Read Kambera 1 LII NDAI 19 Bible Online

1 LII NDAI 19 - Kambera bible

1 LII NDAI 19

¹Pi - pirana na rehi malamiri meti-nanyaka i Nahàhu na hanganji Amungu, tàka i Hanungu na anana, nyunaka na ma-hanganji.

²Ka panii-nanyaka na Hanganji Ndautu, “I Nahàhu ariyaa hàmu-manggunya, jia màta ka ku-ariyaa-mbunya na anana,” wàna. Jia-duyaka hi na-palewa tau la tana Amungu ka pa-halembiru-ya na etina rukuna ba nameti na amana. Ba datàka-ka la Amungu,

³da ngara ma-pangora la tana nuna dapanii-nya na Hanganji Hanungu, “Àmbu kanandi-dunya Tamu Umbu ba ruku tembi-nanya na amamu hi kiri paràhangu-na papalewa i Ndautu! Na-paràha-nja yiahu nuda da tau, maidanya pa-butingu la tananda, ka peku wàhi-danya na tananda,” wàdanya.

⁴Ka yàpa-nanjaka da papalewa-na i Ndautu paraïna i Hanganji Hanungu, da-kikiru-ha da wulu njerida, da pakida da-kadipu pahupu kihunja, hàla hi da-paràha-nja palaku.

⁵Ba tuna da-makia-ka duda pabeli, hi dalaku ningu la Yeriku. Ba narongu-yaka i Ndautu nuna na madedi, pangàndi-nanjaka langu nuda da papalewa ka da-patiangu la Yeriku ka lupa datumbu beli da wulu njerida.

⁶Hàla na Hanganji Hanungu dàngu da tau Amungu da-pàdangu wikida, nuna na pawunda-da na-pawiti-nyaka namuhu-nanja paraïna i Ndautu. Jia-duyaka hi dapangàndingu 34.000 kilu àmahu bara la ngaba Mahupatamia Dita, lupa la Maaka dàngu Homba la Hiria la pahewa wàngu 32.000 kareta pabera dàngu tanatara li la njara. Ka mai-danyaka da tanatara-na na Hanganji Maaka dàngu mbuu ndàbada da kareta pabera da pahewa dàngu hi da-pamaüngu la lihina la Mandemba. Da tau Amungu-mbu nàmu-manja welingu la mbuu ndàbada da paraingu-da la pa-pabera.

⁸Narongu-yaka na rukuna nuna i Ndautu, paràha-madua-nanyaka i Yuàpu dàngu nggubulu ndàbana na kanguhuru pabera-na la pa-ndàharungu palawa-nya na muhu.

⁹Da tau Amungu daluhu hi da-wandalu-ha da pa-jurungu-da la hangga pindu bokulu paraingu Ramba, na parai puhu pareta-da, tàka da hanganji - hanganji da mambàda tàka la pa-pambapa dànya, wandalu-dahaka da pambada la maràda.

¹⁰Naita-ya paraïna i Yuàpu ba nggàpi-nanja paraï pamba muhu la hangga la kajia. Jiaduya hi napindi-ha da tanatara marihi hàmu hi pahangga-nja dàngu da tanatara Hiria.

¹¹Na rihida da tanatara Ihirailu hi na-pakata-nja lai Ambihai erina, na ma-wandalu-ha da pambada pa-hangganja da tanatara Amungu.

¹²I Yuàpu napanii-nya na erina, “Jàka hada nda ku-duluku pa-hanobaku-ya na tanatara Hiria, pa-renggangu pandula-ka. Tàka jia-mayai duku, jàka hada ndau duluku pa-hanobaku-ya na tanatara Amungu, napa kurengga-manggau duku pandula-kau.

¹³Pa-torungu-ma! Màlama ka ta-pajàrungu la pa-patara ndumana na banjaru-nda dàngu lumuda da paraingu-na na Alanda. Màla àruki i MIRI ka nawunda-ya na patikingu-na!” wàna.

¹⁴Tunaka nu i Yuàpu dàngu na pambana ndàharungu-nanyaka pa-kangaburu-ya na tanatara Hiria, ka palai-danyaka da tanatara Hiria.

¹⁵Ba daita-haka palaida da tanatara Hiria paraï da tau Amungu, ka palai-madua-danyaika duda welingu lai Ambihai hi da-kandulingu hu daa la paraingu. Hàlaka nu beli-nanyaka i Yuàpu la Yeruhali ba nahàla-ka pabera-ya na tau Amungu.

¹⁶Da-pàdangu wikida da tau Hiria ba mbàda pakàku-nahaka tau Ihirailu. Ka paau-danjaka da tanatara-da welingu la ngaba pahunga loduna na Luku Epuràtu hi na-paràha-nja la pa-kangaburungu la pairu ngàndingu-na i Hombàku na ngora kanguhuru pabera-na i Handandehiru hanganji Homba.

¹⁷Ba narongu-yaka na rukuna nuna i Ndautu, pauhi-nanjaka mbuu ndàbada da pamba tanatara Ihirailu, hàla hi dapala-ya na Luku Yorundangu hi da-wandalu-ha da pambada, pa-hanggangu dàngu tau Hiria. Ka pa-kangaburungu-danyaka,

¹⁸ka làndahu pa-kanduli-danjaka da tanatara Hiria paraï da tanatara Ihirailu. I Ndautu dàngu da pambana da pameti-ha da tau 7.000 ma-ulingu kareta pabera dàngu 40.000 tanatara li la wihi. I Hombàku na ngora kanguhuru pabera Hiria pa-pameti-mbuya.

¹⁹Ba daita-yaka paraï da hanganji da pa-kuaha-na i Handandehiru ba kàku-danyaka, karai-danyaka pa-pandami dàngu i Ndautu, hi danyàku lai nyuna. Hàlaka nu nda nahili bihu-apa na tau Hiria patula-nya na tau Amungu.