Read Kambera 1 LII NDAI 17 Bible Online

1 LII NDAI 17 - Kambera bible

1 LII NDAI 17

¹Ba na-padaingu-ka la uma hanganji-na i Hanganji Ndautu, la hau na lodu napaau-nya i Wunangu Natàngu hi napanii dànya, “Tàngaru, nyungga yia ngiangu-nggunyaka la uma hanganji, na pawulu wàngu ai kajuu Limbanongu, tàka na Pàti Pa-ràndingu-na i MIRI la ana maü biaya!” wàna.

²Nahema i Natàngu, “Wunda biaha duna mbuu ndàbada da pawuku etimu Tamu Umbu, nadu i MIRI ba ndula-mananggau padua hi Tamu Umbu,” wànanya.

³Tàka nu la rudungu i Ala napanii-nya i Natàngu,

⁴“Luawa dàngu kau patàka-nya na pulunggu yiana lai Ndautu atanggu, ‘Nda nyumu-a napa ma-pahadangu uma ndumanggu Nyungga.

⁵Piti welingu ba ku-pahàla-ya na banjaru Ihirailu welingu la Mehiru lundu nàhu, ndedi ku-handàkangu-ma duku pa-ngiangu la hau uma. Jiama-aya la pa-njadangu dàngu la pa-ngiangu la hau maü.

⁶Ba talànga njada karia-nggunya na banjaru Ihirailu, ndedi ku-handàkangu-ma duku pa-paàra-nja da ma-pangora - pangora da pambàda pindinggu, nggikina hi nda dawulu-ngga Nyungga hau uma ai kajuu Limbanongu,’.

⁷Jia-duya nu, Natàngu, pekanya na atanggu i Ndautu, Nyungga, MIRI Mahupu mbiha, kupanii-nya, ‘Mbàda pitinggunggauka nyumu welingu la paràma-mu bau pawangu mbimbi la maràda, hi kutukau hanganji la banjaru-nggu na Ihirailu.

⁸Mbàda ndula-nggunggauka jiapa nda nggikau mulaku ningu, dàngu mbuu ndàbada da muhumu ku-pambuta-ha ba talànga pa-kangaburungu-mu. Napa ku-pawiti-nggau hi nawuwa na tamumu, hama tuna da ma-pangora da ma-bokulu halawàla la pinu tana.

⁹Nduma na banjaru-nggu na Ihirailu mbàda payema-nggunjaka pangiada hi ningu tana paraida luku mananga-da, hi peku luri mànjaku-da ba nda hili ningupa mangguma-nja. Kandai tàkada àmangu la tana yiana, dàngu ba ndeni ningu hanganji-da, na-kaporuku-nja tau na ma-mbuhangu pa-pajanggilu. Na nyuna na matuna nu nda nahili tumbu-apa. Ku-paràndingu la pa-pakàku ndàbaha da muhumu, dàngu napa kuwua-nggau wàla wuamu.

¹¹Napa, jàka natoma-ka na kawuku lurimu hi taninggau la retida da boku la mangilu-mu, napa na haàtu na anamu kuwotu-ya la pa-hanganji. Nyuna duna napa na mawulu-ngga uma ndumanggu. Tàka na pa-hanganji wàna napa ku-pamàndu-nya, dàngu nduma lundu nu - nu na haàtu welingu la wàlana napa na-pareta ba hanganji-ya.

¹³Napa Nyungga Ama-nangga tàka nyuna ana-nggunya. Pa-daingu wunda-nggunya mahàmu nyuna napa, nunjuya na njanjinggu. Na panjanji-nggunya pa-daingu kata undu-manggunya, nda hama tuna na pawunda-nggu lai Haulu na pa-panggihiru-nggu welingu la ngia pa-mandapu-na ka peku njadimu hanganji nyumu.

¹⁴Na anamu na papindi-nggu napa ku-panjadi-ya hanganji la banjaru-nggu dàngu la pa-hanganji-nggu nduma lundu nu - nu, dàngu da ana umbuku-na handalaru handàdiku napa da-katangu pareta ba hanganji-ha,’ ” wàna.

¹⁵I Natàngu na-patàka-nya i Ndautu mbuu ndàbana na pambàda pabowa-nanya paraïna i Ala.

¹⁶Ka tama-nanyaka i Ndautu la Maüna i MIRI. Na-mandapu hi na-hamayangu, “Dou MIRI Ala, nyungga dàngu kuru umanggu nda ràka-ana duma la pangala hàlanya na hàmumu na pa-paloha-mungga lundu nàhu.

¹⁷Jiapa narihi-mbuipa welingu lai nu na pawunda-mu; mbàda tura-muka pa-njanjingu na ngerada da wàla wuanggu la rehi na manàmu-nya. Jiapa mu-paloku-kikaipa la pangera-nya la pa-bokulu.[29]

¹⁸Hili nggàra-yaipa na papanii-nggunggau dou MIRI Ala? Mupi ndàbanya na ngeranggu nyungga yia atamu, ba tuna Nyumu MIRI mawua-ngga patembi wàmungga, nyungga yia atamu.

¹⁹Wàngu eti wiki-mamu dàngu nduma pahàmu wànggu nyunggama hiu wunda paloha-nya mbuu ndàbada da pawunda da ma-bokulu.

²⁰Didi mehakau Nyumua na Ala, nda ningua hamamu Nyumu. Hi mapinya nuna rukuna ba mbàda panii-nggama weli ndaingu.

²¹Dàngu la nggubulu pinu tana nda ningua mahama-nya na banjaru Ihirailu. Na Ihirailu didi-ma-aya na banjaru na pa-pahàla-mu welingu la paata hi mutuya banjaru wikimu. Mbuu ndàbada da pa-patumbu-mu da ma-bokulu dàngu da pa-hangatarungu lumuda nyuda, jiaya hi nawuwa wàngu na tamumu la panggubulu awangu. Bau pahàla-ya na banjaru-mu welingu la Mehiru, dàngu hi mu-hinggalu-ha da banjaru hawiangu ba jiaya na-ndàharungu-na pa-pakabungu na banjaru-mu.

²²Na banjaru Ihirailu mutuya banjaru wikimu lundu nu - nu. Tàka Nyumu, ou MIRI, hi da-Ala-nggau.

²³Nàhu, dou MIRI Ala, orangu àru kau paundu-nya na paràndi-mu na papeka-mu na ngera wikinggu nyungga dàngu da wàla-wuanggu. Pa-langatàka àrunya hama tuna na pambàda ràndimu.

²⁴Na tamumu napa parukangu-nanyaka pa-hambungaru, hi lupa napanii mànu na tau, ‘I MIRI Mahupu mbiha Alana na tau Ihirailu-ya’ hi wàna wàngu. Nduma lundu nu - nu napa na haàtu welingu la ana umbuku-nggu na pareta ba hanganji-ya.

²⁵Ku-patoru mbeni wikinggu pawotu-nggaunya yiana na hamayangu ou Ala, ba Nyumu wiki-maka mambàda paniingga, da ana umbuku-nggu handalaru handàdiku mu-panjadi-ha hanganji napa la banjaru yiana.

²⁶Nyumu MIRI, didi-ma-akau Ala, dàngu na ma-kanjupu hàmuya muràndi-ngganyaka.

²⁷Jia ba tuna hi ku-kamahi-nggau, màla àru kau pa-kanyuru-ha da wàlanggu ka peku kangeha mànu-danya na mbuhangu-mu. Nadu, ba mbàda pa-kanyuru-munyaka na banjaru-mu, ou MIRI napa daingu-madaka duda ba da-pakanyurungu lundu nu - nu,” wàna.