Read Kambera 1 LII NDAI 11 Bible Online

1 LII NDAI 11 - Kambera bible

1 LII NDAI 11

¹Mbuu ndàbana na liku uru banjaru Ihirailu mai-danyaka lai Ndautu la Hemburungu, hi dapanii, “Nyuma yia hapajia ndàba-mata Tamu Umbu.

²Piti weli àmangu, dàngu ba na-pareta-kamapa i Haulu, nyumu-maka Tamu Umbu mairu ngàndiya na tanatara Ihirailu la nimbihu ndàharungu-da pa-pabera. Hinggilunai nu i MIRI mbàda ràndi-mana-nggauka ba nyumuka ma-kapipi-ya na banjaru-na dàngu ma-hanganji-nja nyuda,” wàda.

³Ka pa-ràndingu-nanyaka i Ndautu dàngu nuda da liku uru Ihirailu. Hàla katua-danyaka la pa-hanganji-nya na Ihirailu, hama tuna na pambàda ràndina i MIRI la ngaruna i Hamuilu.

⁴Handàka i Hanganji Ndautu dàngu mbuu ndàbana na tanatara Ihirailu dalua pa-kangaburu-ya na paraingu Yeruhali. La rehi nu na tamuna nuna na paraingu Yembuhu-ya dàngu tau Yembuhu mangia-nya, nu na tau memangu lai nu.

⁵Mbàda panii-daka da tau Yembuhu lai Ndautu, ba nda peku tama-ananya na paraingu-da. Tàka nyuna i Ndautu hi nawàhi-maaya na tindingu-da, na ma-tamungu Hiungu. Mbàda pakada-nanyaka la rehi nu i Ndautu la tau pairu ngàndina, na tau na ma-kawunga pameti haàtu tau Yembuhu napa nanjadi-ya ngora pabera. Tàka ba i Yuàpu-maka na ma-kawunga kaluluku-nya na tau Yembuhu, nyunaka na pawotu panjadi ngora pabera. (Na inana i Yuàpu Haruya-ya na tamuna.) Ba nawàhi-yaka na tindingu Hiungu, ngiangu-nanyaka lai nu i Ndautu. Tuna nu-duka, “Paraingu-na i Ndautu,” hi kiri wàda-nya piti welingu la rehi nu nuna na tindingu.

⁸Na hili pahada belinya nuna na paraingu i Ndautu na-pakiri welinya la pangia pa-pajangga wàngu tana la pahunga loduna na tunduna; hàlaka nu i Yuàpu-ka duna na ma-palundu-nya.

⁹Paru - rukangu-nanyaka pa-kapingatu i Ndautu, nadu ba i MIRI Mahupu-mbiha na mandula-ya nyuna.

¹⁰Yiada-haka da tamuda da parawira-na i Ndautu da mawuwa tamuda. Pa-kariangu dàngu mbuu ndàbana na rayatu Ihirailu, mbàda pa-tarangu-daka ka nanjadi hanganji i Ndautu hama tuna na paràndi-na i MIRI. Tàka nyuda bohuru pangala-madanya na pareta-na.

¹¹Na parawira na ma-wungangu jiaya i Yahombàmu welingu la kalibaru Hàkumoni, nyuna na liku uruda da “Parawira Pa-katailungu”.[21] Handàka ba talànga pa-kangabaru ba nalawa-nja da tau tailu ngahu, na-pameti mbuta-ma-aha, ba nawàngu nimbu.

¹²Na tau na padua wàda nu la Parawira Pa-katailungu jiaya i Eliahàru anana i Ndondu welingu la kalibaru Ahohi.

¹³Ba pa-kangaburu la Pàha-Ndamimu, nyuna na-patarangu la ngabana i Ndautu ba dalawa-nya na tau Pilitingu. Ba da-patikingu-ka papalai da tanatara Ihirailu, nyuna dàngu da tauna pa-jàrungu-danyaka la hau woka uhu nggàndumu hi da-pakangaburu dàngu tau Pilitingu. Nu i MIRI nawua-nja rihi talu nyuda.

¹⁵La hau na lodu da tau matailu welingu la 30 parawira-na i Ndautu da ma-pangora, dalua tomaya Ndautu la hau pangia maningu tindingu-na la hau palindi watu la lihi Liangu Andulàmu. La rehi nu pa-maüngu-danya da tau Pilitingu la Lolangu Repayimu, tàka na hapamba welingu lai nyuda da-mandapu-nyaka la Mbetulehimu.

¹⁷I Ndautu lalu rinju-nanya na paraingu na talora-na, hi napanii, “Hai a-ai, làti ka ningu-aka ma-paunu-ngga wai welingu la humuru la lihi pindu bokulu la Mbetulehimu,” wàna.

¹⁸Darongu-yaka nuna paraï da tau madua haàtu da parawira nuda, tòluhu-madua-danjaka na kotaku maü terada da tau Pilitingu hi dataku wai welingu la humuru nuna, hàlaka nu hi dangàndi-nya i Ndautu. Tàka nyuna i Ndautu nda nabihu paunu-nya, ba tuna buri-ma-ananya ba na-maraku wànya i MIRI.

¹⁹Hi napanii, “Paronguna i Ala, nda jia unu-anggunya na wai yiana! Jàka kuunu-nya beringu unu-nggunja da wai riada yiada da tau da mambàda pa-jàmangu lurida!” wàna. Jia-duyaka hi nda ana bihuna nyuna i Ndautu paunu-nya nuna na wai. Nunaya na paruku-da da tau matailu mini pa-tarangu ma-kaborangu nuda.

²⁰Da parawira da matailu kambulu-da nuda, “Parawira Pa-katailu kambulungu” wàda-mbunja ba da-patamu-nja. I Ambihai erina Yuàpu jiaya na maliku urunja nyuda. Mbàda pameti-naka tau 300 wàngu nimbuna, tuna nuduka hi nawuwa wàngu na tamuna. Tàka nda nahama pàkunja da Parawira Pa-katailungu.

²²Na hili haàtu parawira na mawuwa tamuna jiaya i Mbanaya anana i Yuyanda, tau Kàpuheyilu. Nyuna mambana kaborangu-ya. Tau madua-ha da ma-kanjupu kaborangu welingu la Muapu da pambàda pameti-na. Handàka la hau lodu ura kamba natama la kubu liangu hi na-pameti-ya na heu na hinga lai nu.

²³Handàka na-pameti-ya na haàtu na tau Mehiru na ma-bàkulu papingi; na janggana dua metiru rihina, na madàka-na bai nimbu bokulu-ya. I Mbanaya nahangga wànya kadipu ai-a. Na nimbu na maninya la limana nuna na tau Mehiru, nawàhi-ma-aya hi na-pameti wànya na tau nuna.

²⁴Nuda-haka da ruku kaborangu-na i Mbanaya, anguda da Parawira Pa-katailu kambulungu.

²⁵Nyuna-maka na mangia ngora i Mbanaya la anguna, tàka nda nahama pàkunja da Parawira Pa-katailungu. I Ndautu nawotu-ya nyuna liku-uruda da tau mamangga-nya nyuna.

²⁶Da ma-pandàkingu yiada, jia-haka da parawira hawiangu da mawuwa tamuda: I Ahaïlu erina i Yuàpu I Elihanàngu anana i Ndondu tau Mbetulehimu I Hàmutu tau Harutu I Helihu tau Paloni I Ira anana i Ikihu tau Takua I Ambiyehiru tau Anatutu I Hipukai tau Huha I Ilai tau Ahohi I Maharai tau Netopa I Helitu anana i Mbaana tau Netopa I Itaï anana i Rimbai tau Nggimbia la ngaba kabihu Mbanyamingu I Mbanaya tau Piratungu I Hurai tau welingu la lola - lolangu Nggaàhu I Ambialu tau Aramba I Àhamawitu tau Mbahurimu I Aliyàmbàhu tau Halambungu I Hahimu tau Nggihungu I Yunatàngu anana i Hanggi tau Harari I Ahiamu anana i Hakàru tau Harari I Elipàlu anana i Uru I Hepiru tau Mekirati I Ahia tau Paloni I Hehirai tau Kàramilu I Naarai anana i Ehimbai I Yoilu angu dedina i Natàngu I Mipuhàru anana i Hàkari I Heliku tau Amungu I Naha(...)