Read Kambera 1 LII NDAI 16 Bible Online

1 LII NDAI 16 - Kambera bible

1 LII NDAI 16

¹Nuna na Pàti Pa-ràndingu da-bànjalu-ya daa la maü na pambàda payema-na i Ndautu. Hàla hi dawotu-nya maraku i Ala, kameti maraku patunu dàngu kameti maraku papeku.

²Ba nahàla-ka i Ndautu pawotu-ha da kameti maraku na-pakanyuru-nya na rayatu la tamuna i MIRI,

³hàla hi napabe - berinja pangangu nyuda mbuu ndàbada. Nimbihu-na na tauka na maninya lai nu ka miniya ka kawini-yakai na-ngalangu ha-kadipu tolu pa-handarangu, roti dàngu kanguta kimihu.

⁴Tau mapi - piraha da tau Lewi nawotu-ha paraïna i Ndautu ka ma-pairungu-ha la pa-paloku-ya na lii lumungu lai MIRI, Ala Ihirailu, la hangga Pàti Pa-ràndingu, wàngu ludu dàngu wotu hailangu.

⁵I Ahawàpu papindi-ya panjadi karohu ma-pairungu tàka i Hakaria jia-yaka na wakilu-na. I Yeyilu, i Hemiramutu, i Yahialu, i Matiha, i Eliapu, i Mbanaya, i Ombitu-Endumu dàngu i Yeyilu nyudaka da matanggu jungga, i Ahawàpu jiaya na matanggu patoka-nja da kahàba,

⁶dàngu da tau madua da ratu, nu i Mbanaya dàngu i Yahahialu, jiaha da ma-padaingu papini-ha da taropitu la hangga Pàti Pa-ràndingu.

⁷Nu jia-duyaka na kawunga pa-kiringu na i Ndautu ba na-patanggu-nya i Ahawàpu dàngu da anguna la pawunda-nya ludu wotungu i MIRI.

⁸Pamalangu-nyawa i MIRI, dàngu bobaru-ya na bokulu-na, pekaha da pawunda-na la hongada da banjaru-ka.

⁹Ludu-nyawa wotu hailangu i MIRI, bobaru-ha mbuu ndàba da paruku-na da pa-hangàtarungu.

¹⁰Jiaya Nyunama na MIRI Mahupu Kamehangu; hanggela hawola-wa, ba jiata nyuta-maka manguna; mbuu ndàbana na ma-marubuku-nya màtawa ka da-hawola.

¹¹Karaiwa àtalu kapàru welingu lai Nyuna, maraku pa-nutaku-nya Nyuna dàngu nda kambotahu-na.

¹²Ha dimi wàlana i Yakupu, atana-ka i Ala! Ha dimi wàla wua i Ihirailu, banjaru papindi-na! Ngàdaha mbuu ndàbada da pa-hangàtarungu da pa-patumbu-na, àmbu maromba-nja da botangu-na.

¹⁴I MIRI jiaya na Alanda, na botangu-na pawàngu ndàbaya la nggubulu pinu tana.

¹⁵Na namu mànu-maya duna na pa-ràndingu-na, na njanjina na-padaingu lundu nu - nu.

¹⁶Nuna na pa-ràndingu natura-ya dàngu i Ambarahàmu, hàla hi mangupa dàngu i Ihàku,

¹⁷hàla hi na-pamàndu-nya dàngu i Yakupu, ba pa-ràndingu lundu nu - nuya nduma banjaru Ihirailu.

¹⁸Napanii Nyuna, “Napa kuwua-nggaunya na tana Kanaàngu ka mangu kangeha-munya,” wàna.

¹⁹Àmangu na banjaru-na i MIRI da-paluri tau tàkangu lai nu, na danguda nyuda hakudu-ma-ada.

²⁰Da-njadangu welingu la hau banjaru lupa la hili hau banjaru, da-lelingu welingu la hau pangia la hili hau pangia.

²¹Na nyuna i MIRI nda namàta-anya nggamu biaya na ma-kapidihu-ha nyuda, lumuda nyuda, namara panamu-nja da hanganji,

²²“Àmbu ngguma-dunja da tau papindi-nggu, àmbu wundanja ma-akatu da wunangu-nggu,” wàna.

²³Wundanya ludu i MIRI, ha dumu pinu tana nggubulu-mu, nimbihu lodu pa-kadangu-wa lii langu mbaha eti.

²⁴Pekaya na bokulu-na la ba - banjaru-ka, dàngu da pawunda-na ruku kaborangu-na la banjaru tau pinu tana.

²⁵Nadu ba ma-bokulu-ya i MIRI dàngu ba kanjupu pa-wotungu-ya; parihi mangàdatungu-ya bàdi welingu ngara marapu-ka.

²⁶Da pa-marapu-da da banjaru hawiangu kahala hada marapu-ma-aha, tàka i MIRI duna jiaya na ma-padikangu kuru awangu.

²⁷Na-lumburu-nya pa-bokulu wàngu dàngu mangarangu, na umana nambinu wàngu kuaha dàngu mangarangu.

²⁸Wotunya i MIRI ha banjaru tau pinu tana! Wotunya na mangunju-na dàngu na kodi màkana.

²⁹Wotunya na tamuna na ma-mangarangu, ngàndiwa kameti maraku daa la umana. Lumu-nyawa i MIRI ba dàngu pakimi paki lumungu!

³⁰Ta - tàta-miwa la hanggana ha pinu tana nggubulu-na! Na pinu tana na kapànduku nda pa-ngalangu-a pakoda-nya.

³¹Ha awangu dàngu tana, hanggela hawola-wa! Pakada-nya la ba - banjaru-ka ba Hanganji-ya i MIRI!

³²Kanduu-wa ha tehiku dàngu mbuu ndàba ihi-naka. Hanggela hawola-wa ha dimi maràda dàngu ngara matumbu-nggaika.

³³Da pingi ai la omangu napa dawara da-kayaka, ba nàmu-dunyaka i MIRI la pa-pareta la pinu tana.

³⁴Pa-malangu-nyawa i MIRI ruku hàmuna; na pa-namungu-na lundu nu - nuya nda ningu dirana.

³⁵Tunguwa lii, “Dou Ala, Ma-pamàna-nggama nyuma, pamàna-nggamawa welingu la kuaha ba - banjaru-ka dàngu pauhi beli-nggamawa ka peku wundama lii malangu dàngu la pawotu-nya na tamu nggi matua-mu!” ka wàmi.

³⁶Wotu-nyawa i MIRI, na Ala Ihirailu! Nàhu dàngu lundu nu - nu! Hàlaka nu nggubulu-na na banjaru Ihirailu dapanii, “Amingu,” wàda, hi dawotu-nya i MIRI.

³⁷Tunaka nu i Hanganji Ndautu na-patanggu-nya i Ahawàpu dàngu da tau Lewi hawiangu ka da-padaingu la pa-paloku hàlaya na ma-panuangu la ngera lumungu la maü ngia pa-pahàmu-ya na Pàti Pa-ràndingu-na i MIRI. Nimbihu loduma bàdi ba da-paloku lai nu,

³⁸na-pambapa dànja paraïna i Ombitu-Endumu anana i Yendutungu, hamanai da tau 68 hawiangu na angu kalibaru-na. I Ombitu-Endumu dàngu i Hoha jiaha da mamangga-nja da pindu bokulu.

³⁹Tàka i Handuku dàngu da ratu hawiangu na-patanggu-nja la pa-paloku-ya na lumungu la ngia pa-lumungu la Nggimbiungu.

⁴⁰Hau mbaru hau malingu lupangu dawotu kameti maraku patunu la ngia pawotu maraku pajàngapu-nja da uku da pambàda wuana i MIRI la tau Ihirailu.

⁴¹Na Ratu Handuku dàngu nuda da ratu - ratu da-pambapa-dànja paraï da i Hemàngu dàngu i Yendutungu, hamanai da tau hawiangu da papindi pa-mehangu la pawunda ludu wotungu lai MIRI ruku pa-namungu-na lundu nu - nu nda ningu dirana.

⁴²I Hemàngu dàngu i Yendutungu pa-patanggu-mbunja la pa-paloku-ha da taropitu, da kahàba dàngu da malingu hawiangu da mandutu-ha da ludu wotungu. Da anguda hawiangu da angu kalibaru-na i Yendutungu, nyudaka da matanggu daiha da pindu bokulu.

⁴³Tunaka nu beli ndàba-nanyaka na tau la umana haàtu - haàtu. Nyunambu i Ndautu beli-nanyaka pa-tadalu-ya na kuru umana.