Read Kambera 1 LII NDAI 18 Bible Online

1 LII NDAI 18 - Kambera bible

1 LII NDAI 18

¹Mandai - ndaikika nàhu, na Hanganji Ndautu kangaburu-nanyaka na tau Pilitingu, natalu-maha hi nawàhi-ya na paraingu Nggàtu hamanai da ana ndeha - ndeha la winggiru-na.

²I Ndautu natalu-mbuya dàngu na-panyàku-ya na tau Muapu tàka hi da-wuangu hilu katiku lai nyuna.

³Tunaka nu i Ndautu na-pakàku-ya i Handandehiru, na hanganji la Homba lihina la ngaba Hamàtu la tana Hiria. La rehi nu i Handandehiru talànga lakuna pa-kuaha-ya na tana ngaba la lihi katiku Luku Epuràtu.

⁴I Ndautu nawàhi 1.000 kareta pabera, na-tanawangu 7.000 tanatara li la njara lupa 20.000 tanatara li la wihi. Na-kandali ndàbaha da wihi njara, hinggilu-da hawiangu, tuda nduma hangahu kareta pabera.

⁵Da tau Hiria welingu la Ndamàhiku da-pangàndingu tanatara pandula-ya i Hanganji Handandehiru, tàka nanggepi pakàku-ma-aha paraïna i Ndautu hi na-pameti-ha da tau 22.000.

⁶Tunaka nu pahada-nanjaka da kotaku maü tanatara la ngabada nyuda ka nyàku-danyaka dàngu hi dawotu hilu katiku lai nyuna. I MIRI nawua mànu-manya patalu wàngu i Ndautu la nggi bia na-pabera ningu.

⁷Da temingu àmahu rara da pawàda da tau la hanggana i Handandehiru, nawàhi-ha paraïna i Ndautu hi nangàndi-ha la Yeruhali.

⁸Hinggilu-da nuda kanjupu danguha da parunggu papiti-na i Ndautu welingu Timbulàtu dàngu la Kunu, nu da paraingu pa-kuaha-na àmangu i Handandehiru. (La lodu malamiri da parunggu dangu nuda jia-duhaka da pawàna i Halomu ba na-pandoi karaba, kambaniru dàngu pa-kakahu la Umana i MIRI.)

⁹I Hanganji Tou welingu la Hamàtu narongu ba mbàda talu hàla-nanjaka paraïna Ndautu da tanatara-na i Handandehiru.

¹⁰Ka palewa-nanyaka i Yoràmu na anana la pa-patàka-nya lii pa-ohangu i Hanganji Ndautu paraï ruku taluna, ba mbàda naingu-manaka pa-pabera i Handandehiru dàngu i Tou. I Yoràmu nangàndi padangu pawotu àmahu rara, àmahu bara dàngu parunggu lai Ndautu.

¹¹Mbuu ndàbada nuda da pawotu, na-maraku-wànja i Hanganji Ndautu lai MIRI màta ka ihi wàngu ba lumungu lii palumungu, wàna. Tuna numbu da banda marara dàngu mabara, da pawàhi-na lai Handandehiru dàngu la ba - banjaru da patalu-na, nu da banjaru Endumu, Muapu, Amungu, Pilitingu dàngu Amaliku.

¹²I Ambihai (na tamuna na inana Haruya-ya) na-pakàku-ha dàngu na-pameti-ha da tau 18.000 tau Endumu la Lolangu Mbàru,

¹³hàla hi nawulu-nja maüda da tanatara-na la nggubulu Endumu. Ka nyàku-nanyaka na tau Endumu lai Hanganji Ndautu. I MIRI nawua-nya patalu wàngu i Ndautu, la nggi bia na pabera ningu.

¹⁴Tuna nuduka i Ndautu ba na-pareta la nggubulu Ihirailu dàngu ba namangga-manya ka nua naingu-na ba wànya mamola dàngu ma-padeningu ba lumunya na rayatu.

¹⁵Yiada-haka da mapawai ngaba mangia dita da pawotu-na i Ndautu: Na ngora kanguhuru pabera: i Yuàpu ayana i Ambihai. Na hakaratarihu uma hanganji: i Yuhapàtu anana i Ahilutu. Da ratu: i Handuku anana i Ahitupu dàngu i Ambimeliku anana i Àpuyataru. Na hakaratarihu nanggara: i Hauha.[30] Na liku uru karaha hanganji: i Mbanaya anana i Yuyanda. Da anana i Ndautu da-katangu waingaba ma-mbàtingu la pareta.