nadu ba nda na-tuturu lai MIRI, dàngu nda na-karadaku la pareta-na Nyuna. Nda nakarai-ya na panaungu welingu lai MIRI, tàka nakarai ningu la ndewa tau meti. Jia-duyaka i MIRI hi nahuku-nya hi nawua-ya na kanjàka pareta-na lai Ndautu anana i Ihai.