Read Kambera 1 LII NDAI 13 Bible Online

1 LII NDAI 13 - Kambera bible

1 LII NDAI 13

¹Na Hanganji Ndautu nabata dànja da parawira-na da mairu ngàndiya na pamba - pamba tau 1.000 dàngu na pamba - pamba tau hangahu.

²Hàla panii hàla-nanjaka da tau nuda: “Angu dedi, jàka mi-orangu-du dàngu napeku jàka wàna i MIRI, na Alanda, nahàmu ka ta-palewa-nja tau da ngara ratu dàngu na tau Lewi la ndeha - ndehada, hamanai nggubulu-na na banjaru-nda hawiangu ka damai hàla lai yiahu pa-pauhi dànda.

³Tunaka nu ka talua papiti-ya na Pàti Pa-ràndingu-na i Ala, ba jiapa biapa ba lànjanya kandai pareta-na na Hanganji Haulu,” wàna.

⁴Nahàmu na etina mbuu ndàbana na tau Ihirailu na ma-pauhi lai nu ba darongu-ya na pa-nojarungu dàngu da-patunju-maya.

⁵Tàka i Ndautu hi na-pauhi-nya na rayatu Ihirailu la nggubulu tana nuna, piti welingu la padira Mehiru la mbara luru lupa la ànda la Hamàtu la mbara dia, la papiti-ya na Pàti Pa-ràndingu welingu la Kiriyàtu-Yiaarimu ka ngàndiya la Yeruhali.

⁶Hàla nyuna i Ndautu lua karia-nanjaka la paraingu Mbaala, nu la Kiriyàtu-Yiaarimu, la ngaba Yahunda la papiti-ya na Pàti Pa-ràndingu-na i Ala. Na pàti nuna patungu tamuya “I MIRI na ma-mandapu la pinu patau awangu”, wàna.

⁷Ba natàka-ka la Mbaala, paluhu-danyaka nuna na Pàti Pa-ràndingu welingu la umana i Ambinandapu, hi dawotu-nya la pinu kareta bidi. I Uha dàngu i Ahiu da mandutu-ya na kareta,

⁸tàka nyuna i Ndautu dàngu mbuu ndàbana na banjaru Ihirailu dalaku renja dàngu ludu hawola-da la pa-maraku-nya i Ala pa-kariangu jungga, lamba ha-kapapa dàngu kahàba[23] dàngu taropitu.

⁹Ba datàka-ka la ngia pa-parina-na uhu nggàndumu-na i Kindungu tunjuru-danyaka da hapi da mairu-ya na kareta, tàka i Uha hi na-pajolangu limana ka pàtuya na Pàti Pa-ràndingu ka àmbu na-kanabu ba wàna.

¹⁰La rehi numa ba nahàngga-nya i Uha i MIRI rukuna nuna na pawunda-na ba wàngu pa-pawawa-nanya i MIRI. Hàla hi na-pameti-ya i Uha lai nu. Piti welingu la rehi nuduka hi da-patamu-nya “Perihu-Uha”[24] lai nu. Na-hoputu wànya i Ndautu ba na-patàlaru-ya i Uha paraïna i MIRI.

¹²Ba tuna i Ndautu na-mangàdatu-manyai duna i Ala hi napanii, “Nggiki hama ngàndi-nggunyaka nàhu na Pàti Pa-ràndingu?” wàna.

¹³Tuna nuduka hi kiri nda njadina pangàndi-ya na Pàti Pa-ràndingu la Yeruhali paraïna i Ndautu, tàka hi na-bànjalu-ya la umana i Ombitu-Endumu tau Nggàta.

¹⁴Tailu mbua wulana ba engana na Pàti lai nu, tàka i MIRI na-pakanyuru-ya na kuru umana i Ombitu-Endumu hamanai mbuu ndàbada da mangu-naka.