Read Kambera 1 LII NDAI 14 Bible Online

1 LII NDAI 14 - Kambera bible

1 LII NDAI 14

¹Na Hanganji Hiràmu welingu la tana Tiruhu na-paràhangu papalewa-na lai Ndautu dàngu da tukangu watu, da tukangu ai, hamanai ai kajuu Limbanongu la pa-pahada-nya na uma hanganji.

²Jia-duyaka hi napàda-nya la etina i Ndautu ba pamàndu-nanyaka nyuna paraïna i MIRI ba hanganji Ihirailu-ya dàngu ba pa-kapingatu-nanyaka na pa-hanganji-na lumuna na pahàmu wàna na banjaru-na i MIRI.

³La Yeruhali i Ndautu nahili pitimai papaha-na ba tau mapira-ha, dàngu ngalangu-mana-nyaipa anana.

⁴Da anana mini da madedi la Yeruhali jiaha: i Hamua, i Hombàpu, i Natàngu, i Halomu,

⁵i Yipuhàru, i Elihua, i Elupelitu,

⁶i Nongga, i Nepiku, i Yapia,

⁷i Elihama, i Mbaeliyanda[25] dàngu i Elipahelitu.

⁸Ba jia-yaka na ronguna na tau Pilitingu ba nyunaka i Ndautu na pawotu la pa-hanganji-nya na nggubulu tana Ihirailu, patikingu-danyaka palua payàpa-ya. Tuna nuduka hi kiri luhuna i Ndautu palua pabera-ha nyuda.

⁹Nu ba tuna tàka-danyaka da tau Pilitingu la Lolangu Repayimu hi daramba-nya nuna na lolangu.

¹⁰Ba narongu-ya nuna ka paàrangu-nanyaka i Ndautu lai Ala, “Dou MIRI, kulua-maka bàdi pa-nàhaku-ha da tau Pilitingu? Màla nu MIRI muwua-ngga patalu wàngu?” wàna. Nahema i MIRI, “Wua, nàhaku-ha nyuna! Napa kuwua-manggau duku patalu wàngu!” wànanya.

¹¹Ka hadangu tungu-madua-nanyaka i Ndautu dàngu da pambana la tau Pilitingu la Mbaàlu-Parahimu[26] hi na pakàku-ha. Ka panii-nanyaka i Ndautu, “I Ala patanggu-nanggaka la pa-pòluhu-ya na ngia pa-pajàrungu-na na muhu hama tuna na iwa na ma-puluru-ya mbutana la dalu ha-kambàdiku,” wàna. Jia-duyaka na pa-ngiangu nuna la Mbaàlu-Parahimu hi wàdanya.

¹²Na pamba Pilitingu palai-nanyaka hi lupa nda peku-mbunapa la pangàndi-ha da kahala hada marapu-da. Hàla paràhangu-nanyaka i Ndautu la patunu-ha nuda da kahala hada marapu.

¹³Ndedi nggi tuna mandaina hili beli-madua-nanyai na tau Pilitingu pahili rambanya na Lolangu Repayimu.

¹⁴Hili karai-nanyai i Ndautu lai Ala papanau-nya, nahema i Ala, “Màtangu àmbu nàhaku weli yiahu-dunja, tàka màta kau pa-winggirungu lai nàhu, kau mangu pa-nàhaku-nja la lihida da pingi ai murumbai.

¹⁵Jàka murongu malingu hama tuna kandunduku wihi tau ma-pajurungu la kapuka ai, ndàharangu-wa, ba Nyungga-maka malaku mangilu-nggau la pa-pakàku-ya na tanatara Pilitingu,” wàna.

¹⁶Nawa-manya duna i Ndautu hama tuna na lii pareta-na i Ala lai nyuna. Nyuna dàngu da pambana da-làndahu pa-kanduli-ma-anya na tanatara Pilitingu welingu la Nggimbiungu lundu tàka la Nggehiru.

¹⁷Ka hunga-nanyaka na tamuna i Ndautu la nggi - nggi, tàka i MIRI na-pawiti-nya mbuu ndàbana na banjaru dangu pa-mangàdatu-nya i Ndautu.